ആലുവ: നീന്തല് ഗുരു സജി വളാശ്ശേരിക്കിത് അഭിമാനത്തിന്റെ നിമിഷം. പ്രധാനമന്ത്രി നരേന്ദ്ര മോദിയുടെ ‘മന് കി ബാത്ത്’ അഭിസംബോധനയില് ആലുവയിലെ സജി വളാശ്ശേരിയെയും അദ്ദേഹത്തിന്റെ നീന്തല് ക്ലബ്ബിനെയും പ്രശംസിച്ചത് കേരളത്തിന് അംഗീകാരത്തിന്റെ നിമിഷമായിരുന്നു. മുങ്ങിമരണങ്ങള് കുറയ്ക്കാന് ലക്ഷ്യമിട്ട് സജി നടത്തുന്ന നിസ്വാര്ത്ഥമായ സേവനത്തെയും അത് ഒരു സമൂഹത്തില് ഉണ്ടാക്കുന്ന വലിയ മാറ്റത്തെയും കുറിച്ച് പ്രധാനമന്ത്രി പ്രത്യേകം പരാമര്ശിച്ചു. പ്രധാനമന്ത്രിയുടെ ഈ അംഗീകാരം വന്ന ഇന്നലെ ഈ വര്ഷം നീന്തല് പഠിച്ച 301 പേര് ഉള്പ്പെടെ 400 പേര് ഒന്നിച്ച് പെരിയാര് നീന്തിക്കടന്ന മെഗാ ക്രോസിങ് അരങ്ങേറിയത് സജിയുടെ പോരാട്ടത്തിന് ഇരട്ടി മധുരം പകര്ന്നു.
2010ല് സജിയുടെയും സുഹൃത്തിന്റെയും മക്കള്ക്ക് നീന്തല് പഠിപ്പിച്ച് കൊണ്ട് തുടങ്ങിയ ദൗത്യം ഇന്ന് 17-ാം വര്ഷത്തില് എത്തിനില്ക്കുമ്പോള് 18,000ത്തിലധികം ആളുകള്ക്ക് ജലസുരക്ഷാ കവചമായി മാറിയിട്ടുണ്ട്. അടിക്കടിയുണ്ടാകുന്ന മുങ്ങിമരണങ്ങള് കണ്ട് വേദനിച്ച അദ്ദേഹം ‘ആരും മുങ്ങിമരിക്കരുത്’ എന്ന ലക്ഷ്യത്തോടെയാണ് ഒരു രൂപ പോലും പ്രതിഫലം വാങ്ങാതെ ഈ പരിശീലനം നല്കുന്നത്. ശാരീരികവും മാനസികവുമായ വെല്ലുവിളികള് നേരിടുന്നവര്ക്കും കാഴ്ചയില്ലാത്തവര്ക്കും സജി പ്രത്യേക പരിഗണന നല്കി നീന്തല് പഠിപ്പിക്കുന്നു. അന്താരാഷ്ട്ര തലത്തില് ശ്രദ്ധേയനായ ആസിം വെളിമണ്ണയെപ്പോലുള്ള പ്രതിഭകളെ വളര്ത്തിയെടുക്കുന്നതില് സജിയുടെ പരിശീലനം നിര്ണായക പങ്കുവഹിച്ചു.
ആലുവ മണപ്പുറത്തെ ദേശം കടവില് നവംബര് ഒന്ന് മുതല് മെയ് 31 വരെയാണ് സൗജന്യ നീന്തല് വിദ്യാലയം നടക്കുന്നത്. ഒരു ദിവസം 900ലധികം പേര്ക്ക് വരെ പരിശീലനം നല്കാനുള്ള വിപുലമായ സൗകര്യങ്ങള് സജി അവിടെ ഒരുക്കിയിട്ടുണ്ട്. സുരക്ഷിതമായ നീന്തലിനായി ആംബുലന്സും ലൈഫ് ബോട്ട് സൗകര്യങ്ങളും സജ്ജമാക്കിയിട്ടുണ്ട്. പ്രധാനമന്ത്രിയുടെ പരാമര്ശത്തോടെ സജി വളാശ്ശേരിയുടെ ഈ നിസ്വാര്ത്ഥ സേവനം ഭാരതത്തിന് മുഴുവന് മാതൃകയായി മാറിയിരിക്കുകയാണ്. സജിയുടെ ഈ വലിയ ദൗത്യത്തിന് ഭാര്യ ജിജിയും മക്കളായ മെറിനും ജെറിനും പൂര്ണ പിന്തുണയുമായി ഒപ്പമുണ്ട്.
ജന്മഭൂമി ഓണ്ലൈന്