തിരുവനന്തപുരം: മുഖ്യമന്ത്രിയുടെ യാത്രാസുരക്ഷയിലെ ശൈലി മാറുമെന്ന് വി ഡി സതീശന്‍. ജനങ്ങളെ ബുദ്ധിമുട്ടിക്കുന്ന വാഹന വ്യൂഹവും സുക്ഷാക്രമീകരണങ്ങളും ആവശ്യമില്ലെന്ന് വി ഡി സതീശന്‍ അറിയിച്ചു.
പൈലറ്റും എസ്‌കോര്‍ട്ടും ഒഴികെ മറ്റ് വാഹനങ്ങള്‍ വേണ്ടെന്ന നിലപാടിലാണ് നിയുക്ത മുഖ്യമന്ത്രി. യാത്ര പോകുമ്പോള്‍ ജനങ്ങളെ ബുദ്ധിമുട്ടിക്കരുതെന്നും റോഡ് ബ്ലോക്ക് ചെയ്യരുതെന്നും ഉന്നത പൊലീസ് ഉദ്യോഗസ്ഥര്‍ക്ക് നിയുക്ത മുഖ്യമന്ത്രി നിര്‍ദേശം നല്കി. എസ്‌കോര്‍ട്ടും ഒഴിവാക്കണമെന്ന് ആവശ്യപ്പെട്ടെങ്കിലും സുരക്ഷാ കാരണങ്ങളാല്‍ അത് വേണ്ടെന്ന് വയ്‌ക്കാന്‍ പറ്റില്ലെന്ന് പൊലീസ് അറിയിച്ചു.
കിഫ് ഹൗസില്‍ നിന്ന് സെക്രട്ടേറിയറ്റിലെ നോര്‍ത്ത് ബ്ലോക്കിലേക്കുള്ള മൂന്നര കിലോ മീറ്റര്‍ പിണറായിയുടെ യാത്ര വന്‍ സുരക്ഷയിലായിരുന്നു. കോണ്‍വോയ് കടന്ന് പോകുമ്പോള്‍ ഏര്‍പ്പെടുത്തുന്ന സുരക്ഷാ ക്രമീകരണങ്ങളും ഗതാഗത നിയന്ത്രണവും ജനങ്ങളെ വലയ്‌ക്കുന്നെന്ന് പരാതിയുണ്ടായിരുന്നു.
നിയുക്ത മുഖ്യമന്ത്രിയുടെ നിര്‍ദ്ദേശത്തിന് പിന്നാലെ ജനങ്ങളെ ബുദ്ധിമുട്ടിപ്പിക്കാതെയുള്ള പുതിയ സുരക്ഷ ക്രമീകരണങ്ങളൊരുക്കാന്‍ എല്ലാ ജില്ലാ പൊലീസ് മേധാവിമാര്‍ക്കും നിര്‍ദ്ദേശം നല്കി.
പൈലറ്റ് വാഹനവും ഡിവൈഎസ്പിയുടെ വാഹനവും രണ്ട് എസ്‌കോര്‍ട്ടും മാത്രമാകണം പുതിയ മുഖ്യമന്ത്രിയുടെ വാഹന വ്യൂഹം. നേതാക്കളുടെതടക്കം മറ്റ് വാഹനങ്ങള്‍ വിഐപി ക്രമീകരണത്തിന് പുറത്തുമാത്രം. സുരക്ഷ ഉദ്യോഗസ്ഥര്‍ ജനങ്ങളോട് മാന്യമായി പെരുമാറണമെന്നും നിര്‍ദ്ദേശം നല്കി.
