ഡെറാഡൂണ്: ഉത്തരാഖണ്ഡിന്റെ മണ്ണിൽ മേഘങ്ങളെ തൊട്ടുരുമ്മി നിൽക്കുന്ന വിശുദ്ധമായ ശിവക്ഷേത്രം – അതാണ് തുംഗനാഥ് ക്ഷേത്രം. ഒരു പക്ഷെ ലോകത്തിലെ തന്നെ ഏറ്റവും ഉയരത്തില് സ്ഥിതിചെയ്യുന്ന ശിവക്ഷേത്രവും തുഗനാഥ് തന്നെ. സമുദ്രനിരപ്പിൽ നിന്നും 12,074 അടി ഉയരത്തിലാണ് തുംഗനാഥ് ക്ഷേത്രം സ്ഥിതി ചെയ്യുന്നത്.
ഉ്ത്തരാഖണ്ഡിലെ ഗര്വാള് ഹിമാലയത്തില് ശിവന് സമര്പ്പിക്കപ്പെട്ട അഞ്ച് ക്ഷേത്രങ്ങള് പഞ്ചകേദാരമായി അറിയപ്പെടുന്നു.അക്കൂട്ടത്തില് വെച്ച് ഏറ്റവും ഉയരത്തിൽ സ്ഥിതി ചെയ്യുന്നതും തുംഗനാഥ് ക്ഷേത്രംതന്നെ. ഇവിടേക്കുള്ള യാത്ര ശിവഭക്തരുടെ ആയുസ്സിലെ ഏറ്റവും വലിയ സ്വപ്നങ്ങളിലൊന്നാണ്.
ക്ഷേത്രത്തിന്റെ ഐതിഹ്യം ഇങ്ങിനെ
ദ്വാപരയുഗത്തിൽ മഹാഭാരത യുദ്ധത്തിന് ശേഷം, ബന്ധുജനങ്ങളെ വധിച്ച പാപത്തിൽ നിന്ന് മുക്തി നേടാൻ പാണ്ഡവർ പരമശിവനെ തിരഞ്ഞ് ഹിമാലയത്തിൽ എത്തി. എന്നാൽ പാണ്ഡവർക്ക് ദർശനം നൽകാൻ ആഗ്രഹിക്കാത്ത ഭഗവാൻ ഒരു കാളയുടെ (നന്ദി) രൂപം പൂണ്ട് ഭൂമിക്കടിയിലേക്ക് മറഞ്ഞു.
പിന്നീട് ഭഗവാന്റെ ശരീരഭാഗങ്ങൾ അഞ്ച് വ്യത്യസ്ത സ്ഥലങ്ങളിലായി പ്രത്യക്ഷപ്പെട്ടു എന്നാണ് ഐതിഹ്യം. അതിൽ ഭഗവാന്റെ ‘ബാഹുക്കൾ’ (കൈകൾ) പ്രത്യക്ഷപ്പെട്ട പുണ്യഭൂമിയാണ് തുംഗനാഥ്. പാണ്ഡവരിൽ രണ്ടാമനായ ഭീമനാണ് ഈ ക്ഷേത്രം നിർമ്മിച്ചതെന്നാണ് വിശ്വസിക്കപ്പെടുന്നത്.
മാറാത്ത ദുരിതങ്ങളില്ല, തീരാത്ത പാപങ്ങളില്ല
ഇവിടെയെത്തി പ്രാർത്ഥിച്ചാൽ മാറാത്ത ദുരിതങ്ങളില്ല, തീരാത്ത പാപങ്ങളില്ല എന്നാണ് ഭക്തരുടെ വിശ്വാസം.
പരമപവിത്രം തുംഗനാഥ് യാത്ര…
മഞ്ഞുപെയ്യുന്ന വഴിത്താരകൾ: ചോപ്തയിൽ നിന്നുള്ള 3.5 കിലോമീറ്റർ നീളുന്ന ട്രെക്കിംഗ് വെറുമൊരു യാത്രയല്ല. ചുറ്റും മഞ്ഞുമൂടിയ ഹിമാലയൻ നിരകളും, പച്ചപ്പും, പ്രകൃതിയുടെ നിശബ്ദതയും എല്ലാം അഭൗമമായ അനുഭവമാണ്.
അരികെ രാവണശില
രാവണന്റെ തപസ്സ്: ലങ്കാധിപതിയായ രാവണൻ ശിവനെ പ്രീതിപ്പെടുത്താനായി തപസ്സ് ചെയ്ത ‘രാവണശില’ ഈ ക്ഷേത്രത്തിന് സമീപത്താണ് സ്ഥിതി ചെയ്യുന്നത്.
