ബെംഗളൂരു: മഡിവാളയിൽ മലയാളി പെൺകുട്ടിയെ ബലാത്സംഗം ചെയ്ത കേസിലെ ഒന്നാംപ്രതിയെ കർണാടക പോലീസ് അറസ്റ്റ് ചെയ്തു. വയനാട് സുൽത്താൻ ബത്തേരി സ്വദേശിയായ ഹൈനസിനെ വയനാട്ടിൽ വെച്ച് പിടികൂടി ബെംഗളൂരുവിലെത്തിച്ചെന്നാണ് സൂചന. വെള്ളിയാഴ്ച വൈകീട്ടോടെ അറസ്റ്റിലായ ഇയാളെ വൈദ്യപരിശോധനയ്ക്ക് വിധേയമാക്കിയ ശേഷം ട്രാൻസിറ്റ് വാറന്റ് മുഖേന ബെംഗളൂരുവിലെത്തിക്കുകയായിരുന്നു. നിലവിൽ ജുഡീഷ്യൽ കസ്റ്റഡിയിലുള്ള പ്രതിയെ തുടർനടപടികൾ പൂർത്തിയാക്കിയ ശേഷം കോടതിയിൽ ഹാജരാക്കും.
മേയ് 12-നാണ് കേസിനാസ്പദമായ സംഭവം നടന്നത്. ബെംഗളൂരുവിൽ പഠിക്കുന്ന 20-കാരിയായ മലയാളി പെൺകുട്ടി സുഹൃത്തുക്കളുടെ കഫേയിൽ പാർട്ട് ടൈം ജോലിയും ചെയ്തിരുന്നു. സംഭവദിവസം സുഖമില്ലാതിരുന്ന പെൺകുട്ടി കഫേയ്ക്ക് സമീപത്തെ താമസസ്ഥലത്ത് വിശ്രമിക്കുകയായിരുന്നു. ഈ സമയത്ത് സുഹൃത്തുക്കൾ പുറത്തുപോയ തക്കം നോക്കി മുറിയിൽ അതിക്രമിച്ചു കയറിയ ഹൈനസ് പെൺകുട്ടിയെ പീഡിപ്പിക്കുകയായിരുന്നുവെന്നാണ് പരാതി. പെൺകുട്ടിയുടെ സുഹൃത്തുക്കൾ മഡിവാളയിൽ തുടങ്ങിയ കഫേയ്ക്ക് സ്ഥലം കണ്ടെത്തി നൽകിയതും മറ്റ് ബിസിനസ് സഹായങ്ങൾ ചെയ്തതും ഹൈനസ് ആയിരുന്നു. കഫേ നഷ്ടത്തിലായപ്പോൾ ഇത് വിൽക്കുന്നതുമായി ബന്ധപ്പെട്ട കാര്യങ്ങൾ സംസാരിക്കാനാണ് ഇയാൾ അന്ന് താമസസ്ഥലത്ത് എത്തിയത്.
അതേസമയം, സംഭവത്തിൽ മഡിവാള പോലീസിന്റെ ഭാഗത്തുനിന്നുണ്ടായ ഗുരുതര വീഴ്ചയും വലിയ ചർച്ചയായിട്ടുണ്ട്. പീഡനം നടന്നതിന്റെ തൊട്ടടുത്ത ദിവസം തന്നെ പെൺകുട്ടി പരാതിയുമായി സ്റ്റേഷനിലെത്തിയെങ്കിലും കേസെടുക്കാൻ പോലീസ് തയ്യാറായില്ല. പരാതി നൽകരുതെന്ന് ആവശ്യപ്പെട്ട് പോലീസ് ഉദ്യോഗസ്ഥർ തങ്ങളെ അപമാനിച്ചതായും പെൺകുട്ടി ആരോപിച്ചു. തുടർന്ന് മേയ് 18-ന് പെൺകുട്ടിയും സുഹൃത്തുക്കളും ബെംഗളൂരു നോർത്ത് ഈസ്റ്റ് ഡിസിപിയെ നേരിട്ട് കണ്ട് പരാതിപ്പെടുകയായിരുന്നു. തുടർന്ന് ഡിസിപിയുടെ കർശന നിർദേശപ്രകാരമാണ് സംഭവത്തിൽ എഫ്ഐആർ രജിസ്റ്റർ ചെയ്തതും പ്രതിയെ വലയിലാക്കിയതും.
