കാലടി: ആദിശങ്കരന്റെ പേരിലുള്ള സംസ്‌കൃത സര്‍വകലാശാലയെ തകര്‍ക്കാന്‍ കമ്മ്യൂണിസ്റ്റ് സര്‍ക്കാരുകള്‍ ശ്രമിച്ചുവെന്ന് സര്‍വകലാശാല മുന്‍ വൈസ് ചാന്‍സലര്‍ ഡോ. കെ.എസ്. രാധാകൃഷ്ണന്‍. കാലടി ശ്രീശങ്കരാചാര്യ സംസ്‌കൃത സര്‍വകലാശാലയെ ദേശദ്രോഹ ശക്തികളില്‍ നിന്ന് മോചിപ്പിക്കണമെന്ന് ആവശ്യപ്പെട്ട്് സര്‍വകലാശാല സംരക്ഷണസമിതിയുടെ ആഭിമുഖ്യത്തില്‍ കാലടിയില്‍ സംഘടിപ്പിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ഹിന്ദു ഐക്യവേദി സംസ്ഥാന അധ്യക്ഷന്‍ ആര്‍.വി. ബാബു മുഖ്യപ്രഭാഷണം നടത്തി. സനാതന ധര്‍മ്മത്തെയും ശങ്കര ദര്‍ശനങ്ങളെയും ശങ്കരന്റെ പേരിലുള്ള സര്‍വകലാശാലയെ തകര്‍ക്കുന്ന കമ്മ്യൂണിസ്റ്റ് അജണ്ടകളില്‍ നിന്ന് മോചിപ്പിക്കാന്‍ കേന്ദ്രസര്‍ക്കാര്‍ ഏറ്റെടുത്തു കേന്ദ്രീയ സര്‍വകലാശാല ആക്കണമെന്ന് അദ്ദേഹം ആവശ്യപ്പെട്ടു.
കാലടി ഓപ്പണ്‍ എയര്‍ സ്റ്റേഡിയത്തില്‍ നടന്ന പൊതുസമ്മേളനത്തില്‍ സര്‍വകലാശാല സംരക്ഷണ സമിതി അധ്യക്ഷന്‍ ഡോ. എസ്. രാജശേഖരന്‍ അധ്യക്ഷനായി. ബിജെപി ജില്ലാ അധ്യക്ഷന്‍ എം.എ. ബ്രഹ്‌മരാജ് ആമുഖഭാഷണം നടത്തി. നേതാക്കളായ അധീന ഭാരതി, ഡോ. രേണു സുരേഷ്, വി.കെ. വിശ്വനാഥന്‍, കെ.വി. ശിവന്‍, പി.എം. വേലായുധന്‍, ടി.എം. കൃഷ്ണകുമാര്‍, അഗസ്റ്റിന്‍ കോലഞ്ചേരി എന്നിവര്‍ സംസാരിച്ചു. പൊതുസമ്മേളനത്തോടനുബന്ധിച്ച് കാലടി പോലീസ് സ്റ്റേഷന്‍ പരിസരത്ത് നിന്നാരംഭിച്ച പ്രകടനത്തില്‍ ആയിരക്കണക്കിന് പൊതുജനങ്ങള്‍ പങ്കെടുത്തു.
