പുതുച്ചേരി: ജൂനിയര് നാഷണല് ബാസ്കറ്റ്ബോള് ചാമ്പ്യന്ഷിപ്പില് കേരള വനിതകള്ക്ക് രണ്ടാം ജയം. ഗ്രൂപ്പ് ബി പോരാട്ടത്തില് രാജസ്ഥാനെ 59-55ന് പരാജയപ്പെടുത്തിയതോടെ ടീം ക്വാര്ട്ടര് ഫൈനല് പ്രതീക്ഷകള് സജീവമാക്കി.
പുതുച്ചേരിയില് നടക്കുന്ന ചാമ്പ്യന്ഷിപ്പിന്റെ 76-ാം പതിപ്പില് ഇന്നലെ കേരള വനിതകള് ആദ്യ ക്വാര്ട്ടറില് പിന്നില് പോയ ശേഷമാണ് മത്സരത്തിലേക്ക് ശക്തമായി തിരിച്ചുവന്നത്. ഒന്നാം ക്വാര്ട്ടറില് രാജസ്ഥാന് 16-11 ന് ലീഡ് എടുത്തു. രണ്ടാം ക്വാര്ട്ടറില് (23-11) മികച്ച പ്രകടനത്തോടെ കേരളം തിരികെ വന്നു. ഒടുവില് 59-55ന് കേരളം വിജയം ആഘോഷിച്ചു.
ലിയ മരിയ, സുഭദ്ര ജയകുമാര് എന്നിവര് 16 പോയിന്റുകള് വീതം നേടി ടീമിന്റെ വിജയ ശില്പികളായി. രണ്ടാം പകുതിയില് മാത്രം ഇറങ്ങിയ ക്യാപ്റ്റന് അര്ത്ഥിക കെ. എട്ട് പോയിന്റുകള് നേടി. രാജസ്ഥാന് വേണ്ടി ക്യാപ്റ്റന് കൃതിക (20 പോയിന്റ്) നടത്തിയ പോരാട്ടം കേരളത്തിന്റെ പ്രതിരോധത്തിന് മുന്നില് വഴിമാറി.
