ടെഹ്‌റാന്‍: യുണൈറ്റഡ് അറബ് എമിറേറ്റ്‌സില്‍ ആക്രമണം നടത്തിയെന്ന ആരോപണം നിഷേധിച്ച് ഇറാന്‍. കഴിഞ്ഞ ദിവസം യുഎഇയെ ലക്ഷ്യമിട്ട് മിസൈലാക്രമണമോ ഡ്രോണാക്രമണമോ ഒന്നും ഉണ്ടായിട്ടില്ലെന്ന് ഇറാന്‍ സൈനിക വക്താവ് ഇബ്രാഹിം സോല്‍ഫഘാരി വ്യക്തമാക്കി.
അതേസമയം, സ്വീകരിച്ച സൈനിക നടപടി ‘പ്രതിരോധം’ മാത്രമാണെന്നും മേഖലയിലെ യുഎസ് ആസ്തികള്‍ മാത്രം ലക്ഷ്യംവെച്ചുള്ളതാണെന്നും പറഞ്ഞു. ‘ഇറാനില്‍ നിന്ന് യുഎഇയിലേക്ക് മിസൈല്‍, ഡ്രോണുകള്‍ വിക്ഷേപിച്ചുവെന്ന അബുദാബിയുടെ അടിസ്ഥാനരഹിതമായ അവകാശവാദങ്ങള്‍ വിദേശകാര്യ മന്ത്രാലയം തള്ളിക്കളയുമ്പോള്‍, ഇസ്ലാമിക് റിപ്പബ്ലിക് ഓഫ് ഇറാന്റെ സായുധസേന ഈ ഘട്ടത്തില്‍ സ്വീകരിച്ച പ്രതിരോധ നടപടികള്‍ യുഎസ് ആക്രമണത്തെ ചെറുക്കുക എന്ന ലക്ഷ്യത്തോടെ മാത്രമാണെന്ന് ഊന്നിപ്പറയുന്നു,’ ഇറാന്‍ വിദേശകാര്യ മന്ത്രാലയം പ്രസ്താവനയില്‍ പറഞ്ഞു. അതോടൊപ്പം അന്താരാഷ്‌ട്ര നിയമങ്ങള്‍ക്ക് വിരുദ്ധമായ നടപടികള്‍ സ്വീകരിക്കുന്ന ശത്രുക്കളുമായി ഒത്തുകളിക്കരുതെന്നും ഇറാന്‍ യുഎഇയോട് ആവശ്യപ്പെട്ടു.
ഇറാനില്‍ നിന്ന് തൊടുത്തുവിട്ട 19 മിസൈലുകളും ഡ്രോണുകളും വെടിവെച്ചിട്ടതായി അബുദാബി പ്രഖ്യാപിച്ച് ഏകദേശം 48 മണിക്കൂറിന് ശേഷമാണ് ഇറാന്റെ പ്രസ്താവന വരുന്നത്. ആക്രമണത്തില്‍ മൂന്ന് ഭാരതീയര്‍ക്ക് പരിക്കേറ്റിരുന്നു.
