കൊച്ചി: താരസംഘടനയായ അമ്മയുടെ മാനേജര് അതുല്യയുടെ ആരോപണങ്ങളെ പൂര്ണ്ണമായും തള്ളി ജനറല് സെക്രട്ടറി കുക്കു പരമേശ്വരന്. ആരോപണങ്ങള് മുഴുവന് കെട്ടിച്ചമച്ചതാന്നെന്നും ഇതിനെതിരെ നിയമനടപടി സ്വീകരിച്ചെന്നും കുക്കു പരമേശ്വരന്.
തനിക്കെതിരെ പ്രചരിക്കുന്ന പരാതികളെല്ലാം അവാസ്തവമാണെന്നും എല്ലാം ഒരു തൊഴില് തര്ക്കത്തില് നിന്ന് തുടങ്ങിയതാണെന്നും കുക്കു പരമേശ്വരന് പ്രതികരിച്ചു. പിന്നീട് അത് ചിലര് വഴി തിരിച്ചുവിടുകയായിരുന്നു. അതുല്യയുടെ ഇപ്പോഴത്തെ പരാതി പൂര്ണമായും കെട്ടിച്ചമച്ചതാണെന്നും കുക്കു പരമേശ്വരന് ആവര്ത്തിച്ചു.
എല്ലാ കാര്യങ്ങളും പൊലീസ് അന്വേഷണത്തില് പൊതുസമൂഹത്തിന് ബോധ്യപ്പെടും. ആരോപണങ്ങള്ക്കെതിരെ നിയമനടപടികള് ആരംഭിച്ചു കഴിഞ്ഞു. എല്ലാ കാര്യങ്ങളും മുതിര്ന്ന അംഗങ്ങളെ അപ്പപ്പോള് അറിയിച്ചിട്ടുണ്ട്. എല്ലാ പരാതികള്ക്കും പരിഹാരം ജനറല്ബോഡിയില് ഉണ്ടാകുമെന്നും കുക്കു പരമേശ്വരന് പ്രതികരിച്ചു.
അതുല്യയുമായി അപകീര്ത്തികരമായ ബന്ധമുണ്ടെന്ന് പറയാന് സെക്യൂരിറ്റി ജീവനക്കാരനെ കുക്കുപരമേശ്വരന് നിര്ബന്ധിച്ചെന്നായിരുന്നു പരാതി. കൊച്ചി സിറ്റി പൊലീസ് കമ്മീഷണര്ക്ക് അതുല്യ നല്കിയ പരാതിയില് ഉണ്ണി ശിവപാലിനെയും നീനാകുറുപ്പിനെയും കൂടി ഉള്പ്പെടുത്തിയിട്ടുണ്ട്. പരാതി നല്കിയിട്ടുണ്ട്. ഉണ്ണി ശിവപാലിന് വേണ്ടി കുക്കു പരമേശ്വരന് വഴിവിട്ട പ്രവര്ത്തനങ്ങള് നടത്തുന്നുവെന്നും ആരോപണമുണ്ട്. തനിക്കെതിരെ തൊഴില് പീഡനവും അപകീര്ത്തിപ്പെടുത്തുന്നതിനായി ഗൂഢാലോചനയും നടന്നു. ഗൂഢാലോചനയും ഭീഷണിപ്പെടുത്തലും നടന്നുവെന്ന് സെക്യൂരിറ്റി ജീവനക്കാരന് മുഹമ്മദ് സമ്മതിക്കുന്ന ഓഡിയോ സംഭാഷണവും അതുല്യ പുറത്തുവിട്ടിട്ടുണ്ട്.
അമ്മ സംഘടന ഒരു പൊട്ടിത്തെറിയുടെ വക്കില് നില്ക്കുമ്പോഴാണ് കുക്കു പരമേശ്വരന് ആദ്യമായി പരസ്യപ്രതികരണം നടത്തിയിരിക്കുന്നത്. പല രീതിയില് അമ്മയില് വഴക്ക് മൂക്കുകയാണ്. നടി അന്സിബ കഴിഞ്ഞ ദിവസം ലക്ഷ്മീപ്രിയയ്ക്കും ടിനി ടോമിനും എതിരെ ജിഹാദി പരാതി ഉള്പ്പെടെ ഉന്നയിച്ചിരുന്നു. താന് മതം മാറ്റുന്നവളാണെന്ന് ടിനി ടോം പറഞ്ഞിട്ടുണ്ടെന്നും തനിക്കെതിരെ തൃപ്പൂണിത്തുറ പൊലീസ് സ്റ്റേഷനില് ലക്ഷ്മീപ്രിയ കേസ് കൊടുത്തെന്നും ഇത് വഴി മൂന്ന് മണിക്കൂര് നേരം അന്നത്തെ തൃപ്പൂണിത്തുറ വനിത എസ് ഐ തന്നെ ചീത്തവിളിച്ചെന്നും അന്സിബയുടെ പരാതിയില് പറയുന്നു. എന്നാല് ഇതിനെതിരെ ആഞ്ഞടിച്ച് ലക്ഷ്മീപ്രയയും രംഗത്ത് വന്നു. ടിനി ടോമിനെ വര്ഷങ്ങളായി അറിയാമെന്നും ഒരിയ്ക്കലും ജിഹാദി പരാമര്ശങ്ങളോ മതപരിവര്ത്തനപരാതിയോ അദ്ദേഹം ഉന്നയിക്കുമെന്ന് തോന്നുന്നില്ലെന്നും ലക്ഷ്മിപ്രിയ പറഞ്ഞു. തനിക്ക് അന്സിബ അയച്ച ഒരു മെസ്സേജ് തന്റെ ഉറക്കം കെടുത്തിയെന്നും ഇതേക്കുറിച്ച് ഫോണിലൂടെയും മെസ്സേജിലൂടെയും വിശദീകരണം ചോദിച്ചെങ്കിലും അന്സിബ അത് നല്കിയില്ലെന്നും ഇതേ തുടര്ന്ന് താനാണ് തൃപ്പൂണിത്തുറ പൊലീസില് പരാതി നല്കിയതെന്നും ലക്ഷ്മീപ്രിയ പറഞ്ഞു. മാത്രല്ല, കാര്യങ്ങള് മുഴുവന് വഷളാക്കുന്നത് നടി നീനാ കുറുപ്പാണെന്നും ലക്ഷ്മീപ്രിയ ആരോപിച്ചിരുന്നു.
