കൊല്ക്കത്ത: എങ്ങിനെയാണ് വിജയം ആഘോഷിക്കാന് പോകുന്നതെന്ന മാധ്യമപ്രവര്ത്തകരുടെ ചോദ്യത്തിന് മുഖ്യമന്ത്രിയാകാന് പോകുന്ന ബിജെപി നേതാവ് സുവേന്ദു അധികാരി പറഞ്ഞത് താന് മീന്കറികൂട്ടി വിജയം ആഘോഷിക്കുമെന്നാണ്. 293ല് 206 സീറ്റുകളില് വിജയിച്ചെങ്കിലും രാഷ്ട്രീയ പോര് തുടര്ക്കഥയാക്കാനാണ് സുവേന്ദു അധികാരിയുടെ നീക്കം. വോട്ടെടുപ്പിന് മുന്പ് മുഴുവന് ബംഗാളികളിലും ബിജെപിയോട് വെറുപ്പുണ്ടാക്കാന് മമത ഒരു മീന് രാഷ്ട്രീയം എടുത്തിട്ടിരുന്നു. ഗുജറാത്തികളായ മോദിയും അമിത് ഷായും ഒന്നും മീന് കൂട്ടില്ലെന്നും ബിജെപി അധികാരത്തില് വന്നാല് മീന് നിരോധിക്കുമെന്നുമായിരുന്നു മമതയുടെ പ്രചാരണം.
ബംഗാളികള്ക്ക് മീനും മീന്കറിയും ജീവവായുവാണ്. ഇതോടെ ബിജെപി ഏതോ പുറം നാട്ടുകാരുടെ പാര്ട്ടിയാണെന്ന് കരുതി എല്ലാ ബംഗാളികളും തൃണമൂലിന് വോട്ട് ചെയ്യുമെന്ന് മമത കരുതി. പക്ഷെ ബിജെപിയുടെ കേന്ദ്രനേതാവായ അനുരാഗ് താക്കൂര് ബംഗാളില് പ്രചാരണം കൊഴുപ്പിച്ചത് ഒരു റെസ്റ്റോറന്റില് എത്തി മീന്കറി കൂട്ടുന്ന വീഡിയോ പങ്കുവെച്ചുകൊണ്ട് ആയിരുന്നു. ഇത് ബംഗാളിലാകെ വൈറലായി. ഇതോടെ മമതയുടെ ബിജെപി മീന് നിരോധിക്കുമെന്ന പ്രചാരണം പൊളിഞ്ഞു. ഇതിന് പിന്നാലെ പ്രധാനമന്ത്രി നരേന്ദ്ര മോദി ഒരു ത്സാല്മുരി കച്ചവടക്കാരനുമായി സംസാരിച്ചത് ബിജെപിയും തൃണമൂലും തമ്മിലുള്ള വാക്പോരിന് കാരണമായി.
ഇപ്പോഴിതാ മീന് രാഷ്ട്രീയം അവിടംകൊണ്ട് നിര്ത്താന് സുവേന്ദു അധികാരി ഉദ്ദേശിക്കുന്നില്ല. അതുകൊണ്ടാണ് എങ്ങിനെയാണ് വിജയം ആഘോഷിക്കാന് പോകുന്നതെന്ന മാധ്യമപ്രവര്ത്തകരുടെ ചോദ്യത്തിന് ത്സാല്മുരിയും മീന്കറിയും കൂട്ടി വിജയം ആഘോഷിക്കുമെന്ന് മറുപടി നല്കിത്. ഈ പ്രതികരണത്തിലൂടെ സുവേന്ദു അധികാരി ബോധപൂര്വ്വം മമതയ്ക്ക് രാഷ്ട്രീയമായ മറുപടി കൊടുക്കുകയായിരുന്നു.
മലരും കപ്പലണ്ടിയും ഉള്ളിയും തക്കാളിയും അരിഞ്ഞതും ചേര്ത്തുണ്ടാക്കുന്നതാണ് ത്സാല്മുരി. ഈ ത്സാല്മുരി മീന്കറി കൂട്ടികഴിക്കുന്നത് ബംഗാളികള്ക്ക് വലിയ ഇഷ്ടമാണ്. സുവേന്ദു അധികാരി ഈ പ്രസ്താവനയിലൂടെ ബിജെപി സാധാരണ ബിജെപിയ്ക്കാരുടെ വികാരമാണെന്ന സന്ദേശമാണ് നല്കിയത്.
ഉരുളയ്ക്ക് ഉപ്പേരി കൊടുത്ത് കൊണ്ട് കഴിഞ്ഞ അഞ്ച് വര്ഷം മമതയ്ക്കെതിരെ സുവേന്ദു അധികാരി നടത്തിയ രാഷ്ട്രീയ യുദ്ധം തന്നെയാണ് ബംഗാളില് മമതയുടെ കോട്ട തകര്ക്കാന് വലിയ ഒരളവില് സഹായകമായത്.
