ചോദ്യപേപ്പര് ചോര്ന്നതായി കണ്ടെത്തിയതിനെ തുടര്ന്ന് 22 ലക്ഷം വിദ്യാര്ഥികള് എഴുതിയ നീറ്റ്-യുജി പരീക്ഷ റദ്ദാക്കുകയും, പുനഃപരീക്ഷ നടത്താന് തീരുമാനിക്കുകയും ചെയ്തിരിക്കുകയാണ്. സാധ്യതാ ചോദ്യപേപ്പറിലെ പല ചോദ്യങ്ങളും യഥാര്ത്ഥ പരീക്ഷയിലും ഉള്പ്പെട്ടതായി കണ്ടെത്തിയതോടെ കേന്ദ്രസര്ക്കാര് സിബിഐ അന്വേഷണത്തിന് ഉത്തരവിട്ടിരിക്കുകയാണ്. സാധ്യതാ ചോദ്യപേപ്പര് ചോര്ന്നതും പ്രചരിച്ചതും എങ്ങനെയെന്നും, ഇതില് വ്യക്തികള്ക്കോ സംഘങ്ങള്ക്കോ പങ്കുണ്ടോയെന്നതും അന്വേഷിച്ച് കണ്ടെത്തി ശക്തമായ നടപടികളെടുക്കാനാണ് കേന്ദ്ര സര്ക്കാരിന്റെ തീരുമാനം. കുറ്റവാളികളായി കണ്ടെത്തുന്നവരെ കര്ശനമായി ശിക്ഷിക്കണം. വിദ്യാര്ത്ഥികള് വീണ്ടും അപേക്ഷിക്കാതെ പുതിയ പരീക്ഷാ തീയതി ഉടന് പ്രഖ്യാപിക്കാനും, പരീക്ഷാ കേന്ദ്രങ്ങള് മാറാതെ പുതിയ അഡ്മിറ്റ് കാര്ഡുകള് നല്കാനുമുള്ള തീരുമാനങ്ങള് സ്വാഗതാര്ഹമാണ്.
ഇത് ആദ്യമായല്ല പ്രവേശന പരീക്ഷയുടെ ചോദ്യപേപ്പറുകള് ചോരുന്നത്. അപ്പോഴൊക്കെ പരീക്ഷകള് റദ്ദാക്കുകയും ചെയ്തിട്ടുണ്ട്. സംവിധാനത്തിന്റെ വിശ്വാസ്യത നിലനിര്ത്താനും, കഷ്ടപ്പെട്ട് പഠിച്ച് പരീക്ഷ എഴുതിയ വിദ്യാര്ത്ഥികള് വഞ്ചിക്കപ്പെടാതിരിക്കാനും ഇതല്ലാതെ മറ്റൊരു മാര്ഗം അധികൃതര്ക്ക് മുന്നിലില്ല. പക്ഷേ വിശ്വാസ്യത നിലനിര്ത്തി എങ്ങനെ പ്രവേശന പരീക്ഷകള് നടത്താമെന്നും, ചോദ്യപേപ്പര് ചോരുന്ന സാഹചര്യം ഒഴിവാക്കാനുള്ള വഴികള് എന്തൊക്കെയെന്നും അധികൃതര് ആലോചിക്കേണ്ടതുണ്ട്.
സംസ്ഥാന-ദേശീയ തലത്തിലുള്ള പരീക്ഷാ സംവിധാനങ്ങള് കാര്യക്ഷമമായി പ്രവര്ത്തിക്കേണ്ടതാണ്. വിദ്യാര്ത്ഥികളുടെ ഭാവിജീവിതത്തിന്റെ ദിശ അവയെ ആശ്രയിച്ചിരിക്കുന്നു. അതിനാല് അവ ശ്രദ്ധാപൂര്വം രൂപകല്പ്പന ചെയ്യപ്പെടണം. സംവിധാനങ്ങളില് കൃത്രിമം കാണിക്കാനാവാത്തതുമായിരിക്കണം. സാങ്കേതികവിദ്യയുടെ സഹായം സൂക്ഷ്മമായി ഉപയോഗിച്ചാല് ഇത്തരം സാഹചര്യങ്ങളില് നല്ല ഫലം പ്രതീക്ഷിക്കാം.
കഴിഞ്ഞ ഏതാനും ദശാബ്ദങ്ങളില് സാങ്കേതികവിദ്യ അതിവേഗത്തില് വികസിച്ചു. അതിന്റെ സ്വാധീനം എല്ലാ മേഖലകളിലും കാണാം. എല്ലാ തലങ്ങളിലുമുള്ള പരീക്ഷാ സംവിധാനങ്ങളും സാങ്കേതികവിദ്യയെ വളരെ അനുകൂലമായ രീതിയില് ഉപയോഗിക്കുന്നു. സ്കൂളുകള് പോലും ആഭ്യന്തര പരീക്ഷകള് നടത്തുമ്പോള് ഇത് സ്വീകരിക്കുന്നു. കൊറോണ കാലഘട്ടത്തിനു ശേഷം ഓണ്ലൈന് പരീക്ഷകള് സാധാരണ രീതിയായി മാറുകയുണ്ടായി. ഏകദേശം എല്ലാ സ്കൂളുകള്ക്കും നല്ല കമ്പ്യൂട്ടര് ലാബുകളുണ്ട്.
എഴുത്തുപരീക്ഷകള്ക്കും ഈ സംവിധാനം പിന്തുടരാം. സീറ്റ് നമ്പറില് വിദ്യാര്ത്ഥിയുടെ വിവരങ്ങളും ലഭിക്കുന്ന ചോദ്യപേപ്പര് സെറ്റിന്റെ വിവരങ്ങളും ഉള്ക്കൊള്ളിക്കാം. എല്ലാ തരത്തിലുള്ള ചോദ്യങ്ങളും ഉള്ക്കൊള്ളുന്ന വിവിധ ചോദ്യശേഖരങ്ങള് തയ്യാറാക്കാം.
ഓരോ വിഷയത്തിനും പ്രത്യേകം ചോദ്യശേഖരങ്ങളാവാം. പല വിഭാഗങ്ങളായും ചോദ്യങ്ങള് തയ്യാറാക്കാം.
ആധുനിക സാങ്കേതികവിദ്യ ഉപയോഗിക്കുകയെന്നതാണ് പ്രവേശന പരീക്ഷകള് വിശ്വാസ്യതയോടെ നടത്താനുള്ള മാര്ഗം. ജെഇഇ പോലുള്ള പരീക്ഷകള് ഇങ്ങനെയാണല്ലോ നടത്തുന്നത്. നീറ്റ് പരീക്ഷയ്ക്കും ഈ രീതി അനുവര്ത്തിക്കാം.
വിദ്യാര്ത്ഥികള് ഇതിനോടകം സാങ്കേതികവിദ്യയോട് നന്നായി പൊരുത്തപ്പെട്ടവരാണ്. അധ്യാപകരെക്കാള് ഇക്കാര്യത്തില് ഒരുപടി മുന്നിലാണ് അവര്. ഏറ്റവും പുതിയ സാങ്കേതികവിദ്യകളെക്കുറിച്ചും വിദ്യാര്ത്ഥികള്ക്ക് നല്ല അറിവുണ്ട്. ചെറിയ തോതിലുള്ള പരീക്ഷകളില് ആരംഭിച്ച് സുഗമമായ പ്രവര്ത്തനവും വിജയവും ഉറപ്പാക്കിയ ശേഷം, ഏത് തലത്തിലുള്ള പരീക്ഷകള്ക്കും ഇത് സ്വീകരിക്കാവുന്നതാണ്.
വിദ്യാര്ത്ഥികള്ക്ക് സ്വന്തം കഴിവുകളില് ന്യായമായ മൂല്യനിര്ണയം ലഭിക്കാനുള്ള അവകാശമുണ്ട്. ഇതിനായി പരീക്ഷാ സംവിധാനത്തില് പരിഷ്കരണ നടപടികള് ആവശ്യമാണ്.
ജന്മഭൂമി ഓണ്ലൈന്