ടെഹ്റാന്: ഇസ്രയേല് ലെബനോനില് നടത്തുന്ന ആക്രമണത്തില് പ്രതിഷേധിച്ച് യുഎസുമായുള്ള സമാധാന ചര്ച്ചയില് നിന്നും ഇറാന് പിന്മാറി. ഏത് നിമിഷവും സമാധാനം ഉണ്ടായേക്കുമെന്നും ഹോര്മുസ് കടലിടുക്ക് തുറക്കുമെന്നും ഉള്ള പ്രതീക്ഷ ഇതോടെ അസ്തമിച്ചു.
ഗള്ഫ് രാജ്യങ്ങളിലെ മലയാളികള് ഉള്പ്പെടെയുള്ള ഇന്ത്യക്കാര്ക്ക് വിലക്കയറ്റവും തൊഴിലില്ലായ്മയും മൂലമുള്ള ബുദ്ധിമുട്ടുകള് വര്ധിക്കും. ഇന്ത്യയില് ഉള്പ്പെടെ ഊര്ജ്ജ പ്രതിസന്ധി രൂക്ഷമാകും. അമേരിക്കയെ സംബന്ധിച്ചിടത്തോളം പ്രതിസന്ധി അതുപോലെ തുടരുന്നതില് ആഹ്ളാദമുണ്ട്. കാരമം വെനസ്വേലയിലെ പെട്രോളും ഡീസലും ഉയര്ന്ന വിലയ്ക്കാണ് അമേരിക്ക ലോകരാജ്യങ്ങള്ക്ക് വിറ്റ് ലാഭം കൊയ്യുന്നത്. പക്ഷെ ദീര്ഘകാലത്തില് ഇത് അമേരിക്കയിലും ആഭ്യന്തരപ്രതിസന്ധി സൃഷ്ടിക്കും. കാരണം അമേരിക്കയുടെ ആഭ്യന്തരവിപണിയിലും പെട്രോള്, ഡീസല് വില വര്ധിക്കുകയാണ്.
തല്ക്കാലത്തേക്ക് സമാധാനചര്ച്ചകള് നിര്ത്തിവെയ്ക്കുന്നു എന്നാണ് ഇറാന് വാര്ത്താ ഏജന്സി തസ് നിം അറിയിച്ചത്. ഇറാന് സൈന്യമായ ഐആര്ജിസിയുമായി അടുത്ത ബന്ധം പുലര്ത്തുന്ന ചാനലാണ് തസ്നിം ടെലിവിഷന്.
തെക്കന് ബെയ്റൂട്ടിലെ ദാഹിയേ പ്രദേശം ആക്രമിച്ചതായി തിങ്കളാഴ്ച ഇസ്രയേല് പ്രധാനമന്ത്രി ബെഞ്ചമിന് നെതന്യാഹു അറിയിച്ചിരുന്നു. കഴിഞ്ഞ രണ്ട് പതിറ്റാണ്ടിനിടെ ഇതാദ്യമായാണ് ലെബനിനകത്ത് ഇത്രയും ഉള്ളിലേക്ക് ഇസ്രയേല് ആക്രമണം അഴിച്ചുവിടുന്നത്.
