കൊച്ചി: ഇടത് സഹയാത്രികനും കവിയുമായ കെ സച്ചിതാനന്ദനെ പരോക്ഷമായി വിമര്ശിച്ച് പ്രതിപക്ഷ നേതാവ് പിണറായി വിജയന്. എം കെ സാനു മാസ്റ്ററുടെ ചരമവാര്ഷിക അനുസ്മരണത്തിലാണ് സച്ചിതാനന്ദനെതിരെ പേര് പറയാതെ വിമര്ശനം നടത്തിയത്. തുടര് ഭരണം അപകടമാണെന്ന തോന്നലോ ഇടതുപക്ഷത്ത് നിന്ന് കൊണ്ട് ഇടതുപക്ഷത്തെ കരിവാരി തേച്ച് സ്വീകാര്യതനേടാനോ സാനു മാസ്റ്റര് ശ്രമിച്ചില്ലെന്നായിരുന്നു പിണറായിയുടെ ഒളിയമ്പ്.
ഇടത് പക്ഷത്തെ ഇകഴ്ത്തി സ്വന്തം യശസ് ഉയര്ത്താന് സാനു മാഷ് ശ്രമിച്ചില്ല.അദ്ദേഹത്തിന് ജന മനസുകളില് ഉയര്ന്ന സ്ഥാനമാണ് ഉള്ളത്.അത് ഇല്ലാത്തവരാണ് ഞാനിവിടെയുണ്ട് എന്ന് അറിയിക്കാന് ശ്രമിക്കുന്നതെന്നും പിണറായി വിജയന് പറഞ്ഞു. ഇടത് പക്ഷത്തിന് തുടര് ഭരണം വേണ്ടെന്ന്, പിണറായി സര്ക്കാരിന്റെ കാലത്ത് സാഹിത്യ അക്കാദമി ചെയര്മാനായിരുന്ന സച്ചിതാനന്ദന് പ്രതികരിച്ചിരുന്നു.
മാറി മാറിയുള്ള ഭരണമാണ് താന് ആഗ്രഹിക്കുന്നതെന്നും കേരളത്തില് ഇടത് പക്ഷത്തിന് തുടര്ഭരണം വേണ്ടെന്നുമായിരുന്നു നിയമസഭാ തെരഞ്ഞെടുപ്പ് അടുത്തുവരവെ സച്ചിതാനന്ദന് പറഞ്ഞത്. ആദ്യമായാണ് ഇക്കാര്യത്തില് പിണറായി പരോക്ഷമായെങ്കിലും പ്രതികരിച്ചത്.
