കൊച്ചി: ക്രിമിനല് കേസിലെ പ്രതിയുടെ പൊട്ടന്സി ടെസ്റ്റ് (ലൈംഗിക ശേഷി പരിശോധന) നടത്താന് അയാളുടെ സമ്മതം ആവശ്യമില്ലെന്ന് ഹൈക്കോടതി. ക്രിമിനല് കേസ് അന്വേഷണത്തിലും വിചാരണയിലും അത്തരമൊരു മെഡിക്കല് പരിശോധന നിയമപരമായി അനുവദനീയമാണെന്നും അത് ഭരണഘടനയുടെ ആര്ട്ടിക്കിള് 21 പ്രകാരമുള്ള ഉറപ്പിന്റെ ലംഘനമല്ലെന്നും ജസ്റ്റിസ് എ. ബദറുദീന്റെ ബെഞ്ച് വ്യക്തമാക്കി. പ്രത്യേക പോക്സോ കോടതിയുടെ വിധിയെ ചോദ്യം ചെയ്ത് സമര്പ്പിച്ച അപ്പീല് പരിഗണിക്കവെയാണ് ഹൈക്കോടതി ഇക്കാര്യം വ്യക്തമാക്കിയത്. പോക്സോ നിയമത്തിലെ സെക്ഷന് 7, 8 പ്രകാരം കുറ്റക്കാരനാണെന്ന് കണ്ടെത്തി മൂന്ന് വര്ഷം കഠിന തടവും പിഴയും ശിക്ഷ വിധിച്ചിരുന്നു. ഇതിന്മേലുള്ള അപ്പീല് പരിഗണിക്കവെയാണ് സമ്മതമില്ലാതെയാണ് പൊട്ടന്സി ടെസ്റ്റ് നടത്തിയതെന്ന വാദം പ്രതിഭാഗം ഉന്നയിച്ചത്.
ബലാത്സംഗം പോലുള്ള കുറ്റകൃത്യങ്ങളില് പ്രതിക്ക് കുറ്റം ചെയ്യാനുള്ള ശാരീരിക കഴിവുണ്ടോ എന്ന് പരിശോധിക്കാനാണ് നിയമപരമായി പൊട്ടന്സി ടെസ്റ്റ് കൂടുതലായി ഉപയോഗിക്കുന്നത്. ചില വിവാഹമോചന കേസുകളിലും പുരുഷന്മാരുടെ ലൈംഗികശേഷി തെളിയിക്കാന് കോടതികള് ഈ പരിശോധന നിര്ദ്ദേശിക്കാറുണ്ട്.
