ന്യൂദല്ഹി: മതകാര്യങ്ങളിലും മതാചാരങ്ങളിലും ഇടപെടുമ്പോള് കോടതികള് ജാഗ്രത പാലിക്കണമെന്നും അനാവശ്യമായ ഇടപെടലുകള് മതങ്ങളെ തകര്ക്കുമെന്നും സുപ്രീംകോടതി. ശബരിമല യുവതി പ്രവേശവുമായി ബന്ധപ്പെട്ട ഹര്ജികള് പരിഗണിക്കുന്ന ഒന്പതംഗ ഭരണഘടനാ ബെഞ്ചിന്റെതാണ് സുപ്രധാന നിരീക്ഷണം.
ഇത്തരം ഒരു കാര്യത്തില് ഇടപെട്ടാല്, അത് പല കേസുകള്ക്ക് വഴിയൊരുക്കും, മതങ്ങള്ക്ക് വെല്ലുവിളിയുണ്ടാക്കും. ഓരോരുത്തരും മതങ്ങളെയും മതാചാരങ്ങളെയും കോടതികളില് ചോദ്യം ചെയ്ത് തുടങ്ങിയാല് മതവുമായി വളരെ അടുത്ത ബന്ധപ്പെട്ട് കിടക്കുന്ന ഭാരത സമൂഹത്തിന്റെ നാഗരികതയ്ക്ക് എന്ത് സംഭവിക്കുമെന്ന് ചിന്തിക്കേണ്ടതുണ്ട്. അമ്പലം അടയ്ക്ക്, അമ്പലം തുറക്ക്, അത് ശരിയോ ഇത് ശരിയോ തുടങ്ങി ഓരോ കാര്യങ്ങളും ചോദ്യം ചെയ്ത് പലരും ഹര്ജി നല്കാന് തുടങ്ങും. ഇക്കാര്യത്തെ പറ്റി ഞങ്ങള്ക്ക് വളരെയേറെ ബോധമുണ്ട്. ജസ്റ്റിസ് ബി.വി. നാഗരത്ന പറഞ്ഞു. ഇത്തരം കേസുകള് പരിഗണിച്ചാല് എല്ലാവര്ക്കും എല്ലാത്തിനെയും കോടതിയി ല് ചോദ്യം ചെയ്യാം എന്നാകുമെന്ന് ജസ്റ്റിസ് സുന്ദേരേഷ് പറഞ്ഞു. അങ്ങനെയെങ്കില് എല്ലാ മതങ്ങളും തകരും, എല്ലാ കോടതികളും പൂട്ടേണ്ടതായും വരും. അദ്ദേഹം പറഞ്ഞു.
ഒരു പരമാധികാര ജനാധിപത്യ റിപ്പബ്ലിക് ആണെങ്കിലും ബഹുസ്വരതയുടെയും വൈവിധ്യത്തിന്റെയും സംസ്ക്കാരമാണ് ഭാരതം, ഓരോ ഭാരതീയനും മതം അത്രമേല് പ്രിയപ്പെട്ടതാണ്. ജസ്റ്റിസ് നാഗരത്ന പറഞ്ഞു. ഇതാണ് ഞങ്ങളെ അസ്വസ്ഥരാക്കുന്നത്. ഞങ്ങള് ഒന്പത് പേര് ചേര്ന്ന് എഴുതുന്നത് (വിധി) ഭാരതം എന്ന ഒരു നാഗരികതയ്ക്ക് (സിവിലൈസേഷന്) വേണ്ടിയാണ്. ഭാരതം പുരോഗമിക്കണം. വികസനം, സമ്പദ്വ്യവസ്ഥ തുടങ്ങിയ എന്തൊക്കെയുണ്ടെങ്കിലും അതിലുപരി നമ്മളില് അചഞ്ചലമായ, നിത്യമായ ഒന്ന് (വിശ്വാസം) ഉണ്ട്. അത് തകര്ക്കാന് ഞങ്ങള്ക്കാവില്ല. അതാണ് ഞങ്ങളെ അസ്വസ്ഥരാക്കുന്നത്. ജഡ്ജി പറഞ്ഞു.
മുസ്ലിമിലെ ദാവൂദി ബോറ വിഭാഗത്തില് സമൂഹത്തില് നിന്ന് പുറത്താക്കുന്ന ഒരു പരിപാടിയുണ്ടെന്ന് മുതിര്ന്ന അഭിഭാഷകന് രാജു രാമചന്ദ്രന് പറഞ്ഞപ്പോഴായിരുന്നു ജഡ്ജിമാരുടെ ഈ പ്രതികരണം. ഇത്തരം പുറത്താക്കലുകള് വഴി മൗലികാവകാശങ്ങള് ലംഘിക്കുമ്പോള് കോടതിക്ക് ഇടപെടാം. ഒരു പാട് പരാതിയുണ്ടെന്ന് പറഞ്ഞ് കോടതിക്ക് നോക്കി നില്ക്കാനാവില്ല രാജു രാമചന്ദ്രന് തുടര്ന്നു. ഭരണഘടയ്ക്ക് എതിരായ ഒന്നും അനുവദിക്കാനാവില്ല, അദ്ദേഹം പറഞ്ഞു.
