കൊല്ലം: നഗരഹൃദയത്തില്‍ പ്രവര്‍ത്തിക്കുന്ന കെഎസ്ആര്‍ടിസി ഡിപ്പോ ഏത് സമയവും നിലംപൊത്താറായ അവസ്ഥയിലാണ്. യാത്രക്കാര്‍ക്കും ജീവനക്കാര്‍ക്കും ഒരുപോലെ ഭീഷണിയാകുന്ന ദ്രവിച്ച കെട്ടിടത്തിന് വര്‍ഷങ്ങളുടെ പഴക്കമുണ്ടെന്നിരിക്കെ ഇതുവരെ പുതിയ കെട്ടിട നിര്‍മാണ നടപടികള്‍ ഒന്നുംതന്നെ കാര്യക്ഷമമായി നടക്കുന്നില്ല.
താലൂക്ക് ഓഫീസ് ജങ്ഷനു സമീപം നിലവില്‍ ഗ്യാരേജ് പ്രവര്‍ത്തിക്കുന്ന സ്ഥലത്ത് പുതിയ കെട്ടിടം നിര്‍മിക്കാന്‍ പദ്ധതികള്‍ ഉണ്ടെങ്കിലും അതുവരെ എന്ത് വിശ്വസിച്ചാണ് യാത്രക്കാര്‍ നിലവിലെ ഡിപ്പോ കെട്ടിടത്തില്‍ ബസ് കാത്തുനില്‍ക്കുന്നതെന്നാണ് ഉയരുന്ന ചോദ്യം.
രണ്ടുനിലകളിലുള്ള കെട്ടിടത്തിന്റെ ജനലുകളും വാതിലുകളും പഴക്കം കാരണം പൊട്ടിയും ഇളകിയും കാലമേറെയായി. ഭിത്തികളില്‍ വിള്ളലുകള്‍ മിക്കയിടത്തും പ്രകടമാണ്. മേല്‍ക്കൂരയില്‍ കമ്പികള്‍ പലതും കോണ്‍ക്രീറ്റ് ഇളകി പുറത്തേക്ക് തള്ളിനില്‍ക്കുകയാണ്. കോണ്‍ക്രീറ്റ് ഇളകി യാത്രക്കാരുടെ തലയില്‍ വീണ സംഭവങ്ങള്‍ ഉണ്ടായിട്ടുണ്ട്. ദ്രവിച്ച മേല്‍ക്കൂരയുടെ താഴെയാണ് യാത്രക്കാരുടെ ഇരിപ്പിടം.
വേണ്ടത്ര ഇരിപ്പിടമില്ലെന്നുള്ളതാണ് മറ്റൊരു ന്യൂനത. കെട്ടിടത്തിന് പുറത്ത് പലയിടങ്ങളിലും വലിയ കുഴികളുണ്ട്. രാത്രിയില്‍ വെളിച്ചമില്ലാത്തതിനാല്‍ നിരവധി യാത്രക്കാരാണ് കുഴിയില്‍ വീഴുന്നത്. കെട്ടിടത്തിന് അകത്തും പുറത്തും സുരക്ഷിതത്വം പേരിനുപോലുമില്ല. കുറ്റിച്ചെടികള്‍ വളര്‍ന്ന കെട്ടിടത്തിന് പുറമെ പരിസരപ്രദേശവും വൃത്തിഹീനമായി കിടക്കാന്‍ തുടങ്ങിയിട്ട് വര്‍ഷങ്ങളായി. പൊട്ടിപ്പൊളിഞ്ഞ കെട്ടിട അവശിഷ്ടങ്ങളും മാലിന്യങ്ങളും തകര്‍ന്ന സ്ലാബുകളുമാണ് ചുറ്റുമുള്ളത്. വാട്ടര്‍കണക്ഷന്റെ പൈപ്പുകള്‍ പലതും പൊട്ടി ജലം പാഴാകുന്നു. ടാങ്കുകളാകട്ടെ പായല്‍ പിടിച്ച നിലയിലാണ്. പരിസരത്ത് മിക്കയിടത്തും മലിനജലം കെട്ടിനില്‍ക്കുന്നു. ഇവിടെ കൊതുകുകളും ഈച്ചകളും എലികളും പെരുകുകയാണ്. തെരുവുനായകള്‍ ഭക്ഷണ അവശിഷ്ടങ്ങളും മറ്റും കടിച്ചുകീറി പരിസരത്ത് ഉപേക്ഷിക്കുന്നു. ഇഴജന്തുക്കളുടെ ശല്യവും അടുത്തകാലത്തായി വര്‍ധിച്ചതായി ജീവനക്കാര്‍ പറയുന്നു.
കെഎസ്ആര്‍ടിസി ഗ്യാരേജും ബസ് സ്റ്റാന്‍ഡും പുതിയ സ്ഥലത്തേക്ക് മാറ്റാനുള്ള പദ്ധതിയുടെ നടപടികള്‍ പുരോഗതിയിലാണെന്നാണ് ഡിപ്പോ അധികൃതര്‍ പറയുന്നു. നിലവില്‍ താലൂക്ക് ഓഫീസ് ജങ്ഷനില്‍ കെഎസ്ആര്‍ടിസി ഡിപ്പോയുടെ പുതിയ കെട്ടിടം നിര്‍മിക്കാനുള്ള പദ്ധതിയുമായി ബന്ധപ്പെട്ട ടെന്‍ഡര്‍ നടപടികള്‍ പൂര്‍ത്തിയാകാറായെന്നാണ് ഉദ്യോഗസ്ഥര്‍ പറയുന്നത്. പൊതുമരാമത്തില്‍ നിന്ന് ഇതുമായി സംബന്ധിച്ച ടെക്‌നിക്കല്‍ റിപ്പോര്‍ട്ട് ലഭിക്കാനുണ്ട്. തെരഞ്ഞെടുപ്പ് കാലമായതിനാലാണ് കാലതാമസമെടുത്തതെന്നും ഉദ്യോഗസ്ഥര്‍ പറയുന്നു.
കെഎസ്ആര്‍ടിസിയുടെ കാന്റീന്‍ പ്രവര്‍ത്തിക്കുന്ന സ്ഥലത്ത് മൂന്നുനില കെട്ടിടം നിര്‍മിച്ച് ഓഫീസ് അവിടേക്കു മാറ്റുകയും നിലവില്‍ ഗാരേജ് പ്രവര്‍ത്തിക്കുന്ന സ്ഥലത്തേക്ക് ഡിപ്പോ മാറ്റാനുമാണ് പദ്ധതി. എട്ടുകോടി രൂപയുടെ പദ്ധതിയാണിത്. സര്‍ക്കാരിന്റെയും എംഎല്‍എയുടെയും ഫണ്ട് ഉപയോഗിച്ചാണ് പദ്ധതി നടപ്പിലാക്കുന്നത്.
