പത്തനംതിട്ട: പോക്സോ കേസിൽപ്പെട്ട പ്രതിയുടെ പിതാവിനെ ഭീഷണിപ്പെടുത്തി ലക്ഷങ്ങൾ തട്ടിയെടുക്കാൻ ശ്രമിച്ച കേസിൽ യൂട്യൂബ് ചാനൽ ഉടമകളായ രണ്ട് യൂട്യൂബർമാരെ അടൂർ പോലീസ് അറസ്റ്റ് ചെയ്തു . അഞ്ചൽ അഗസ്തിക്കോട് പൂവാനുംവിളയിൽ അഗ്നി ജുവൽ (33), തിരുവനന്തപുരം തോന്നയ്ക്കൽ മംഗലപുരം രോഹിണിയിൽ അനീഷ് വിജയൻ (35) എന്നിവരാണ് പോലീസിന്റെ പിടിയിലായത്. ‘വിസ്മയ’ എന്ന യൂട്യൂബ് ചാനലിന്റെ ഉടമകളാണ് അറസ്റ്റിലായ ഇരുവരും.
പോക്സോ കേസ് പ്രതിയായ മകന്റെ മൊബൈൽ ഫോണിൽ നിന്നും കേസിനാസ്പദമായ ചില വീഡിയോകൾ പോലീസുകാർ മുഖേന തങ്ങൾക്ക് രഹസ്യമായി ലഭിച്ചിട്ടുണ്ടെന്ന് കാട്ടിയാണ് ഇവർ പിതാവിനെ സമീപിച്ചത്. ഈ ദൃശ്യങ്ങൾ തങ്ങളുടെ യൂട്യൂബ് ചാനൽ വഴിയും മറ്റ് സോഷ്യൽ മീഡിയ പ്ലാറ്റ്ഫോമുകൾ വഴിയും പ്രചരിപ്പിക്കാതിരിക്കണമെങ്കിൽ 10 ലക്ഷം രൂപ നൽകണമെന്ന് ആവശ്യപ്പെട്ട് ഇവർ പിതാവിനെ നിരന്തരം ഫോണിലൂടെയും നേരിട്ടും ഭീഷണിപ്പെടുത്തുകയായിരുന്നു.
തുടർന്ന് നടന്ന കടുത്ത തർക്കങ്ങൾക്കൊടുവിൽ മാനഹാനി ഭയന്ന പിതാവ് രണ്ട് ലക്ഷം രൂപ നൽകാമെന്ന് സമ്മതിച്ചു. ഇതിന് പിന്നാലെ അദ്ദേഹം അടൂർ പോലീസ് സ്റ്റേഷനിലെത്തി ഉദ്യോഗസ്ഥർക്ക് കൃത്യമായ പരാതി നൽകുകയായിരുന്നു. പരാതി ലഭിച്ച പോലീസ് യൂട്യൂബർമാരെ കുടുക്കാൻ തന്ത്രപരമായ കെണിയൊരുക്കി. പോലീസിന്റെ നിർദ്ദേശപ്രകാരം, ആവശ്യപ്പെട്ട തുക വെള്ളിയാഴ്ച അടൂരിലെത്തി കൈമാറാമെന്ന് പിതാവ് പ്രതികളെ ഫോണിൽ വിളിച്ച് അറിയിച്ചു.
ഇതനുസരിച്ച് പണം കൈപ്പറ്റാനായി അടൂരിൽ എത്തിയ യൂട്യൂബർമാരെ ഒളിച്ചിരുന്ന പോലീസ് സംഘം തന്ത്രപരമായി വളഞ്ഞുപിടികൂടുകയായിരുന്നു. അറസ്റ്റിലായ അഗ്നി ജുവലിനെയും അനീഷ് വിജയനെയും കോടതിയിൽ ഹാജരാക്കി റിമാൻഡ് ചെയ്തു. ഇവരുടെ ബ്ലാക്ക്മെയിലിങ് ശൃംഖലയെക്കുറിച്ച് കൂടുതൽ അന്വേഷണം നടത്തുമെന്ന് പോലീസ് വ്യക്തമാക്കി.
