ന്യൂഡൽഹി : പ്രധാനമന്ത്രി നരേന്ദ്ര മോദിയുടെ “മാനസിക നക്സൽ” പരാമർശത്തിനെതിരെ മുതിർന്ന കോൺഗ്രസ് നേതാവും മുൻ കേന്ദ്രമന്ത്രിയുമായ പി. ചിദംബരം . “ഞാൻ ഒരു മാനസിക നക്സൽ ആയതിൽ അഭിമാനിക്കുന്നു” എന്നാണ് ചിദംബരത്തിന്റെ പരാമർശം . ചെങ്കോട്ടയിൽ നിന്നുള്ള പ്രധാനമന്ത്രി മോദിയുടെ സ്വാതന്ത്ര്യദിന പ്രസംഗത്തിന് ശേഷമാണ് ചിദംബരത്തിന്റെ പ്രതികരണം. “മാനസിക നക്സലുകൾ” എന്ന് വിശേഷിപ്പിച്ചവരെക്കുറിച്ച് ജാഗ്രത പാലിക്കണമെന്ന് പ്രധാനമന്ത്രി മോദി തന്റെ പ്രസംഗത്തിൽ രാഷ്ട്രത്തോട് ആഹ്വാനം ചെയ്തിരുന്നു.
വനങ്ങളിൽ ആയുധമെടുക്കുന്ന നക്സലിസത്തിനും മാവോയിസത്തിനുമെതിരായ പോരാട്ടത്തിൽ രാജ്യം ഗണ്യമായ വിജയം കൈവരിച്ചതായി പ്രധാനമന്ത്രി നരേന്ദ്ര മോദി തന്റെ പ്രസംഗത്തിൽ പറഞ്ഞു. എന്നിരുന്നാലും, “മാനസിക നക്സലുകൾ” ഇപ്പോഴും നിലനിൽക്കുന്നുണ്ടെന്നും അവർ എപ്പോഴും അവസരങ്ങൾ തേടുന്നുണ്ടെന്നും അദ്ദേഹം മുന്നറിയിപ്പ് നൽകി. അത്തരം ഘടകങ്ങളെ തിരിച്ചറിഞ്ഞ് ഒറ്റപ്പെടുത്താൻ പ്രധാനമന്ത്രി മോദി ജനങ്ങളോട് അഭ്യർത്ഥിച്ചു. രാജ്യം ഈ വെല്ലുവിളിയെ നിസ്സാരമായി കാണരുതെന്നും അദ്ദേഹം പറഞ്ഞിരുന്നു.
