ആലപ്പുഴ: സ്ത്രീ സമൂഹം ജാഗ്രതയോടെ പ്രവര്ത്തിക്കണമെന്ന് കവിയും ചലച്ചിത്ര ഗാന രചയിതാവുമായ വയലാര് ശരത്ചന്ദ്രവര്മ്മ പറഞ്ഞു. വിശ്വസംവാദ കേന്ദ്രത്തിന്റെ ആഭിമുഖ്യത്തില് നടന്ന നാരദ ജയന്തി മാധ്യമ പുരസ്കാര ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. പ്രപഞ്ചം അമ്മയാണ്. അതാണ് വന്ദേമാതര ഗാനത്തിലൂടെ പ്രതിപാദിക്കുന്നത്. സുഭദ്ര ഗര്ഭാവസ്ഥയില് ആയിരുന്നപ്പോള് പത്മവ്യൂഹം ഭേദിക്കുന്ന കഥ ശ്രീകൃഷ്ണന് പറഞ്ഞിരുന്നു. തിരിച്ചിറങ്ങുന്നത് പറയും മുന്പ് ക്ഷീണിതയായ സുഭദ്ര ഉറങ്ങിപ്പോയി.
പിന്നീട് കുരുക്ഷേത്ര യുദ്ധത്തില് പത്മവ്യൂഹത്തില് പ്രവേശിച്ച അഭിമന്യു പുറത്തിറങ്ങാനാകാതെ മരിച്ചു. അമ്മ ഉണര്ന്നിരുന്നുവെങ്കില് പത്മവ്യൂഹത്തില് നിന്ന് പുറത്തുകടക്കുന്ന വിദ്യയും അഭിമന്യു കൃഷ്ണനില് നിന്ന് പഠിക്കുമായിരുന്നു. ഇന്നത്തെക്കാലത്ത് ഈ കഥയ്ക്ക് വളരെ പ്രാധാന്യമുണ്ടെന്ന് അദ്ദേഹം കൂട്ടിച്ചേര്ത്തു. നാരദന് സര്വ ലോകങ്ങളിലും സഞ്ചരിക്കുന്ന ത്രികാല ജ്ഞാനിയായിരുന്നെന്നും ആധുനിക മാധ്യമലോകം നാരദ മഹര്ഷിയെ പഠിക്കണമെന്നും ആര്എസ്എസ് പ്രാന്ത പ്രചാര് പ്രമുഖ് എം. ഗണേശ് പറഞ്ഞു.
റിപ്പോര്ട്ടര് ചാനലിലെ എസ്. സജിത് കുമാറിന് അമ്പലപ്പുഴ ഗോപകുമാര് സ്മാരക ക്യാഷ് അവാര്ഡായി 10,000 രൂപയും വിശ്വസംവാദകേന്ദ്രത്തിന്റെ അവാര്ഡും ശരത്ചന്ദ്ര വര്മ്മ സമ്മാനിച്ചു. ജൂറിയുടെ പ്രത്യേക പരാമര്ശത്തിനര്ഹയായ മാതൃഭൂമി റിപ്പോര്ട്ടര് സുപ്രദ പ്രസാദിന് ക്യാഷ് അവാര്ഡും മൊമെന്റോയും സമ്മാനിച്ചു. മാധ്യമപ്രവര്ത്തകന് സതീഷ് ആലപ്പുഴ അധ്യക്ഷനായി. ജൂറി അംഗം ജെ. മഹാദേവന് അവാര്ഡ് ജേതാക്കളെ പരിചയപ്പെടുത്തി. അഡ്വ. ആശാമോള്, അഡ്വ. രാജേഷ് എന്നിവര് സംസാരിച്ചു. വിശ്വസംവാദ കേന്ദ്രം കോഓര്ഡിനേറ്റര് കെ. ആര്. സുബ്രഹ്മണ്യന് സ്വാഗതവും, ജോ. കോര്ഓഡിനേറ്റര് പ്രദീപ് കെ. നന്ദിയും പറഞ്ഞു. പി. എസ്. സുരേഷ് വന്ദേമാതരം ആലപിച്ചു.
