കണ്ണൂര്‍: എല്‍ഡിഎഫിന്റെ നിര്‍ദേശപ്രകാരം കാസര്‍കോടും മഞ്ചേശ്വരത്തും യുഡിഎഫിന് അനുകൂലമായി വോട്ട് മറിച്ചതായ ഐഎന്‍എല്‍ നേതാവിന്റെ വെളിപ്പെടുത്തലോടെ എല്‍ഡിഎഫ്-യുഡിഎഫ് ഡീല്‍ സംബന്ധിച്ച ബിജെപി ആരോപണം ശരിയെന്ന് തെളിയിക്കുന്നു. ബിജെപി ജയിക്കാതിരിക്കാന്‍ എല്‍ഡിഎഫിന്റെ നിര്‍ദേശപ്രകാരം കാസര്‍ഗോഡും മഞ്ചേശ്വരത്തും വോട്ട് മറിച്ചെന്ന് എല്‍ഡിഎഫിന്റെ ഘടകകക്ഷിയായ ഐഎന്‍എല്‍ സംസ്ഥാന ജനറല്‍ സെക്രട്ടറി കാസിം ഇരിക്കൂറാണ് കഴിഞ്ഞ ദിവസം സ്വകാര്യ ദൃശ്യമാധ്യമത്തിന് നല്‍കിയ അഭിമുഖത്തില്‍ ഇക്കാര്യം വെളിപ്പെടുത്തിയത്.
മഞ്ചേശ്വരത്തും കാസര്‍കോടും പാലക്കാടും അടക്കം ബിജെപി വിജയ സാധ്യതയുളള മണ്ഡലങ്ങളില്‍ എല്‍ഡിഎഫ്-യുഡിഎഫ് മുന്നണികള്‍ തമ്മില്‍ ബിജെപിയെ തോല്‍പ്പിക്കാന്‍ തെരഞ്ഞെടുപ്പിന് മുന്നേ ധാരണയുണ്ടാക്കിയതായി മഞ്ചേശ്വരത്തെ എന്‍ഡിഎ സ്ഥാനാര്‍ത്ഥിയായ കെ. സുരേന്ദ്രനും ബിജെപി നേതൃത്വവും ആരോപിച്ചിരുന്നു. ആരോപണം ശരിവെക്കുകയാണ് ഐഎന്‍എല്‍ നേതാവിന്റെ കഴിഞ്ഞ ദിവസത്തെ വെളിപ്പെടുത്തല്‍.
കാസര്‍ഗോഡ്, മഞ്ചേശ്വരം മണ്ഡലങ്ങളില്‍ ബിജെപി ജയിക്കതിരിക്കാനും മതനിരപേക്ഷത നിലനിര്‍ത്താനുമാണ് വോട്ട് മറിച്ചതെന്നാണ് ഐഎന്‍എല്‍ നേതാവിന്റെ വെളിപ്പെടുത്തല്‍. എന്നാല്‍ എല്‍ഡിഎഫ്-ബിജെപി മത്സരം നടക്കുന്ന മണ്ഡലങ്ങളില്‍ യുഡിഎഫ് തിരിച്ച് സഹായിച്ചില്ലെന്നും അദ്ദേഹം പറയുന്നു. യുഡിഎഫിന്റെ നിസഹകരണം കാരണമാണ് മൂന്ന് മണ്ഡലങ്ങളില്‍ ബിജെപി ജയിച്ചതെന്നും കാസിം ഇരിക്കൂര്‍ അഭിമുഖത്തില്‍ പറയുന്നു.
മഞ്ചേശ്വരത്ത് എല്‍ഡിഎഫിന് കെട്ടിവച്ച കാശ് നഷ്ടമായത് വോട്ട് കിട്ടാത്തതുകൊണ്ടല്ല, എല്‍ഡിഎഫിന്റെ വോട്ട് യുഡിഎഫിന് കൊടുത്തതു കൊണ്ടാണെന്നും അദ്ദേഹം പറയുന്നു. കെ. സുരേന്ദ്രനെ പോലെ ഒരാള്‍ അസംബ്ലിയിലേക്ക് വരാന്‍ പാടില്ല എന്നതുകൊണ്ടാണ് ധാരണയുണ്ടാക്കിയത്.
മഞ്ചേശ്വരത്ത് ബിജെപി ജയിക്കാന്‍ സാധ്യതയുള്ളതിനാല്‍ അതിനെ പ്രതിരോധിക്കുകയാണ് ആദ്യം ചെയ്തത്. എസ്ഡിപിഐ മത്സരിക്കാന്‍ വേണ്ടി മുന്നോട്ട് വന്നിരുന്നു. അങ്ങനെ ചെയ്യരുതെന്ന് ഉത്തരവാദിത്തപ്പെട്ട പലരും പറഞ്ഞു. ചിലയിടങ്ങളില്‍ എസ്ഡിപിഐ എല്‍ഡിഎഫിന്റെ ചില സ്ഥാനാര്‍ത്ഥികള്‍ക്ക് പിന്തുണ പ്രഖ്യാപിച്ചിരുന്നുവെന്നും അദ്ദേഹം വെളിപ്പെടുത്തി.
ബിജെപി സ്ഥാനാര്‍ത്ഥികളെ പരാജയപ്പെടുത്താന്‍ മഞ്ചേശ്വരത്ത് ഇരുപതിനായിരത്തിലധികവും പാലക്കാട് അയ്യായിരത്തിലധികവും വോട്ടുകള്‍ ഇടതുപക്ഷം യുഡിഎഫിന് മറിച്ച് നല്‍കിയതായ കണക്കുകകള്‍ കഴിഞ്ഞ ദിവസങ്ങളില്‍ പുറത്ത്‌വന്നിരുന്നു. ഇത്രയും വോട്ടുകള്‍ രണ്ടിടത്തും ഇടത് സ്ഥാനാര്‍ത്ഥികള്‍ക്ക് കുറവാണ് ലഭിച്ചത്. കൂടാതെ എസ്ഡിപിഐ അടക്കമുളള തീവ്ര സ്വഭാവമുളള സംഘടനകളുടെ വോട്ടും ബിജെപിയെ പരാജയപ്പെടുത്താന്‍ ഇടതും വലതും ചേര്‍ന്ന് യുഡിഎഫ് സ്ഥാനാര്‍ത്ഥികള്‍ക്ക് നല്‍കിയതായ കണക്കുകളും പുറത്ത് വന്നിരുന്നു. ഇതിന് പിന്നാലെ ഐഎന്‍എല്‍ നേതാവിന്റെ ഇതു സംബന്ധിച്ച വെളിപ്പെടുത്തലുകള്‍ കൂടി പുറത്ത് വന്നതോടെ ബിജെപിയുടെ ആരോപണങ്ങള്‍ പൂര്‍ണമായും ശരിയാണെന്ന് തെളിയുകയാണ്.
