കൊല്‍ക്കത്ത: മുതിര്‍ന്ന ബിജെപി നേതാവ് സുവേന്ദു അധികാരിയുടെ പിഎ ചന്ദ്രനാഥ് രഥിന്റെ കാര്‍ തടഞ്ഞ് അദ്ദേഹത്തെ വകവരുത്തിയത് വളരെ ആസൂത്രിതമായി. വ്യാജനമ്പര്‍ പ്ലേറ്റുള്ള കാറില്‍ എത്തിയവര്‍ ആദ്യം അദ്ദേഹത്തിന്റെ കാര്‍ തടഞ്ഞു. വഴിക്ക് കുറുകെയിടുകയായിരുന്നു. പൊടുന്നനെ ബൈക്കില്‍ എത്തിയവര്‍ അടുത്തെത്തി ചന്ദ്രനാഥിന്റെ നേര്‍ക്ക് നിറയൊഴിക്കുകയായിരുന്നു. മൂന്നു തവണയാണ് വെടിവച്ചത്. ബുധനാഴ്ച രാത്രി പത്തരയോടെ ദോള്‍ത്താലയിലെ മധ്യംഗ്രാമില്‍ വച്ചായിരുന്നു സംഭവം. വെടിവെച്ച ശേഷം കാറിലുണ്ടായിരുന്നവര്‍ വാഹനം അവിടെ ഉപേക്ഷിച്ച് അക്രമികള്‍ക്ക് ഒപ്പം ബൈക്കില്‍ കയറി രക്ഷപ്പെടുകയായിരുന്നു.
മൂന്നു വെടിയുണ്ടകള്‍ നെഞ്ചിലേറ്റു, അതിലൊന്ന് ഹൃദയം തുളച്ചു. ആശുപത്രിയില്‍ എത്തും മുന്‍പു തന്നെ ആള്‍ മരിച്ചിരുന്നു. ഡോക്ടര്‍ പറഞ്ഞു. അക്രമികള്‍ പ്രൊഫഷണല്‍ കൊലയാളികളാണെന്ന് സംശയമുണ്ടെന്ന് ദൃക്‌സാക്ഷികള്‍ പറഞ്ഞു. അക്രമി കാറിനടുത്തെത്തി പോയന്റ് ബ്ലാങ്കിലാണ് വെടിവെച്ചത്. പത്തരയ്‌ക്കും 11നും ഇടയ്‌ക്കാണ് സംഭവം. സാക്ഷി തുടര്‍ന്നു. ബൈക്കിന് നമ്പര്‍ പ്ലേറ്റ് ഉണ്ടായിരുന്നില്ല. മറ്റ് മൂന്നു ബൈക്കുകളിലും അക്രമികള്‍ ഉണ്ടായിരുന്നു.
കാര്‍ കസ്റ്റഡിയില്‍, തോക്കും മുന്തിയ ഇനം
ചന്ദ്രനാഥിന്റെ വാഹനം തടഞ്ഞ കാര്‍ കസ്റ്റഡിയില്‍ എടുത്തതായി ഡിജിപി സിദ്ധനാഥ് ഗുപ്ത പറഞ്ഞു. നമ്പര്‍ പ്ലേറ്റ് വ്യാജമായിരുന്നു. കാറിന്റെ ഷാസി നമ്പറിലും കൃത്രിമം കാണിച്ചതായി സംശയമുണ്ട്. വളരെ മികച്ചതരം തോക്കാണ് ഉപയോഗിച്ചിരിക്കുന്നതെന്നാണ് പോലീസ് സംശയിക്കുന്നത്. സാധാരണ ക്രിമിനലുകള്‍ ഉപയോഗിക്കുന്നവയല്ല ഇത്. ഗ്‌ളോക്ക് 47 എക്‌സ് എന്ന തോക്കാണ് ഉപയോഗിച്ചിട്ടുള്ളതെന്നാണ് സംശയം. കാലിയായ കാട്രിഡ്ജുകള്‍ കണ്ടെത്തിയതായും പോലീസ് പറഞ്ഞു.
മുക്കാല്‍ മണിക്കൂര്‍ കാത്തുനിന്നു
കൊലയാളികള്‍ സംഭവ സ്ഥലത്ത് 45 മിനിറ്റോളം കാത്തു നിന്നതായി കണ്ടെത്തിയിട്ടുണ്ടെന്ന് പോലീസ് പറഞ്ഞു. എംഎല്‍എയുടെ ചിഹ്നം പതിപ്പിച്ച സ്‌കോര്‍പ്പിയോ എസ്‌യുവിയിലാണ് ചന്ദ്രനാഥ് വസതിയിലേക്ക് പോയിരുന്നത്.
നിരപരാധിയായ മനുഷ്യനെ കൊന്നത് തൃണമൂല്‍ കോണ്‍ഗ്രസാണെന്ന് ബിജെപി നേതാക്കളായ ദേവഭാസ് മണ്ഡല്‍, നിഖില്‍ പ്രസൂണ്‍ എന്നിവര്‍ പറഞ്ഞു.
വ്യോമസേനയില്‍ നിന്ന് സുവേന്ദുവിന്റെ ഹൃദയത്തിലക്ക്
മുന്‍ വ്യോമസേനാ ഉദ്യോഗസ്ഥനാണ് കൊല്ലപ്പെട്ട ചന്ദ്രനാഥ് രഥ് എന്ന നാല്പത്തൊന്നുകാരന്‍. പൂര്‍വ മേദിനിപ്പൂരിലെ ചാന്ദിപ്പൂര്‍ സ്വദേശിയാണ്. മൃദു ഭാഷി, എന്നും ജനശ്രദ്ധയില്‍ നിന്നകന്നു നിന്നു. ആധ്യാത്മിക ജീവിതം ആഗ്രഹിച്ച് രാമകൃഷ്ണ മിഷനില്‍ പ്രവര്‍ത്തിച്ചിരുന്നു. പിന്നെയാണ് വ്യോമസേനയില്‍ ചേര്‍ന്നത്.
കാലങ്ങളായി സുവേന്ദുവുമായി വലിയ ആത്മബന്ധമാണ് ഉണ്ടായിരുന്നത്. തൃണമൂലില്‍ നിന്ന് സുവേന്ദുവിനൊപ്പമാണ് ബിജെപിയില്‍ എത്തിയതും. അമ്മ ഹസി രഥ് മുന്‍പ് തൃണമൂലിന്റെ പഞ്ചായത്തംഗമായിരുന്നു.
ക്രമസമാധനം തകര്‍ന്നു: ബിജെപി, സിപിഎം അപലപിച്ചു
ചന്ദ്രനാഥിന്റെയടക്കമുള്ള അരുംകൊലകളും അക്രമങ്ങളും ബംഗാളിലെ ക്രമസമാധാനം പൂര്‍ണമായും തകര്‍ന്നതിന്റെ ഉദാഹരണമാണെന്ന് ബിജെപി. കൊലയാളികളെ വേഗം കണ്ടെത്തി നിയമത്തിനു മുന്‍പില്‍ കൊണ്ടുവരണം, ബിജെപി ആവശ്യപ്പെട്ടു.
ചന്ദ്രനാഥിന്റെ അടക്കമുള്ള അരുംകൊലകളെ സിപിഎം അപലപിച്ചു. കുറ്റവാളികള്‍ക്കെതിരെ ശക്തമായ നടപടി വേണം, പാര്‍ട്ടി പ്രസ്താവനയില്‍ ആവശ്യപ്പെട്ടു.
