പാരീസ്: മിറ ആന്ഡ്രീവ കരിയറില് ആദ്യ ഗ്രാന്ഡ് സ്ലാം ഫൈനലില് പ്രവേശിച്ചു. ഫ്രഞ്ച് ഓപ്പണ് സെമിയില് മാര്ത്താ കോസ്റ്റിയൂക്കിനെ നേരിട്ടുള്ള സെറ്റിന് നിഷ്പ്രഭയാക്കിയാണ് റഷ്യയില് നിന്നുള്ള ഈ 19കാരിയുടെ ഫൈനല് പ്രവേശം.
സ്കോര് 6-1, 6-3നാണ് മിറയുടെ ഫൈനല് പ്രവേശം. ടൂര്ണമെന്റില് ഇതുവരെയുള്ളതില് ഏറ്റവും തിളക്കമാര്ന്ന വിജയമായിരിക്കുകയാണ് മിറയുടെ ഈ മുന്നേറ്റം. കഴിഞ്ഞ മാസം മാഡ്രിഡ് ഓപ്പണ് ഫൈനലില് മിറയെ കോസ്റ്റിയൂക്ക് തോല്പ്പിച്ചിരുന്നു. അതിനുള്ള മധുരപ്രതികാരം കൂടിയായി ഈ വിജയം. കഴിഞ്ഞ 30 വര്ഷത്തിനിടെ ഫ്രഞ്ച് ഓപ്പണ് ഫൈനലിലെത്തുന്ന അഞ്ചാമത്തെ പ്രായം കുറഞ്ഞ താരമാണ് മിറ ആന്ഡ്രീവ. സീസണില് വിവിധ ടൂര്ണമെന്റുകളിലായി മിറയുടെ 35-ാം വിജയമാണ് ഇന്നലെ ആഘോഷിച്ചത്. മാത്രമല്ല മാഡ്രിഡ് ഓപ്പണില് കിരീടം നേടിയ കോസ്റ്റിയൂക്ക് തുടര്ച്ചയായ 17 മത്സരങ്ങളില് നേടിവന്ന വിജയക്കുതിപ്പിനാണ് മിറ തടയിട്ടത്. ഫ്രഞ്ച് ഓപ്പണ് പുരുഷ വനിതാ സിംഗിള്സുകളില് ഇക്കുറി പുതിയ ചാമ്പ്യനായിരിക്കും പിറക്കുക. മുന്പ്
കിരീടം നേടിയവര് ആരും തന്നെ ഇത്തവണ സെമി വരെ മുന്നേറിയില്ല.
പുരുഷ സിംഗിള്സിന്റെ സെമി പോരാട്ടങ്ങള് ഇന്ന് നടക്കും. രാത്രി ഏഴിന് നടക്കുന്ന ആദ്യ മത്സരത്തില് യാക്കൂബ് മെന്സിക്കും അലക്സാണ്ടര് സ്വരേവും നേര്ക്കുനേര് കാണും. രണ്ടാം സീഡ് താരമായ സ്വരേവ് പുതു തലമുറയിലെ ശ്രദ്ധേയ താരമാണ്. ദിര്ഘകാലമായി കരിയറില് തിളങ്ങിനില്ക്കുന്നുണ്ടെങ്കിലും പ്രധാന കിരീടനേട്ടങ്ങളില്ലെന്ന ക്ഷീണം തീര്ക്കാനുള്ള മികച്ച അവസരമാണ് ഇത്തവണ ഒത്തുവന്നിട്ടുള്ളത്. രാത്രി 10.30ന് നടക്കുന്ന രണ്ടാം സെമിയില് മാറ്റിയോ അര്നാള്ഡിയും ഫ്ളാവിയോ കോബൊളിയും ഏറ്റുമുട്ടും.
