തൃശൂര്: കൊലവിളിയുമായി പാഞ്ഞെത്തിയ ആനയുടെ ആക്രമണത്തില് നിന്ന് ജീവന് തിരിച്ചുകിട്ടിയ ആശ്വാസത്തില് തൃശൂര് പെരിങ്ങാവ് സ്വദേശി സംഗീത. തൃശൂര് നഗരത്തില് ഭീതി വിതച്ച് ഇടഞ്ഞോടിയ ആനയുടെ ആക്രമണത്തില് നിന്ന് സംഗീത രക്ഷപ്പെട്ടത് ഭാഗ്യം കൊണ്ട് മാത്രം. രാവിലെ ഒമ്പതരയോടെ കാറില് ജോലിക്ക് പോകാന് ഇറങ്ങിയതായിരുന്നു സംഗീത.
പെട്ടെന്നാണ് കുറച്ചു പേര് ഓടിവരുന്നത് കണ്ടത്. ആന വരുന്നുണ്ട്, കാര് റിവേഴ്സ് എടുക്കൂ എന്നവര് വിളിച്ചു പറയുന്നുണ്ടായിരുന്നു. എന്നാല് സംഗീതയുടെ തൊട്ടുപിന്നില് മകള് സ്കൂട്ടറില് യാത്ര ചെയ്യുന്നുണ്ടായിരുന്നു. മറ്റു വാഹനങ്ങളും തൊട്ടടുത്ത് എത്തിയതോടെ കാര് അനക്കാനാകാത്ത നിലയിലായി. ഇതിനിടെ ആന പാഞ്ഞ് അടുത്തെത്തി. മരണം ഉറപ്പെന്ന് കരുതി സംഗീത കണ്ണുകള് പൂട്ടി. പാഞ്ഞെത്തിയ ആന കാര് രണ്ടുമൂന്നു വട്ടം കൊമ്പില് തൂക്കി ഉയര്ത്തിയശേഷം നിലത്തുവച്ചു. പിന്നെ ആഞ്ഞു കുത്തി. കാറിന്റെ ഡോര് തുളച്ച് കൊമ്പ് അകത്തേക്ക്.
ഇതിനിടയില് ആളുകളുടെ ബഹളം കേട്ട് ആന ഒരുനിമിഷം പിന്തിരിഞ്ഞു. ആ സമയംകൊണ്ട് ആളുകള് സംഗീതയെ മറുവശത്തെ ഡോര് വഴി വലിച്ച് പുറത്തെടുത്തു. ഒരു നിമിഷം കഴിഞ്ഞില്ല, ആന വീണ്ടും കാറിന് നേര്ക്ക് പാഞ്ഞെത്തി. കാര് ഏതാണ്ട് പൂര്ണമായും തകര്ത്തു.
ഇന്നലെ രാവിലെയാണ് തൃശൂര് പെരിങ്ങാവില് ജനവാസ കേന്ദ്രത്തില് നാടിനെ നടുക്കി ആന ഇടഞ്ഞോടിയത്. കൊല്ലം സ്വദേശിയുടെ ശിവംലക്ഷ്മി അയ്യപ്പന് എന്ന കൊമ്പനാണ് ഇടഞ്ഞത്. തൃശൂരില് ഫോട്ടോഷൂട്ടിന് എത്തിച്ചതായിരുന്നു ആനയെ. വടക്കുന്നാഥ ക്ഷേത്ര പരിസരത്തുനിന്ന് ഇടഞ്ഞ ആന ഏതാണ്ട് ഒരു കിലോമീറ്റര് ഓടി പെരിങ്ങാവിലെത്തി. ഇതിനിടെ ഒരു ഓട്ടോറിക്ഷയും നിരവധി ബൈക്കുകളും ഒട്ടേറെ വീടുകളുടെ മതിലുകളും തകര്ത്തു. ഒരു മണിക്കൂറിനുശേഷം പാപ്പാന്മാര് ആനയെ തളച്ചു. പിന്നീട് ലോറിയില് കയറ്റി കൊണ്ടുപോയി.
