തിരുവനന്തപുരം: മലയാള സിനിമാ ചരിത്രത്തില്‍ പുതു ചരിത്രം കുറിച്ച് മുന്നേറുന്ന മോഹൻലാൽ-ജീത്തു ജോസഫ് ചിത്രം ‘ദൃശ്യം 3’യുടെ വ്യാജ പകർപ്പ് പുറത്ത്. യുവാവ് ട്രെയിനിലിരുന്ന് സിനിമ കാണുന്നതിന്റെ ദൃശ്യങ്ങൾ ഒരു ചാനൽ പുറത്തുവിട്ടു. ഗുരുവായൂർ എക്സ്പ്രസിൽ നിന്നുള്ള ദൃശ്യങ്ങളാണ് പുറത്തുവന്നത്. സിനിമ കാണുന്നത് തമിഴ്നാട് സ്വദേശിയാണെന്നാണ് സംശയം.
ചിത്രം തിയേറ്ററുകളിൽ പ്രദർശനം തുടരുന്നതിനിടെയാണ് വ്യാജ പകർപ്പ് പുറത്തുവന്നിരിക്കുന്നത്. റിലീസായി 58 മണിക്കൂറിനുള്ളിലാണ് ഈ ചിത്രം 100 കോടി ക്ലബിൽ ഇടംപിടിച്ചത്. 156. 14 കോടി രൂപയാണ് സിനിമയുടെ ആഗോള ഗ്രോസ് എന്നാണ് റിപ്പോർട്ടുകൾ. കഴിഞ്ഞ പതിമൂന്ന് വര്‍ഷമായി മലയാളി പ്രേക്ഷകരുടെ മനസില്‍ ജീവിക്കുന്ന ജോര്‍ജുകുട്ടിയേയും കുടുംബത്തേയും ഏറ്റെടുത്തിരിക്കുകയാണ് ലോകമെമ്പാടുമുള്ള സിനിമാപ്രേമികള്‍.
മോഹന്‍ലാലിന്റെ ജന്മദിനമായ മെയ് 21 നാണ് ലോകമെമ്പാടുമായി ദൃശ്യം 3 തിയേറ്ററുകളില്‍ എത്തിയത്. ആഗോളതലത്തില്‍ 151.14 കോടി രൂപയാണ് വെറും അഞ്ചു ദിവസത്തിനുള്ളില്‍ ദൃശ്യം 3 കൊയ്തെടുത്തത്. റിലീസ് ദിനത്തില്‍ 13.7 കോടി രൂപയാണ് മലയാളത്തില്‍ നിന്ന് മാത്രം ചിത്രം നേടിയെടുത്തത്. രണ്ടാം ദിവസത്തില്‍ 9.85 കോടി രൂപയും മുന്നാം ദിവസത്തില്‍ 11.65കോടി രൂപയുമായിരുന്നു. നാലാം ദിവസത്തില്‍ 11.65 കോടി രൂപയുമാണ് ചിത്രത്തിന് ലഭിച്ചത്.
ഈ നാലു ദിവസങ്ങളിലും ശക്തമായ മുന്നേറ്റമാണ് ചിത്രം നടത്തിയത്. അഞ്ചാം ദിവസത്തില്‍ ഇടിവ് രേഖപ്പെടുത്തിയത് കാണാം. അഞ്ചാം ദിവസത്തിലേക്ക് കടക്കുമ്പോള്‍ 6.45 കോടി രൂപ മാത്രമേ ചിത്രത്തിന നേടാന്‍ കഴിഞ്ഞുള്ളു. എങ്കിലും ഒറ്റദിവസത്തില്‍ മികച്ച കലക്ഷന്‍ തന്നെയാണ് ചിത്രം നേടിയിരിക്കുന്നത്. ഇതുവരെ മലയാളത്തില്‍ നിന്നുമാത്രമുള്ള നെറ്റ് കലക്ഷന്‍ 53.30 കോടി രൂപയാണ്.
