പുതുച്ചേരി: ജൂനിയര് നാഷണല് ബാസ്ക്കറ്റ്ബോള് ചാമ്പ്യന്ഷിപ്പില് കേരളത്തിന് ഇരട്ടവിജയം. പുതുച്ചേരി രാജീവ് ഗാന്ധി ഇന്ഡോര് സ്റ്റേഡിയത്തില് നടക്കുന്ന ചാമ്പ്യന്ഷിപ്പിന്റെ 76-ാം പതിപ്പില് ഇന്നലെ ആണ് വിഭാഗം ഗ്രൂപ്പ് എ മത്സരത്തില് ഉത്തര്പ്രദേശിനെ 57-54ന് കേരളം തോല്പ്പിച്ചു. ഗ്രൂപ്പ് ഘട്ടത്തില് കേരളത്തിന്റെ രണ്ടാം ജയമാണിത്. ഇഞ്ചോടിഞ്ച് പോരാട്ടം കണ്ട മത്സരത്തില് അവസാന ക്വാര്ട്ടറില് കാഴ്ച്ചവച്ച തന്ത്രപൂര്വ്വമായ കളികളിലൂടെയാണ് കേരളം വിജയം പിടിച്ചടക്കിയത്. സ്കോര്: 12-17, 13-10, 12-17, 18-13.
കേരളത്തിനായി 16 പോയിന്റ് നേടി ക്യാപ്റ്റന് മിലിന് ജോസ് മാത്യു ടോപ് സ്കോറര് ആയി. അഭിഷേക് ആര്. പ്രദീപ്(14), അദ്വൈത് എ.എസ്. (11) എന്നിവരും വിജയത്തില് നിര്ണായക പങ്ക് വഹിച്ചു.
വനിതകളുടെ ഗ്രൂപ്പ് ബി മത്സരത്തില് മഹാരാഷ്ട്രയെ 81-59 എന്ന വലിയ മാര്ജിനാണ് കേരളത്തിന്റെ തകര്പ്പന് വിജയം. കളിയിലുടനീളം ആധിപത്യം പുലര്ത്തിയ കേരള നിരയില് 17 പോയിന്റ് നേടിയ അരിത കെ. ടോപ്പ് സ്കോറര് ആയി. വൈഗ ടി. (16 പോയിന്റ്), ലിയ മരിയ (15 പോയിന്റ്) എന്നിവരും തീപ്പൊരി പ്രകടനം പുറത്തെടുത്തു. തീര്ത്ഥ പ്രവീണ്, സുഭദ്ര ജയകുമാര് എന്നിവര് 8 പോയിന്റ് വീതം നേടി ടീമിന്റെ സ്കോര് ഉയര്ത്തി. മഹാരാഷ്ട്രയ്ക്ക് വേണ്ടി ആര്യ പതാങ്കറെ 29 പോയിന്റുമായി ഒറ്റയാള് പോരാട്ടം നടത്തിയെങ്കിലും കേരളത്തിന്റെ കൂട്ടായ മുന്നേറ്റത്തിന് മുന്നില് മറുപടിയില്ലായിരുന്നു.
മറ്റ് പ്രധാന മത്സരങ്ങളില് നിലവിലെ ചാമ്പ്യന്മാരായ തമിഴ്നാടിന്റെ പുരുഷന്മാര് ദല്ഹിയെയും (54-37), വനിതകള് പഞ്ചാബിനെയും (74-36) തോല്പ്പിച്ചു. കര്ണാടക പുരുഷന്മാര് രാജസ്ഥാനെയും (87-46), ഹരിയാന വനിതകള് പഞ്ചാബിനെയും (68-63) പരാജയപ്പെടുത്തി. ഉത്തര്പ്രദേശ് വനിതകള് ഗുജറാത്തിനെ 85-69 ന് തകര്ത്തുവിട്ടു.
