പാലക്കാട്: സിനിമാ താരവും മുൻ എംഎൽഎയുമായ മുകേഷ് കൊടുങ്ങല്ലൂർ ശ്രീ കുരുംബ ക്ഷേത്രത്തിൽ ദർശനം നടത്തി. ഇന്നലെ വൈകിട്ടാണ് മുകേഷ് ക്ഷേത്രത്തിലെത്തിയത്. മനമുരുകി പ്രാർത്ഥിക്കുന്ന മുകേഷിന്റെ വീഡിയോ സമൂഹമാധ്യമങ്ങളിൽ വൈറലാണ്. രക്ത പുഷ്പാഞ്ജലി, ഗുരുതി പുഷ്പാഞ്ജലി എന്നീ പൂജകൾ ചെയ്ത മുകേഷ് ക്ഷേത്ര ദർശനത്തിന് ശേഷം വൈകാതെ മടങ്ങി. അതേസമയം ഈ സംഭവം സിപിഎം നേതൃത്വത്തെ ആശയക്കുഴപ്പത്തിലാക്കുകയാണ്.
കഴിഞ്ഞ ദിവസമായിരുന്നു പി ജയരാജൻ കൊടുങ്ങല്ലൂർ അമ്പലത്തിൽ ദർശനം നടത്തിയത് സോഷ്യൽ മീഡിയയിൽ വൻ ചർച്ചയായത്. സംഭവം വിവാദമാകുകയും ചെയ്തിരുന്നു. ഇതിനു പിന്നാലെ ജയരാജൻ വിശദീകരണവുമായി എത്തിയിരുന്നു. കമ്യൂണിസ്റ്റുകാർക്ക് ആരാധനാലയ സന്ദർശനം നിഷിദ്ധമാണ് എന്നത് തെറ്റിദ്ധാരണയാണെന്ന് ഫെയ്സ്ബുക്കിൽ കുറിച്ചു. കൊടുങ്ങല്ലൂർ കാവിൽ പോയതുകൊണ്ട് ഭക്തനായിമാറിയെന്നോ ആരാധനാലയങ്ങളെ മാറ്റിനിർത്തിയാലേ ഈ നാടിന്റെ സാമൂഹികചരിത്രം പഠിക്കാൻ കഴിയൂ എന്നോ ആരെങ്കിലും പ്രചരിപ്പിക്കാൻ ശ്രമിക്കുന്നുവെങ്കിൽ അവരോട് സഹതാപമേ ഉള്ളുവെന്നും ജയരാജൻ വാദിച്ചിരുന്നു.
അതേസമയം, പിണറായി വിജയൻറെ മകൻ ഗുരുവായൂർ ക്ഷേത്ര ദർശനം നടത്തിയതും വാർത്തയായിരുന്നു. തങ്ങൾ നിരീശ്വര വാദികൾ ആണെന്ന് പറയുമ്പോഴും ക്രിസ്ത്യൻ, മുസ്ലിം കമ്മ്യൂണിസ്റ്റ് നേതാക്കളും പ്രവർത്തകരും അവരവരുടെ വിശ്വാസത്തെ തള്ളിപ്പറഞ്ഞിട്ടില്ല. എന്നാൽ ഹിന്ദു നേതാക്കൾ ക്ഷേത്രത്തിൽ പോകുന്നതിനെതിരെയും ഹിന്ദുത്വത്തിനെതിരെയും സനാതനത്തിനെതിരെയും ഘോരഘോരം പ്രസംഗിക്കുന്നവരും ഹിന്ദുക്കളെ അവഹേളിക്കുന്നവരുമാണ്.
