തോല്ക്കാന് ഇനി മനസില്ലെന്ന് ഉറപ്പിച്ച് ചാത്തന്നൂരുകാര് വോട്ട് ചെയ്തപ്പോള് ജയിച്ചുകയറിയത് ഒരു തനി നാട്ടുകാരന്… ഡീലുറപ്പിച്ചും കളം മാറി വോട്ട് ചെയ്തും ജയിച്ച പഞ്ചായത്തില് പോലും ഭരിക്കാന് അനുവദിക്കാതെ ഒത്തുകളിച്ചും ജനങ്ങളെ പറ്റിച്ച ഇന്ഡി മുന്നണിക്കാര്ക്ക് ജനങ്ങള് നല്കിയ മറുപടിയാണിത്. ജനം കാത്തിരുന്ന വിജയം…
നാട്ടുകാരുടെ ഗോപന്സാര്… നാല് പതിറ്റാണ്ടിലേറെയായി നാട്ടില് നിറഞ്ഞുനില്ക്കുന്ന പൊതുപ്രവര്ത്തകന്… ശ്രീനാരായണീയ പ്രസ്ഥാനങ്ങള്ക്ക് നേതൃത്വം നല്കിയ സംഘാടകന്… നൂറുകണക്കിന് ശിഷ്യരുടെ ആരാധ്യനായ അധ്യാപകന്…. ബിജെപിയുടെ കൊല്ലം ജില്ലാ പ്രസിഡന്റ്… തിരുവനന്തപുരം മേഖലാ പ്രസിഡന്റ്…. സര്വോപരി സാധാരണക്കാരുടെ സാധാരണക്കാരനായ നേതാവ്….
ആര്ക്ക് എന്ത് ആവശ്യമുണ്ടെങ്കിലും ഏത് രാത്രിയിലും ഓടിയെത്തുന്ന ആള്. ജനങ്ങളുടെ പ്രശ്നങ്ങളിലിടപെട്ടാണ് ഗോപകുമാര് നാടിന് പ്രിയപ്പെട്ടവനായത്. 1995 മുതല് 2000 വരെ ചാത്തന്നൂരില് പഞ്ചായത്ത് മെമ്പറായിരുന്നു. ഗോപന്സാറിന് അറിയാത്ത, ഗോപന്സാറിനെ അറിയാത്ത വീടില്ല. നാട്ടുകാരില്ല. ഒരു വിളിപ്പുറത്ത് ഗോപന്സാറുണ്ട്. എന്തിനും ഏതിനും ഗോപന്സാറുണ്ട്.
നാടിനോട് അത്രയ്ക്ക് ഇഷ്ടമാണ് ബി.ബി. ഗോപകുമാറിന്. നാട്ടുകാര്ക്ക് തിരിച്ചും അങ്ങനെ തന്നെ. ബിജെപിയുടെ രാഷ്ട്രീയസാധ്യതകളുടെ പട്ടികയില് ഒരിക്കലും ഇടം പിടിക്കാതിരുന്ന ചാത്തന്നൂരിനെ ശ്രദ്ധേയമാക്കിയത് ബി.ബി. ഗോപകുമാര് എന്ന അധ്യാപകന്റെ കടന്നുവരവാണ്. അതൊരു കരുത്തുറ്റ വരവായിരുന്നുവെന്ന് ഇന്ന് എതിരാളികളും സമ്മതിക്കും.
പതിവ് രാഷ്ട്രീയത്തിന് തിരുത്ത്
ഇടതല്ലെങ്കില് വലത് എന്ന പതിവ് ചിട്ടകള് ചാത്തന്നൂര് തിരുത്തുകയാണ്. കേരളത്തില് ഇന്നലെ ആദ്യം വിരിഞ്ഞ താമര. കൊല്ലത്ത് വല്ലം നിറയെ താമര വിരിയുന്ന താമരക്കാലത്തിന്റെ കേളികൊട്ട്.. കഴിഞ്ഞ രണ്ട് നിയമസഭാ തെരഞ്ഞെടുപ്പുകളിലും ചാത്തന്നൂര് മണ്ഡലത്തില് യുഡിഎഫിനെ മൂന്നാം സ്ഥാനത്തേക്ക് പിന്തള്ളി ഗോപകുമാര് നല്കിയ കുതിപ്പാണ് ജില്ലയില് എന്ഡിഎക്ക് കരുത്ത് പകര്ന്നത്. അതുവരെ ചാത്തന്നൂര് ബിജെപി സംസ്ഥാന നേതൃത്വത്തിന്റെ പോലും റഡാറിലുള്ള മണ്ഡലമായിരുന്നില്ല. ആ മുന്നേറ്റം വിസ്മയമായിരുന്നു. തുടര്ച്ചയായി രണ്ട് തവണ വിജയത്തിന്റെ പടിവാതിലില്… ഇതാ ഇക്കുറി കാത്തിരുന്ന വിജയം സ്വന്തമാക്കി….
മോദി മോഡല്
ബി.ബി. ഗോപകുമാറിന്റെ ആദ്യ തെരഞ്ഞെടുപ്പ് കാലത്താണ് പുറ്റിങ്ങലില് വെടിക്കെട്ട് ദുരന്തമുണ്ടായത്. അന്നത്തെ മുഖ്യമന്ത്രി എത്തും മുമ്പ് ദല്ഹിയില് നിന്ന് പ്രധാനമന്ത്രി പുറ്റിങ്ങലില് പറന്നിറങ്ങി. ദുരന്തത്തിലകപ്പെട്ടവര്ക്ക് ആശ്വാസം പകര്ന്നു. അദ്ദേഹത്തോടൊപ്പം ബി.ബി. ഗോപകുമാറുമുണ്ടായിരുന്നു. കേന്ദ്ര ആരോഗ്യമന്ത്രിയുടെ നേതൃത്വത്തില് വിദഗ്ധ മെഡിക്കല് സംഘത്തെ ഇവിടെ നിയോഗിച്ചിട്ടാണ് മോദി മടങ്ങിയത്.
ചാത്തന്നൂരിന് മറക്കാനാകില്ല ആ കാരുണ്യസ്പര്ശം…. നരേന്ദ്രമോദിയുടെ നിഴലായി ദുരന്തമേഖലകളില് നടന്നുവന്ന ഗോപന്സാറിനെ അവര്ക്ക് മറക്കാനാകില്ല. മരണപ്പെട്ടവരുടെ ആശ്രിതര്ക്ക് ആശ്വാസമാവുകയായിരുന്നു അദ്ദേഹം.
സൗമ്യം ധീരം
സൗമ്യമാണ് സമരമുഖത്തും ബി.ബി. ഗോപകുമാറിന്റെ മുഖം. പ്രസന്നത മായാത്ത ഇടപെടല്. എന്നാല് പറയേണ്ടത് പറയാന് മടി കാട്ടാത്ത ചങ്കുറപ്പ്. അഴിമതിക്കും അക്രമത്തിനുമെതിരെ കേരളമാകെ ആഞ്ഞടിച്ച പ്രക്ഷോഭക്കൊടുങ്കാറ്റിന് കൊല്ലത്ത് നേതൃത്വം നല്കിയത് ഗോപകുമാറാണ്. സമരത്തിന് നിരവധിയായിരുന്നു മുഖം. മഹിളകള്, യുവാക്കള്, കര്ഷകര്.. പാര്ട്ടിയുടെ എല്ലാ സംവിധാനങ്ങളും സമരത്തിനിറങ്ങി. സമാനതകളില്ലാത്ത ധീരതയോടെ സര്ക്കാരൊരുക്കിയ പ്രതിരോധത്തെ മറികടന്ന് അവര് ഇരച്ചുകയറി. അവര്ക്ക് കരുത്തായി ബി.ബി. ഗോപകുമാര് എന്ന ജനനായകന് നിറഞ്ഞുനിന്നു. പാര്ട്ടിയുടെ ജില്ലാ പ്രസിഡന്റ് എന്ന നിലയില് മുന്നേറ്റത്തിലേക്ക് ഒപ്പമുള്ളവരെ നയിക്കുകയായിരുന്നു അദ്ദേഹം. ഇനി ആ കരുത്തുറ്റ ശബ്ദം നിയമസഭയില് മുഴങ്ങും…
സ്നേഹനിധി
മീനാട് ബാലകൃഷ്ണമന്ദിരത്തില് പരേതരായ ബാലകൃഷ്ണന്റയും പത്മാവതിയുടേയും മകനായ ഗോപകുമാറിന്റെ സഹധര്മ്മിണി എസ്. സീജയാണ്. രണ്ട് മക്കളില് മൂത്ത മകന് ഗൗതംകൃഷ്ണ ആയൂര്വേദ ഡോക്ടറാണ്. ഇളയ മകന് ഗൗരി നന്ദന് കരുനാഗപ്പള്ളി അമൃത ടെക്നിക്കല് യൂണിവേഴ്സിറ്റിയില് ബിടെക് പഠനം പൂര്ത്തിയാക്കി.
