തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വീട്ടിലെ റെയ്ഡിനെ തുടര്‍ന്ന് ഇ ഡി ഉദ്യോഗസ്ഥരെ ആക്രമിച്ച കേസില്‍, തിരുവനന്തപുരം കോര്‍പ്പറേഷന്‍ മുന്‍ കൗണ്‍സിലറും സി പി എം പാളയം ലോക്കല്‍ കമ്മിറ്റി സെക്രട്ടറിയുമായ ഐ പി ബിനു കീഴടങ്ങി. കേസിലെ പ്രതികള്‍ക്കായി പൊലീസ് അന്വേഷണം നടക്കുന്നതിനിടെയാണ് ഐ പി ബിനു കീഴടങ്ങിയത്. ഇ ഡി ഉദ്യോഗസ്ഥര്‍ സഞ്ചരിച്ച വാഹനത്തിന് നേരെ ഐ പി ബിനു മുട്ട എറിയുന്ന ദൃശ്യങ്ങള്‍ പുറത്തുവന്നിരുന്നു.
കുറ്റകൃത്യത്തില്‍ നേരിട്ട് പങ്കെടുത്ത പത്ത് പേരില്‍ ഒരാളാണ് ഐ പി ബിനു. ഇതുവരെ കേസില്‍ 16 ഓളം പേരയാണ് അറസ്റ്റ് ചെയ്തിട്ടുള്ളത്.
മ്യൂസിയം പൊലീസിന് മുന്നില്‍ കീഴടങ്ങുന്നുവെന്ന് ഫേസ്ബുക്കില്‍ കുറിച്ച ശേഷമാണ് ഐപി ബിനു പിടികൊടുത്തത്. പിടിച്ചതല്ല പിടി കൊടുക്കുന്നതാണ്.പാര്‍ട്ടി ഏല്‍പ്പിച്ച ഉത്തരവാദിത്വങ്ങള്‍ 100 ശതമാനം ആത്മാര്‍ത്ഥതയോടുകൂടി ചെയ്യുക എന്നതാണ് തന്റെ നിലപാടും ശരിയും.അതിനിടയില്‍ നിരവധി തവണ ജയില്‍വാസം അനുഭവിച്ചിട്ടുണ്ട്.കഴിഞ്ഞദിവസം സഖാവ് പിണറായി വിജയനേയും കുടുംബത്തെയും ബന്ദിയാക്കി ഇഡി നടത്തിയ നാടക റൈഡി അങ്ങേയറ്റം വിമര്‍ശനാത്മകവും പരിഹാസ്യവും ആണ്. ഒരു തുള്ളി വെള്ളം പോലും കുടിക്കാന്‍ അനുവദിക്കാതെ ഇത് എന്ത് റൈഡ് ആണ്.
ED – VD ഡീല്‍ ഒക്കെ സാധാരണ മനുഷ്യന് നന്നായി അറിയാം..സുപ്രീംകോടതി വരെ തള്ളിയ കേസുകളില്‍ എന്തോന്ന് റൈഡ് ആണ്…ഇമ്മാതിരിയുള്ള പ്രഹസന പരമ്പര സര്‍ക്കാര്‍ ഏജന്‍സികള്‍ തുടര്‍ന്നാല്‍…ആഹ്വാനം ഇല്ലാതെ തന്നെ കേരളം തെരുവില്‍ ഇറങ്ങും..ഇത് ബംഗാള്‍ അല്ല കേരളം ആണ്..പ്രിയപ്പെട്ട സഖാക്കളെ നിങ്ങളാണ് എന്റെ ജീവനും കരുത്തും…ഞാന്‍ പോയിട്ട് വരാം… വിപ്ലവ അഭിവാദ്യങ്ങള്‍-ഫേസ്ബുക്കില്‍ ഐ.പി ബിനു കുറിച്ചു.
