കൊച്ചി: ശബരിമല മില്മ നെയ് തട്ടിപ്പ് അന്വേഷിക്കാനുള്ള സംഘത്തിന്റെ തലവനായി എസ്പി എം ജെ സോജനെ നിയോഗിച്ചു. വിജിലന്സ് മേധാവി കൈമാറിയ പട്ടികയില് നിന്നാണ് ഹൈക്കോടതി സോജനെ തീരുമാനിച്ചത്. ഡിവൈഎസ്പി സി എസ് ഹരിയാണ് മുഖ്യഅന്വേഷണ ഉദ്യോഗസ്ഥന്. വിജിലന്സ് ഇന്സ്പെക്ടര്മാരായ എ എസ് സജി ശങ്കര്, എസ് ശ്രീജിത്ത്, ടി ആര് കിരണ്, ആര് എസ് രതീന്ദ്രകുമാര് എന്നിവരാണ് അന്വേഷണ സംഘത്തിലുള്ള മറ്റുള്ളവര്. വാളയാറില് പ്രായപൂര്ത്തിയാകാത്ത സഹോദരിമാര് ദുരൂഹ സാഹചര്യത്തില് മരിച്ച കേസിലെ അന്വേഷണ ഉദ്യോഗസ്ഥനായിരുന്നു സോജന്.
ശബരിമലയിലെ മില്മ നെയ് ക്രമക്കേട് പ്രഥമദൃഷ്ട്യാ ഗൗരവതരമെന്നായിരുന്നു ഹൈക്കോടതി ദേവസ്വം ബെഞ്ചിന്റെ വിലയിരുത്തല്. ഇതിനായി വിജിലന്സ് ഡയറക്ടര് പ്രത്യേക സംഘത്തെ നിയോഗിക്കണമെന്ന് കഴിഞ്ഞ ദിവസം നിര്ദേശിക്കുകയും ചെയ്തു. ക്രമക്കേട് അന്വേഷിക്കാന് മികച്ച ഉദ്യോഗസ്ഥര് വേണമെന്ന് ദേവസ്വം ബെഞ്ച് ആവശ്യപ്പെട്ടതനുസരിച്ച് എസ്പിമാരായ ജുവനപ്പുടി മഹേഷ്, എം.ജെ സോജന്, ആര് ബിനു എന്നിവരുടെ പേരുകള് സര്ക്കാര് കോടതിക്ക് കൈമാറിയിരുന്നു. ഇവരില് നിന്നായിരുന്നു സോജനെ നിശ്ചയിച്ചത്. അന്വേഷണം ഒരുമാസത്തിനുള്ളില് പൂര്ത്തിയാക്കണം. അന്വേഷണവിവരങ്ങള് പുറത്ത് വിടരുത്. അന്തിമ റിപ്പോര്ട്ട് കോടതി അനുമതിയോടെയേ സമര്പ്പിക്കാവൂ എന്നീ നിര്ദേശങ്ങളും കോടതി മുന്നോട്ടുവച്ചു.
