തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വീട്ടിലെ ഇഡി റെയ്ഡിനെ തുടര്‍ന്നുണ്ടായ ആക്രമണത്തെ ന്യായീകരിച്ച് സിപിഎം നേതാക്കള്‍.തിരുവനന്തപുരത്ത് ഉണ്ടായത് സ്വാഭാവിക പ്രതികരണമാണെന്ന് സംസ്ഥാന സെക്രട്ടറിയേറ്റ് അംഗം എം. സ്വരാജ് പറഞ്ഞു.
ഇഡിയെ ആക്രമിച്ചു എന്നാണ് മാധ്യമ വാര്‍ത്ത.എന്നാല്‍, അക്രമം ഇങ്ങനെ ഒന്നുമല്ലെന്നാണ് സ്വരാജിന്റെ പക്ഷം. അണപൊട്ടി എത്തിയ ജനസഞ്ചയം വലിയ നെറികേടിനെതിരെ പ്രതികരിച്ചതാണ്. ഏതെങ്കിലും അക്രമത്തിനെ പിന്തുണക്കുകയോ പ്രോത്സാഹിപ്പിക്കുകയോ ചെയ്യുന്നവരല്ല ഇടതു പ്രവര്‍ത്തകരെന്നാണ് സ്വരാജ് പറയുന്നത്.
അതേസമയം പ്രിയപ്പെട്ട നേതാക്കള്‍ക്കെതിരെ തിരിഞ്ഞാല്‍ ജനം ക്ഷുഭിതരാകുമെന്ന് സിപിഎം നേതാവ് ഇ.പി. ജയരാജന്‍ പറഞ്ഞു. ഇ ഡി പരിശോധന കോണ്‍ഗ്രസ് – ബിജെപി ഡീല്‍ ആണെന്നും തിരുവനന്തപുരത്തുണ്ടായത് സ്വാഭാവിക പ്രതികരണമാണെന്നുമാണ് ഇ.പി. ജയരാജന്റെ വാദം.ഏത് ഗാന്ധിയനായാലും പ്രതികരിക്കും. മുഖ്യമന്ത്രിയുടെ അറിവോടെയാണോ ഈ ഡി പരിശോധന നടന്നതെന്നും അദ്ദേഹം ചോദിച്ചു. ബിനീഷ് കോടിയേരിക്കെതിരായ ഇ ഡി അന്വേഷണത്തില്‍ അന്നത്തെ സാഹചര്യത്തിനനുസരിച്ചായിരുന്നു പാര്‍ട്ടി നിലപാടെന്നും അദ്ദേഹം പറഞ്ഞു.
കഴിഞ്ഞ ദിവസം ഉണ്ടായത് സ്വാഭാവിക പ്രതിഷേധമാണെന്ന വാദമാണ് മുന്‍ മന്ത്രി വി. ശിവന്‍കുട്ടിക്കുളളത്.ഇത്രയും പ്രതിഷേധമുണ്ടായപ്പോള്‍ ശാന്തമായ അന്തരീക്ഷം ഉണ്ടായതിനുശേഷം ഈ ഡി ഉദ്യോഗസ്ഥര്‍ പുറത്തിറങ്ങണമായിരുന്നു.പൊലീസിന് വീഴ്ച ഉണ്ടായി.പൊലീസ്, പാര്‍ട്ടി ഓഫീസ് റെയ്ഡ് ചെയ്യാന്‍ ശ്രമിച്ചെന്നും ശിവന്‍കുട്ടി കുറ്റപ്പെടുത്തി. പാര്‍ട്ടി പ്രവര്‍ത്തകര്‍ക്ക് എതിരെ ഉള്ള കേസുകള്‍ നിയമപരമായി നേരിടും.
