പാലക്കാട്: സിഐഡി മൂസ എന്ന ധീരസാഹസികന്റെ സ്രഷ്ടാവും നിരവധി ചിത്രകലകളുടെ രചയിതാവുമായ പി. വിശ്വനാഥന് എന്ന കണ്ണാടി വിശ്വനാഥന് (93) കണ്ണാടി പ്രഭാമന്ദിരത്തില് അന്തരിച്ചു. ഭാര്യ: പെരുവെമ്പ് എംബനത്ത് വീട്ടില് ശാരദാമ്മ. മക്കള്: രേണുക, ശോഭ. മരുമക്കള്: അരവിന്ദന്, ഹരിപ്രസാദ്. സംസ്കാരം ഇന്ന് രാവിലെ 10ന് പാലക്കാട് ചന്ദ്രനഗര് വൈദ്യുതി ശ്മശാനത്തില്.
ഏറെ പ്രശസ്തമായ ഇരുമ്പുകൈ മായാവി, സര്പ്പദ്വീപ്, മഞ്ഞുകട്ട രഹസ്യം എന്നിവ ഉള്പ്പെടെ 130 ഓളം ചിത്രകഥകള് പ്രസിദ്ധീകരിച്ചിട്ടുണ്ട്. ഒരുകാലത്ത് യുവതലമുറയുടെ ഹരമായിരുന്ന ഡിറ്റക്ടീവ് ചിത്രകഥകളായിരുന്നു ഇവയിലേറെയും. സിഐഡി മൂസയായിരുന്നു പ്രധാന നായകന്. സിഐഡി മഹേഷ്, സിഐഡി മൈക്കിള്, റിവോള്വര് റിങ്കോ എന്നിവരും ഏറെ ശ്രദ്ധേയമായ കഥാപാത്രങ്ങളായിരുന്നു. നിയോകോമിക്സ് എന്ന പേരിലാണ് ചിത്രകഥകള് പുറത്തിറക്കിയിരുന്നത്. ഓരോ പുസ്തകവും പതിനായിരക്കണക്കിന് കോപ്പികളാണ് വിറ്റഴിച്ചത്. ഒരു രൂപയായിരുന്നു പുസ്തകത്തിന്റെ വില. കണ്ണാടി വിശ്വനാഥനാന്റെ ‘ടമാാര്’, ‘പഠാാര്’എന്നീ രണ്ടുവാക്കുകള് ഏറെ പ്രശസ്തമാണ്.
