കോട്ടയം: തെരഞ്ഞടുപ്പില്‍ കേരള കോണ്‍ഗ്രസ്(എം) സമ്പൂര്‍ണ പരാജയം നേരിട്ട പശ്ചാത്തലത്തില്‍ പാര്‍ട്ടി ചെയര്‍മാന്‍ ജോസ് കെ. മാണിയെ പരിഹസിച്ച് പാലാ നഗരസഭയില്‍ പ്രമേയം. വിജയിക്കാന്‍ സാധിക്കാത്ത നേതാക്കള്‍ക്കായി നിയമസഭയില്‍ അപ്പര്‍ ഹൗസ് (ഉപരിസഭ)വേണമെന്നാണ് പ്രമേയത്തിലെ ആവശ്യം. ഇത്തരം സംവിധാനം ചില നേതാക്കള്‍ക്ക് നിയമസഭയിലെത്താന്‍ സുവര്‍ണാവസരമാകുമെന്നും ജോസ് കെ. മാണിയെ പേരു പറയാതെ സൂചിപ്പിക്കുന്ന പ്രമേയത്തിലുണ്ട്.
സ്വതന്ത്രാംഗം ബിനു പുളിക്കക്കണ്ടമാണ് പ്രമേയം അവതരിപ്പിച്ചത്. ജനങ്ങളുമായി ബന്ധമില്ലാത്ത ചില അഭിനവ നേതാക്കള്‍ക്ക് നിയമസഭയിലെത്താനുള്ള ഏകാവസരമായിരിക്കും ഈ അപ്പര്‍ ഹൗസ്. എത്രതവണ മത്സരിച്ചിട്ടും വിജയിക്കാനാകാത്ത നേതാക്കള്‍ക്ക് നിയമസഭയിലെത്താന്‍ ഇത് സഹായകരമാകും. നിയമസഭാ തിരഞ്ഞെടുപ്പില്‍ ജനങ്ങളുടെ അംഗീകാരം നേടി വിജയിക്കാന്‍ പ്രാപ്തിയില്ലാത്ത പ്രമുഖ നേതാക്കള്‍ അടക്കമുള്ളവരെ നിയമനിര്‍മാണ പ്രക്രിയയുടെ ഭാഗമാക്കുന്നതാകും ഈ സംവിധാനം.
രാജ്യസഭയുടെ മാതൃകയില്‍, നാമനിര്‍ദേശം ചെയ്യുന്ന എംഎല്‍എമാരെക്കൂടി ഉള്‍പ്പെടുത്തി കേരള നിയമസഭയിലും അപ്പര്‍ ഹൗസ് സംവിധാനം വേണമെന്ന് കേന്ദ്രസര്‍ക്കാരിനോട് ആവശ്യപ്പെടുന്നതാണ് പ്രമേയം. മഹാന്മാരായ പിതാക്കന്മാരുടെ പേരില്‍മാത്രം രാഷ്‌ട്രീയപ്രവര്‍ത്തനം നടത്തുന്ന, എല്ലത്തിന്റെയും പിതൃത്വം ഏറ്റെടുക്കുന്ന, ചില അഭിനവ നേതാക്കന്‍മാര്‍ക്ക് നിയമസഭയിലെത്താനുള്ള ഏക സാധ്യതയും ഇതാണ്. ഈ വിഷയം അടിയന്തരമായി പരിഗണിച്ച് വേണ്ട നിയമനിര്‍മാണം നടത്തണമെന്നും പ്രമേയം ആവശ്യപ്പെടുന്നു.
