കരുനാഗപ്പള്ളി: ഭാരതത്തിലെ ഗ്രാമങ്ങളുടെ കേന്ദ്രബിന്ദുവായ ക്ഷേത്രങ്ങള് ആരാധനാലയങ്ങള് മാത്രമല്ല, സംസ്കാരത്തിന്റെയും വിദ്യാഭ്യാസത്തിന്റെയും കേന്ദ്രങ്ങള് കൂടിയായിരുന്നുവെന്ന് ആരോഗ്യ, കേരള സര്വകലാശാലകളുടെ വൈസ് ചാന്സിലറായ ഡോ. മോഹന് കുന്നുമ്മല്. കരുനാഗപ്പള്ളി വള്ളിക്കാവ് അമൃത എഞ്ചിനീയറിങ് കോളേജില് നടക്കുന്ന ഭാരതീയ വിദ്യാനികേതന്റെ സംസ്ഥാന പ്രതിനിധി സഭ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ക്ഷേത്രങ്ങള് സാമൂഹിക ജീവിതത്തിന്റെയും കേന്ദ്രങ്ങളായിരുന്നു. അതിന്റെ പ്രാധാന്യം മനസ്സിലാക്കിയ മെക്കാളയെ പോലുള്ള വിദേശാക്രമണകാരികള് ക്ഷേത്രങ്ങളെ നശിപ്പിക്കാന് ശ്രമിച്ചു. സമൂഹത്തിന്റെ മൂല്യാധിഷ്ഠിത പുനര്നിര്മാണത്തിന് ക്ഷേത്രങ്ങളും സാംസ്കാരിക കേന്ദ്രങ്ങളും വീണ്ടും ശക്തിപ്പെടേണ്ടതുണ്ടെന്ന് അദ്ദേഹം പറഞ്ഞു.
ലോകം അതിവേഗ മാറ്റങ്ങളിലൂടെ കടന്നുപോകുകയാണ്, ഭാവിയില് എന്തുതരത്തിലുള്ള തൊഴില് അവസരങ്ങളായിരിക്കും രൂപപ്പെടുക എന്ന് പോലും ഇന്ന് ഉറപ്പായി പറയാനാകാത്ത സാഹചര്യമാണ് നിലവിലുള്ളത്. ആര്ട്ടിഫിഷ്യല് ഇന്റലിജന്സ് പോലുള്ള സാങ്കേതികവിദ്യകള് വിദ്യാഭ്യാസത്തിന്റെയും തൊഴില് മേഖലയുടെയും സ്വഭാവം മാറ്റിക്കൊണ്ടിരിക്കുകയാണെന്നും അദ്ദേഹം ഓര്മ്മിപ്പിച്ചു. അതിനാല് പഠനം ഒരിക്കലും അവസാനിക്കുന്ന പ്രക്രിയ അല്ല. വിദ്യാഭ്യാസരംഗത്ത് കാലാനുസൃതമായ നവീന ഇടപെടലുകള് അനിവാര്യമാണെന്നും, അതിന്റെ ഭാഗമായാണ് കേന്ദ്ര സര്ക്കാര് നടപ്പിലാക്കിയ പുതിയ വിദ്യാഭ്യാസ നയവും നാലുവര്ഷ ബിരുദ പദ്ധതിയെന്നും കേരള സര്വകലാശാലയാണ് ഈ പദ്ധതി ആദ്യം നടപ്പിലാക്കുന്നതെന്നും അദ്ദേഹം സൂചിപ്പിച്ചു.
ഭാരതീയ വിദ്യാനികേതന് നിശബ്ദ വിപ്ലവമാണ് നടത്തിവരുന്നത്. ഈ പ്രസ്ഥാനം നിലനില്ക്കേണ്ടത് കാലഘട്ടത്തിന്റെ ആവശ്യമാണ്. അറിവ് കൊണ്ട് വളര്ന്ന സംസ്ക്കാരമാണ് ഭാരതത്തിന്റേത്, അതില് കൂടി ഭാരതത്തിന് തിരിച്ചു വരാന് കഴിയണമെന്നും ഡോ. മോഹന് കുന്നുമ്മല് പറഞ്ഞു.
വിദ്യാര്ത്ഥികള് സ്കൂള് തലത്തില് തന്നെ ശരിയായ ദിശാബോധം നേടേണ്ടതുണ്ടെന്നും അവരുടെ കഴിവുകളും സ്വപ്നങ്ങളും തിരിച്ചറിയാന് അധ്യാപകരും രക്ഷിതാക്കളും കൈപിടിച്ചു നയിക്കേണ്ടതുണ്ടെന്നും ‘ഭാവി വിദ്യാഭ്യാസം’ എന്ന വിഷയം അവതരിപ്പിച്ച് അമൃത വിശ്വ വിദ്യാപീഠം ബ്രഹ്മചാരി മഹേശ്വര ചൈതന്യ പറഞ്ഞു. വിദ്യാര്ത്ഥികള്ക്ക് പ്രഗത്ഭരായ വ്യക്തികളുമായി നേരിട്ട് ഇടപെടാനും സംവദിക്കാനും അവസരങ്ങള് സൃഷ്ടിക്കണം. വിദ്യാര്ത്ഥികളെ രാജ്യത്തിനകത്ത് തന്നെ നിലനിര്ത്തി, രാജ്യത്തിനായി സംഭാവന ചെയ്യാനുള്ള മനോഭാവം വളര്ത്തേണ്ടത് ഇന്നത്തെ വിദ്യാഭ്യാസത്തിന്റെ വലിയ ഉത്തരവാദിത്വമാണെന്നും അദ്ദേഹം ഓര്മിപ്പിച്ചു.
പി.ഗോപാലന്കുട്ടി മാസ്റ്റര് അദ്ധ്യക്ഷത വഹിച്ച യോഗത്തില്, വിദ്യാഭാരതി സംഘടനാ കാര്യദര്ശി ഗോവിന്ദ ചന്ദ്ര മെഹന്ത, എന്സിറ്റി രാജഗോപാല്, ആര്. അനീഷ് കുമാര്, എന്. രാധാകൃഷ്ണന്, ആര്. ചന്ദ്രശേഖരന് മാസ്റ്റര്, അരുണ്.എ, കെ.എം. പ്രമോദ് കുമാര്, കെ.ആര്. രജി, സൗമ്യ സുരേഷ് എന്നിവര് സംസാരിച്ചു.
