ന്യൂഡൽഹി: ചീഫ് ജസ്റ്റിസ് സൂര്യകാന്തിന്റെ പരാമർശങ്ങൾക്ക് പിന്നാലെ സോഷ്യൽ മീഡിയയിൽ വൈറലായി മാറിയ ‘കോക്രോച്ച് ജനതാ പാർട്ടി’ എന്ന ഐഡിയുടെ എക്സ് അക്കൗണ്ട് നിരോധിച്ചിരുന്നു. ഇന്റലിജൻസ് ബ്യൂറോയുടെ രഹസ്യ വിവരത്തിന്റെ അടിസ്ഥാനത്തിൽ, രാജ്യത്തിന്റെ പരമാധികാരത്തിനും ദേശീയ സുരക്ഷയ്ക്കും ഭീഷണിയാണെന്ന് ചൂണ്ടിക്കാണിച്ചാണ് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം അക്കൗണ്ട് ഇന്ത്യയിൽ റദ്ദാക്കാൻ നിർദ്ദേശം നൽകിയത് .
ഐടി ആക്ട് 2000-ലെ സെക്ഷൻ 69 (എ) പ്രകാരമാണ് ഈ അടിയന്തര നടപടി.അക്കൗണ്ട് പൂട്ടിച്ച് മണിക്കൂറുകൾക്കകം ‘കോക്രോച്ച് ഈസ് ബാക്ക്’ എന്ന പേരിൽ പുതിയ അക്കൗണ്ടുമായി ഇതിന്റെ സ്ഥാപകൻ അഭിജീത് ദിപ്കെ രംഗത്തെത്തിയിട്ടുണ്ട്. 30-കാരനായ അഭിജീത് മഹാരാഷ്ട്ര സ്വദേശിയാണെങ്കിലും ഇപ്പോൾ ബോസ്റ്റണിലാണുള്ളത്.
