തിരുവനന്തപുരം: ഫിഷറീസ് വകുപ്പ് സിപി ജോണിനോ ഷിബു ബേബി ജോണിനോ നല്കണമെന്ന് ലത്തീന് സഭ. തീരദേശ മേഖലയിലെ പ്രശ്നങ്ങള് അറിയുന്ന ആള് ആകണം ഫിഷറീസ് മന്ത്രി എന്ന് കഴിഞ്ഞ ദിവസവും ലത്തീന് സഭ ആവശ്യപ്പെട്ടിരുന്നു.
മന്ത്രിസഭയില് ലത്തീന് സഭയ്ക്ക് മതിയായ പ്രാതിനിധ്യം ലഭിക്കാത്തതില് പ്രതിഷേധിച്ച് സഭ സത്യപ്രതിജ്ഞ ചടങ്ങില് പങ്കെടുത്തില്ല. തുടര്ന്ന് മുഖ്യമന്ത്രി വി ഡി സതീശന് ലത്തീന് അതിരൂപത ആര്ച്ച് ബിഷപ്പ് തോമസ് ജെ നെറ്റോയെ വെള്ളയമ്പലത്തെ ബിഷപ്പ് ഹൗസില് സന്ദര്ശിച്ചിരുന്നു.
മത്സ്യ മേഖലയെ പ്രതിനിധീകരിക്കുന്ന ഒരാള് മന്ത്രിസഭയില് ഉണ്ടാകണമെന്ന ആവശ്യം നേതാക്കളെ അറിയിച്ചിരുന്നുവെന്നു സഭാ പ്രതിനിധി യുജിന് പെരേര വ്യക്തമാക്കി. തീരദേശ മേഖലയ്ക്ക് വേണ്ടത്ര പരിഗണന ലഭിക്കുന്നില്ലെന്ന ആശങ്കയാണ് സഭ പങ്കുവയ്ക്കുന്നതെന്ന് അദ്ദേഹം പറഞ്ഞു.
പല മന്ത്രിമാര്ക്കും കടല് എന്താണെന്നും കടലിന്റെ ഒഴുക്ക് എന്താണെന്നും അറിയില്ല. അത്തരം വിഷയങ്ങള് മനസിലാക്കുന്ന ഒരാളാണ് ആ വകുപ്പ് കൈകാര്യം ചെയ്യേണ്ടത് എന്നും യുജിന് പെരേര പറഞ്ഞു. മന്ത്രിസഭാ രൂപീകരണവുമായി ബന്ധപ്പെട്ട് നിരവധി അന്തര്നാടകങ്ങള് നടന്നുവെന്നും, അതില് ലത്തീന് സഭയുടെ ആവശ്യങ്ങള് നടക്കാതെ പോയെന്നും അദ്ദേഹം ആരോപിച്ചു.
