കൊൽക്കത്ത: തൃണമൂൽ കോൺഗ്രസ് (TMC) ജനറൽ സെക്രട്ടറിയും എംപിയുമായ അഭിഷേക് ബാനർജിക്കെതിരെ എഫ്ഐആർ. 2026 ലെ തെരഞ്ഞെടുപ്പ് പ്രചാരണത്തിനിടെ ആഭ്യന്തര മന്ത്രി അമിത്ഷായ്ക്കെതിരെ പ്രകോപനപരമായ ഭീഷണി മുഴക്കിയതിനും കലാപാഹ്വാനം നടത്തിയതിനുമാണ് മമതാ ബാനർജിയുടെ അനന്തിരവനായ അഭിഷേക് ബാനർജിക്കെതിരെ കേസെടുത്തത്.ഏപ്രിൽ 27-നും മെയ് 3-നും ഇടയിൽ നടന്ന വിവിധ പ്രചാരണ പരിപാടികളിൽ അഭിഷേക് ബാനർജി പരസ്യമായി വിദ്വേഷ പ്രസംഗങ്ങൾ നടത്തിയെന്നാണ് പരാതിയിലെ പ്രധാന ആരോപണം.
അഭിഷേക് ബാനർജിയുടെ പ്രസംഗങ്ങൾ ജനങ്ങൾക്കിടയിൽ ശത്രുത വളർത്തുന്നതാണെന്നും പൊതുസമാധാനം തകർക്കാൻ ലക്ഷ്യമിട്ടുള്ളതാണെന്നും പരാതിക്കാരൻ ആരോപിക്കുന്നു. കേന്ദ്ര ആഭ്യന്തര മന്ത്രി അമിത് ഷായ്ക്കെതിരെ പ്രസംഗങ്ങളിൽ നേരിട്ട് ഭീഷണി മുഴക്കിയതായും രാജീവ് സർക്കാർ നൽകിയ പരാതിയിലുണ്ട്. ഇതിന് തെളിവായി പ്രസംഗങ്ങളുടെ ലിങ്കുകളും അദ്ദേഹം പോലീസിന് കൈമാറിയിരുന്നു.
തുടർന്ന് മെയ് 15-ന് ഉച്ചയ്ക്ക് 2.45-ഓടെയാണ് ബിധാനഗർ സൈബർ ക്രൈം പോലീസ് കേസിൽ എഫ്ഐആർ രജിസ്റ്റർ ചെയ്തത്. ഭാരതീയ ന്യായ സംഹിതയുടെ (BNS) വകുപ്പുകളായ 192, 196, 351(2), 353(1)(c) എന്നിവയ്ക്കൊപ്പം ജനപ്രാതിനിധ്യ നിയമത്തിലെ 123(2), 125 എന്നീ വകുപ്പുകൾ കൂടിയാണ് ബാനർജിക്കെതിരെ ചുമത്തിയിരിക്കുന്നത്.
