തിരുവനന്തപുരം: നിയമസഭയില്‍ സംസ്ഥാന പോലീസ് മേധാവി റവാഡ ചന്ദ്രശേഖറിന്റെ ചട്ടലംഘനം. നയപ്രഖ്യാപനത്തിന് എത്തിയ ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ക്കൊപ്പം റവാഡ ചന്ദ്രശേഖറും നിയമസഭയ്‌ക്ക് അകത്ത് പ്രവേശിച്ചു. സഭയ്‌ക്ക് അകത്ത് കടക്കാന്‍ പ്രോട്ടോകോള്‍ പ്രകാരം ഡിജിപിക്ക് അനുമതിയില്ല. ചട്ടലംഘനം വ്യക്തമായതോടെ സ്പീക്കറോട് മാപ്പ് പറഞ്ഞ് സംസ്ഥാന പോലീസ് മേധാവി.
നയപ്രഖ്യാപനത്തില്‍ നിയമസഭാ സാമാജികര്‍ക്കും നിയമസഭാ സെക്രട്ടറിക്കും അല്ലാതെ ഗവര്‍ണര്‍ക്കൊപ്പം ഗവര്‍ണറുടെ സെക്രട്ടറി, രണ്ട് എഡിസിമാര്‍, ചീഫ് സെക്രട്ടറി, കൂടാതെ വാച്ച് ആന്റ് വാര്‍ഡന്മാര്‍, നിയമസഭാ സെക്രട്ടറിയേറ്റിലെ ഉദ്യോഗസ്ഥര്‍ എന്നിവര്‍ക്ക് മാത്രമാണ് സഭാതലത്തിലേക്ക് പ്രവേശിക്കാന്‍ അനുമതി. നയപ്രഖ്യാപനത്തിനായി നിയമസഭയിലെത്തിയ ഗവര്‍ണര്‍ ആര്‍ലേക്കറെ സ്പീക്കര്‍ തിരുവഞ്ചൂര്‍ രാധാകൃഷ്ണന്‍, മുഖ്യമന്ത്രി വി.ഡി. സതീശന്‍, പാര്‍ലമെന്ററി കാര്യമന്ത്രി സണ്ണി ജോസഫ്, നിയമസഭാ സെക്രട്ടറി ഷാജി സി. ബേബി എന്നിവര്‍ ചേര്‍ന്ന് സ്വീകരിച്ച് ആനയിക്കുകയായിരുന്നു. ഗവണര്‍ക്കൊപ്പം ചീഫ് സെക്രട്ടറി എ. ജയതിലക്, ഗവര്‍ണറുടെ സെക്രട്ടറി വാസുകി, രണ്ട് എഡിസിമാരായ മോഹിത് റവാത്ത്, ആശിഷ് ജോഷി എന്നിവരും അനുഗമിച്ചു. ഈ സംഘത്തോടൊപ്പം സിവില്‍ വേഷത്തിലായിരുന്ന സംസ്ഥാന പോലീസ് മേധാവിയും അകത്തേക്ക് കയറുകയായിരുന്നു. പിന്നീട് ഭരണപക്ഷം ഇരിക്കുന്ന ട്രഷറി ബെഞ്ചിന് സമീപത്തെ വാതിലിലൂടെ പുറത്തേക്ക് പോയി.
ഇത് പ്രതിപക്ഷ നേതാവ് പിണറായി വിജയന്‍ ചൂണ്ടിക്കാട്ടി. സംഭവം ശ്രദ്ധയില്‍പ്പെട്ടെന്ന് സ്പീക്കര്‍ തിരുവഞ്ചൂര്‍ രാധാകൃഷ്ണന്‍ പ്രതിപക്ഷ നേതാവിന് മറുപടി നല്‍കി. അശ്രദ്ധ കൊണ്ടാകാം ഡിജിപി സഭയ്‌ക്ക് അകത്ത് പ്രവേശിച്ചതെന്നും വിവാദമാക്കേണ്ടതില്ലെന്നും സ്പീക്കര്‍ മറുപടിയില്‍ പറഞ്ഞു. പിന്നീട് സ്പീക്കറുടെ ഓഫീസിലെത്തിയ ഡിജിപി അശ്രദ്ധകൊണ്ട് സംഭവിച്ചതാണെന്ന് പറഞ്ഞ് മാപ്പ് ചോദിക്കുകയും ചെയ്തു.
