സിംഗപ്പൂര്‍: രണ്ട് വര്‍ഷം നീണ്ട കാത്തിരിപ്പിനൊടുവില്‍ ലോക ബാഡ്മിന്റണിലെ സൂപ്പര്‍ താരങ്ങളായ സാത്വിക് സായിരാജ് രെങ്കിറെഡ്ഡി-ചിരാഗ് ഷെട്ടി സഖ്യം ബിഡബ്ല്യുഎഫ് വേള്‍ഡ് ടൂര്‍ കിരീടം നേടി.
സാത്-ചി എന്ന ചുരുക്കപേരില്‍ പ്രസിദ്ധിയാര്‍ജിച്ച ഈ സഖ്യം സിംഗപ്പൂര്‍ ഓപ്പണ്‍ പുരുഷ ഡബിള്‍സ് ഫൈനലില്‍ തോല്‍പ്പിച്ചത് ലോക മൂന്നാം നമ്പര്‍ സഖ്യമായ ഇന്തോനേഷ്യയുടെ ഫജര്‍ ആല്‍ഫിയന്‍-മുഹമ്മദ് ഷോഹിബുള്‍ ഫിക്രി സഖ്യത്തെ. സ്‌കോര്‍ 18-21, 21-17, 21-16
ലോക നാലാം നമ്പര്‍ പുരുഷ ഡബിള്‍സ് സഖ്യമായ സാത്വിക്-ചിരാഗ് സിംഗപ്പൂരില്‍ ആദ്യമായാണ് കിരീടം നേടുന്നത്. ഇതിന് മുമ്പ് ഭാരത താരങ്ങള്‍ സിംഗപ്പൂര്‍ ഓപ്പണില്‍ ജേതാക്കളായിട്ടുണ്ടെങ്കിലും ഡബിള്‍സില്‍ നേടിയിട്ടുണ്ടായിരുന്നില്ല. സൈന നെവാള്‍, പി.വി. സിന്ധു, ബി. സായി പ്രണീത് എന്നിവര്‍ നേരത്തെ ജേതാക്കളായിട്ടുള്ള സിംഗിള്‍സ് താരങ്ങള്‍.
സാത്വിക്-ചിരാഗ് സഖ്യം ഇതിന് മുമ്പ് ഒരു ബിഡബ്ല്യുഎഫ് ടൂറില്‍ ജേതാക്കളായിട്ടുള്ളത് രണ്ട് വര്‍ഷം മുമ്പ് മെയ് മാസത്തില്‍ തായ്‌ലന്‍ഡ് ഓപ്പണ്‍ ബാഡ്മിന്റണിലായിരുന്നു. ഇക്കുറി തായ്‌ലന്‍ഡ് ഓപ്പണില്‍ സഖ്യം ഫൈനല്‍ വരെയെത്തി പരാജയപ്പെട്ടു. സിംഗപ്പൂര്‍ ഓപ്പണ്‍ സെമിയില്‍ ലോക ഒന്നാം നമ്പര്‍ പുരുഷ ഡബിള്‍സ് സഖ്യമായ കൊറിയയുടെ കിം വോന്‍-ഹോ, സിയോ സ്വെങ്-ജേ എന്നിവരെ പരാജയപ്പെടുത്തിയാണ് ഫൈനലിലേക്ക് മുന്നേറിയത്.
കരുത്തരായ ഇന്തോനേഷ്യന്‍ സഖ്യത്തിനെതിരായ ഫൈനല്‍ മത്സരം ഒരു മണിക്കൂറും 13 മിനിറ്റും നീണ്ടു. ആദ്യ ഗെയിം മുതല്‍ ഇരുഭാഗവും ഇഞ്ചോടിഞ്ച് പൊരുതിയാണ് നീങ്ങിയത്. ലീഡുകള്‍ മാറിമറിഞ്ഞ മത്സരത്തിനൊടുവില്‍ 18-17ല്‍ ഇന്തോനേഷ്യന്‍ സഖ്യം മുന്നിലായി. പിന്നെ താഴോട്ട് പോയില്ല.
രണ്ടാം ഗെയിമിലും ആവേശത്തിന് ഒട്ടും കുറവുണ്ടായില്ല. ഒപ്പത്തിനൊപ്പം തന്നെ നീങ്ങി. ഭാരത സഖ്യം അവര്‍ണനീയമാം വിധത്തില്‍ നേടിയ എട്ട് പോയിന്റിന്റെ ആധിപത്യം ഗുണം ചെയ്യുകയായിരുന്നു. മത്സര ഫലം നിര്‍ണയിക്കപ്പെടുന്ന മൂന്നാം ഗെയിമില്‍ ഫജാര്‍-ഫിക്രി സഖ്യം ഭാരത ഡബിള്‍സിന് വലിയ വെല്ലുവിളിയാണുയര്‍ത്തിയത്. ഒരവസരത്തില്‍ മത്സരം 14-13 എന്ന നിലയില്‍ കടുത്തു. അവിടെ നിന്നാണ് സാത്വിക്-ചിരാഗ് സഖ്യം അഞ്ച് പോയിന്റ് ലീഡില്‍ ഗെയിമും മത്സരവും അതുവഴി ടൈറ്റിലും പിടിച്ചെടുത്തത്.
ഇരുവരും ചേര്‍ന്ന് നേടുന്ന ഒമ്പതാം ടൈറ്റില്‍ ആണിത്. ടൂര്‍ണമെന്റിലെ മറ്റ് ഇനങ്ങളില്‍ പ്രതീക്ഷ നല്‍കാവുന്ന മുന്നേറ്റം കാഴ്‌ച്ചവച്ച പി.വി. സിന്ധു വനിതാ സിംഗിള്‍സ് ക്വാര്‍ട്ടറില്‍ പരാജയപ്പെട്ട് പുറത്തായിരുന്നു.
ഭാരത ബാഡ്മിന്റണ്‍ താരങ്ങള്‍ക്ക് ഇനി മാറ്റുരയ്‌ക്കാനുള്ള ടൂര്‍ണമെന്റ് നാളെ ആരംഭിക്കും. ഞായറാഴ്‌ച്ച വരെ നീളുന്ന ഇന്തോനേഷ്യ ഓപ്പണ്‍ 2026.
