ജമ്മു: അങ്ങനെ ചുംബന ഇമോജികളും കോടതി കയറി. ജമ്മു കുടുംബകോടതി പരിഗണിക്കുന്ന വിവാഹമോചന കേസില്‍ പരപുരുഷന് ചുംബന ഇമോജികള്‍ അയച്ചതുമായി ബന്ധപ്പെട്ട ചോദ്യം ഒഴിവാക്കണമെന്ന് ആവശ്യപ്പെട്ട് ലേഡി ഡോക്ടര്‍ സമര്‍പ്പിച്ച ഹര്‍ജി ജമ്മു & കശ്മീര്‍, ലഡാക്ക് ഹൈക്കോടതി തള്ളി.
ഡോക്ടറായ ഭര്‍ത്താവ് ഗാര്‍ഹിക പീഡനങ്ങളുടെ പേരില്‍ കുടുംബ കോടതിയില്‍ സമര്‍പ്പിച്ച വിവാഹമോചന ഹര്‍ജിയില്‍ ഡോക്ടറായ ഭാര്യ സഹപ്രവര്‍ത്തകനായ മറ്റൊരു ഡോക്ടര്‍ക്ക് ചുംബന ഇമോജികള്‍ അയച്ചിരുന്നോ എന്ന
ചോദ്യം ഉയര്‍ത്തിയിരുന്നു. ഇത് നീക്കണമെന്നാണ് ഭാര്യ ഹൈക്കോടതിയില്‍ ഉന്നയിച്ച ആവശ്യം. എന്നാല്‍ ഭാര്യ ആരോപിച്ച പോലെ പരിഗണനാവിഷയത്തെ മുന്‍വിധിയോടെ കാണാന്‍ കുടുംബ കോടതിയെ പ്രേരിപ്പിക്കാനിടയില്ലെന്ന നിഗമനത്തൊടെ ഹൈക്കോടതി ഈ ആവശ്യം തളളുകയായിരുന്നു.
ഭര്‍ത്താവിന് തന്റെ ആരോപണങ്ങള്‍ക്കാധാരമായ തെളിവുകള്‍ ഹാജരാക്കാനായില്ലെങ്കില്‍, അദ്ദേഹത്തിന്റെ വിവാഹമോചന ഹര്‍ജി പരാജയപ്പെടുമെന്നും, താന്‍ ഒരു ക്രൂരതയും കാണിച്ചിട്ടില്ലെന്ന ഭാര്യയുടെ നിലപാട് ന്യായീകരിക്കപ്പെടുമെന്നും കോടതി ചൂണ്ടിക്കാട്ടി.
