ധര്മശാല: പഞ്ചാബ് കിങ്സിനെ 23 റണ്സിന് തോല്പ്പിച്ച് റോയല് ചലഞ്ചേഴ്സ് ബെംഗളൂരു 19-ാം സീസണ് ഐപിഎല് പ്ലേ ഓഫിലെത്തുന്ന ആദ്യ ടീമായി. ഇന്നലെ ആദ്യ മത്സരത്തില് ആദ്യം ബാറ്റ് ചെയ്ത ആര്സിബി 20 ഓവറില് നാല് വിക്കറ്റ് നഷ്ടത്തില് 222 റണ്സെടുത്തു. ഇതിനെതിരെ ബാറ്റ് ചെയ്ത പഞ്ചാബിന് 20 ഓവറില് എട്ട് വിക്കറ്റ് നഷ്ടത്തില് 199 റണ്സെടുക്കാനേ സാധിച്ചുള്ളൂ.
ജയത്തോടെ 13 മത്സരങ്ങളില് നിന്ന് ഒമ്പത് ജയത്തിലൂടെ ലഭിച്ച 18 പോയിന്റുമായാണ് ആര്സിബി പ്ലേ ഓഫ് ബെര്ത്ത് ഉറപ്പിച്ചത്. പരാജയപ്പെട്ട പഞ്ചാബ് കിങ്സിന് ജയിച്ചിരുന്നെങ്കില് മൂന്നാം സ്ഥാനത്തേക്ക് മുന്നേറാനാകുമായിരുന്നു.
ആര്സിബി ഇന്നിങ്സിന്റെ ഒരു ഘട്ടത്തില് ക്രീസിലേക്കെത്തിയ വെങ്കിടേഷ് അയ്യരുടെ തകര്പ്പന് പ്രകടനമാണ് ബെംഗളൂരുവിന് കരുത്തായത്. 40 പന്തുകള് നേരിട്ട അയ്യര് എട്ട് ബൗണ്ടറികളും നാല് സിക്സറും സഹിതം 73 റണ്സെടുത്ത് പുറത്താകാതെ നിന്നു.
ടോസ് നഷ്ടപ്പെട്ട് ബാറ്റിങ് ആരംഭിച്ച ആര്സിബിക്കുവേണ്ടി വിരാട് കോഹ്ലി(58) അര്ദ്ധ സെഞ്ചുറി പ്രകടനത്തോടെ മികച്ച തുടക്കമാണ് നല്കിയത്. ദേവദത്ത് പടിക്കലും(45) കാര്യമായ സംഭാവന നല്കി. അവസാന ഓവറുകളില് ടിം ഡേവിഡും(28) വെടിക്കെട്ട് പ്രകടനം പുറത്തെടുത്തു. പഞ്ചാബ് കിങ്സിന് വേണ്ടി ഹര്പ്രീത് ബ്രാര് രണ്ട് വിക്കറ്റെടുത്തു.
മറുപടി ബാറ്റിങ്ങില് പഞ്ചാബ് പ്രതീക്ഷകള് തകര്ത്തത് ഭുവനേശ്വര് കുമാറും രാസിഖ് സലാം ദാറും ചേര്ന്നാണ്. ഭുവി രണ്ട് ഓപ്പണര്മാരെ പുറത്താക്കിയപ്പോള് രാസിഖ് മൂന്ന് വിക്കറ്റുകള് കൂടി വീഴ്ത്തി. പൊരതിനോക്കിയ പഞ്ചാബ് കിങ്സിനായി ശശാങ്ക് സിങ്(56) അര്ദ്ധ സെഞ്ചുറി പ്രകടനം പുറത്തെടുത്തു. കൂപ്പര് കോണോല്ലി(37), സൂര്യാന്ഷ് ഷെഡ്ജെ(35), മാര്കസ് സ്റ്റോയിനിസ്(37) എന്നിവര് ആര്സിബിക്കായി നന്നായി പന്തെറിഞ്ഞു.
