കോട്ടയം:പാലായില് ബിജെപി നേതാവ് ഷോണ് ജോര്ജിന്റെ വീട്ടിലേക്ക് ഡിവൈഎഫ്ഐ പ്രകടനം.പൊലീസും പ്രവര്ത്തകരും തമ്മില് വാക്കുതര്ക്കമുണ്ടായി.ഈ സമയം പ്രദേശത്ത് ബിജെപി പ്രവര്ത്തകരും സംഘടിച്ച് എത്തി. പൊലീസ് ബാരിക്കേഡുകള് ഉപയോഗിച്ച് ഇരുസംഘങ്ങള്ക്കും നടുവില് നില്ക്കുകയും ഇരുകൂട്ടരും തമ്മില് സംഘര്ഷമുണ്ടാകാതിരിക്കാന് പരിശ്രമിക്കുകയുമായിരുന്നു.
സിഎംആര്എല്- എക്സാലോജിക് ഇടപാടില് എസ്എഫ്ഐഒയിലേക്ക് പരാതി നല്കിയത് ഉള്പ്പെടെ കേസില് ഷോണ് ജോര്ജ് നിര്ണായക ഇടപെടലുകള് നടത്തിയിരുന്നു. ഇതേ തുടര്ന്നാണ് ഇ ഡിയും വിഷയത്തില് റെയ്ഡ് നടത്തിയത്. ഈ സാഹചര്യത്തിലായിരുന്നു ഷോണിന്റെ വീട്ടിലേക്കുള്ള ഡിവൈഎഫ്ഐ പ്രതിഷേധം.
ഷോണ് ജോര്ജ് വീട്ടിലുള്ളപ്പോഴായിരുന്നു ഡിവൈഎഫ്ഐ പ്രതിഷേധം.ഡിവൈഎഫ്ഐ പ്രവര്ത്തകര് ബാരിക്കേഡ് മറികടക്കാന് ശ്രമിച്ചു. 50ഓളം ഡിവൈഎഫ്ഐ പ്രവര്ത്തകര് ഇവിടെയെത്തി. അത്രയും തന്നെ ബിജെപി പ്രവര്ത്തകരും സംഘടിച്ച് എത്തി.
