നടി അന്ന ജെയ്സിംഗാനി, സൽമാൻ ഖാനോടും കൊറിയോഗ്രാഫർ തോമസ് പോൾസനോടും ഒപ്പം പ്രവർത്തിച്ചതിന് ശേഷം അന്ന ബാലാജി പ്രൊഡക്ഷൻസിൽ ഒരു ആക്ടിംഗ് കോഴ്സിൽ ചേർന്നു. താമസിയാതെ, അവർ അഭിനയരംഗത്തേക്ക് കടക്കുകയും ‘ക്രൈം പെട്രോൾ’, ‘സാവധാൻ ഇന്ത്യ’ തുടങ്ങിയ ഷോകളിൽ വേഷങ്ങൾ നേടുകയും ചെയ്തു. 2011-ൽ ഫ്രീലാൻസ് കൊറിയോഗ്രാഫറായാണ് തന്റെ കരിയർ ആരംഭിച്ചത്.
‘മേരോ വൃന്ദാവൻ’ എന്ന ചാനലിന് നൽകിയ വീഡിയോയിൽ തന്റെ ആ തീരുമാനത്തിനു പിന്നിലെ കാരണങ്ങളെ കുറിച്ച് അടുത്തിടെ അന്ന മനസ്സു തുറന്നിരുന്നു.
ഏക്ത കപൂറിന്റെ ‘ദേഖ ഏക് ഖ്വാബ്’ എന്ന ഷോയിൽ പ്രധാന നടിയുടെ അടുത്ത സുഹൃത്തായി അഭിനയിച്ചതാണ് അവരുടെ കരിയറിൽ വഴിത്തിരിവായത്. എന്നാൽ പിന്നീട് അഭിനയരംഗത്തോട് വിട പറയുന്ന അന്നയെ ആണ് പ്രേക്ഷകർ കണ്ടത്. കൃഷ്ണഭക്തയായ അന്ന ആത്മീയ ജീവിതത്തിലേക്ക് തിരിയുകയും വൃന്ദാവനിൽ താമസമാക്കുകയും ചെയ്തു.
അഭിനയ ലോകത്തേക്കുള്ള തന്റെ യാത്രയെക്കുറിച്ച് സംസാരിക്കവേ, താൻ ഗ്വാളിയോർ സ്വദേശിയാണെന്ന് അന്ന ജെയ്സിംഗാനി വ്യക്തമാക്കി. “എനിക്ക് ബിഎ ഇംഗ്ലീഷ് ഓണേഴ്സ് ബിരുദമുണ്ട്. എനിക്ക് നൃത്തം ചെയ്യാനും അഭിനയിക്കാനും വലിയ ഇഷ്ടമായിരുന്നു. എപ്പോഴും പ്രശസ്തയാകണമെന്ന് ഞാൻ ആഗ്രഹിച്ചിരുന്നു, അതെല്ലാം നൃത്തത്തിലൂടെയാണ് തുടങ്ങിയത്. കോളേജിൽ പഠിക്കുമ്പോൾ ഞാൻ കുട്ടികളെ നൃത്തം പഠിപ്പിക്കുമായിരുന്നു. ഞാൻ മുംബൈയിൽ വരികയും ബാലാജി ടെലിഫിലിംസിൽ ഒരു ആക്ടിംഗ് കോഴ്സ് ചെയ്യുകയും ചെയ്തു. അതിനുശേഷം ‘സാവധാൻ ഇന്ത്യ’, ‘ഫിയർ ഫയൽസ്’ തുടങ്ങിയവയിൽ എനിക്ക് ചെറിയ വേഷങ്ങൾ ലഭിച്ചു. അരുണ ഇറാനി ജി അഭിനയിച്ച സോണി ടിവിയുടെ ‘ദേഖ ഏക് ഖ്വാബ്’ എന്ന ഷോയാണ് എനിക്ക് വലിയ ബ്രേക്ക് നൽകിയത്.”
“ഞാൻ മുംബൈയിൽ ഓഡിഷനുകളിൽ പങ്കെടുത്തുകൊണ്ടേയിരുന്നു. ആ സമയത്ത് ഇസ്കോൺ ക്ഷേത്രത്തിൽ വെച്ച് എനിക്ക് കുറച്ച് സുഹൃത്തുക്കളെ ലഭിച്ചു. ഞാൻ ആത്മീയ പാത സ്വീകരിക്കാൻ തുടങ്ങുകയും അതിലേക്ക് കൂടുതൽ ആകർഷിക്കപ്പെടുകയും ചെയ്തു. താമസിയാതെ, ഭൗതിക ലോകം ഒരു മായയാണെന്ന് ഞാൻ മനസ്സിലാക്കി. കുറച്ചുകാലം ഞാൻ പൂനെയിലും താമസിച്ചു, അവിടെ ഇസ്കോൺ ക്ഷേത്രത്തിലാണ് ഞാൻ ജോലി ചെയ്തിരുന്നത്,” അന്ന പറഞ്ഞു.
“ഞാൻ ഇസ്കോണിൽ ആയിരുന്നപ്പോൾ ഒരു ഗുരുവിനെ വേണമെന്ന് ആഗ്രഹിക്കുകയും ശരിയായ ഗുരുവിനെ കണ്ടെത്താനായി കരയുകയും ചെയ്യുമായിരുന്നു. ഞാൻ വൃന്ദാവനിലെത്തി, അന്ന് രാത്രി പ്രേമാനന്ദ് മഹാരാജ് എന്റെ സ്വപ്നത്തിൽ വന്നു. 2026 ജനുവരിയിൽ ഞാൻ അദ്ദേഹത്തിന്റെ ശിഷ്യയായി,” അന്ന കൂട്ടിച്ചേർത്തു.
രണ്ട് ജീവിതങ്ങളെയും താരതമ്യം ചെയ്തുകൊണ്ട് അന്ന പറഞ്ഞതിങ്ങനെ: “രണ്ടും തമ്മിൽ വലിയ വ്യത്യാസമുണ്ട്. എന്റെ പഴയ ജീവിതത്തിൽ എനിക്ക് ആഡംബരം കാണിക്കാമായിരുന്നു; അതെല്ലാം തിളക്കമുള്ളതായി തോന്നിയിരുന്നു. നിങ്ങൾ പണം ചിലവഴിക്കുന്നു, ഷോപ്പിംഗ് നടത്തുന്നു, വലിയ ഫ്ലാറ്റുകളിൽ താമസിക്കുന്നു, എന്നാൽ ഇവിടെ ഭക്തിയാണുള്ളത്. ചിലപ്പോൾ ഞാൻ പഴയ ദിവസങ്ങളെക്കുറിച്ച് ഓർക്കുകയും ചിരിക്കുകയും ചെയ്യും.” അന്ന ഇതുവരെയുള്ള ജീവിതാനുഭവം പറഞ്ഞു.
