തിരുവനന്തപുരം: മഹാകവി കുമാരനാശാന് ജനിച്ച തൊമ്മന്‍വിളാകം തറവാട്ടില്‍ മീന്‍ചന്ത തുടങ്ങാനുള്ള ഒത്താശ നല്‍കിയത് പഞ്ചായത്തിലെ ഇടത് ഭരണസമിതി. ചന്ത അനുവദിച്ചത് 2020-25 ലെ ഭരണസമിതിയും പള്ളി കമ്മിറ്റി ഭാരവാഹികളും തമ്മിലുള്ള രഹസ്യ ധാരണയില്‍. തൊമ്മന്‍വിളാകത്ത് തറവാട് നിലനിന്ന സ്ഥലം പള്ളിയുടെ പുരയിടമാണെന്ന നിലയില്‍ ചന്തനിര്‍മാണത്തിന് അനുമതി നല്‍കിയത് കായിക്കര കുമാരനാശാന് സ്മാരകം സെക്രട്ടറി പഞ്ചായത്ത് പ്രസിഡന്റായിരിക്കെ.
ഇടത് രാഷ്‌ട്രീയ ഭിഷാംദേഹികളുടെ അഭയസങ്കേതമായിത്തീര്‍ന്ന കായിക്കര കുമാരനാശാന് സ്മാരകത്തിന്റെ നിലവിലെ സെക്രട്ടറി വി. ലൈജു പഞ്ചായത്ത് പ്രസിഡന്റായിരുന്ന 2020- 25 ലാണ് ആശാന്റെ തറവാട് വക ഭൂമി പള്ളികമ്മിറ്റി പൂര്‍ണമായും കൈയടക്കിയത്. ഏതാനും വര്‍ഷം മുമ്പുവരെ കായിക്കര സ്മാരകത്തില്‍ കുമാരനാശാന്റെ ജന്മവാര്‍ഷികം ആഘോഷിക്കുമ്പോള്‍ നിലവില്‍ ചന്തനിര്‍മാണത്തിന് ഒരുക്കിയിരിക്കുന്ന വസ്തുവിലെത്തി പുഷ്പാര്‍ച്ചന നടത്തിയ ശേഷമായിരുന്നു പരിപാടികള്‍ ആരംഭിച്ചിരുന്നത്. രണ്ടേക്കറിലധികം ഉണ്ടായിരുന്ന വസ്തുക്കളില്‍ തറവാടിരുന്ന ഭാഗം ഒഴികെ ഭാഗംവച്ച് കിട്ടിയ അവകാശികള്‍ മറിച്ചുവിറ്റിരുന്നു. തറവാട് ഭാഗം കുമാരനാശാന്റെ മക്കളില്ലാത്ത ഇളയമ്മയ്‌ക്ക് ലഭിച്ചു. അതാണ് അവകാശികളില്ലാതെ അന്യം നിന്നത്. കാലങ്ങളായി നോക്കാനാളില്ലാതെ കാടുപിടിച്ചുകിടന്ന വസ്തുവാണ് പള്ളിക്കമ്മിറ്റിയും പഞ്ചായത്ത് ഭരണസമിതിയും ചേര്‍ന്ന് കൈയടക്കിയത്. ഉടമസ്ഥത തെളിയിക്കുന്ന യാതൊരു രേഖകളും ഇല്ലാതെയാണ് പള്ളിക്കമ്മിറ്റിക്ക് ചന്തനിര്‍മാണത്തിന് പഞ്ചായത്ത് അനുമതി നല്‍കിയതെന്ന് നാട്ടുകാര്‍ പറയുന്നു. ഇതുമായി ബന്ധപ്പെട്ട് നിരവധി തവണ കോസ്റ്റല്‍ പോലീസ് സ്റ്റേഷനിലുള്‍പ്പെടെ നാട്ടുകാര്‍ പരാതി നല്‍കിയിരുന്നെങ്കിലും ഇടതു രാഷ്‌ട്രീയ സമ്മര്‍ദത്തെത്തുടര്‍ന്ന് പരാതി എങ്ങും എത്തിയില്ല.
പിറന്ന നാട്ടില്‍ കുമാരനാശാന് സ്മാരകം വേണമെന്ന ചിന്തവന്നപ്പോള്‍ പഴയൊരു താമരക്കുളം സ്ഥിതിചെയ്തിരുന്ന പ്രദേശം സര്‍ക്കാര്‍ ഏറ്റെടുക്കുകയായിരുന്നു. വിദ്യാഭ്യാസ മന്ത്രിയായിരുന്ന പ്രൊഫ. ജോസഫ് മുണ്ടശ്ശേരി മുന്‍കൈയെടുത്താണ് 1958 ല്‍ ഈ പ്രദേശം ഏറ്റെടുത്ത് കുളം നികത്തി സ്മാരക നിര്‍മാണത്തിന് തുടക്കമിട്ടത്.
അതേസമയം ചന്ത പണിയുന്നത് പള്ളിക്കമ്മിറ്റിയുടെ സ്ഥലത്താണെന്നും കുമാരനാശാന് ജനിച്ചത് അതിനടുത്ത് മറ്റെവിടെയോ ആണെന്നുമാണ് മുന്‍ പഞ്ചായത്ത് പ്രസിഡന്റും നിലവില്‍ കായിക്കര ആശാന്‍ സ്മാരകത്തിന്റെ സെക്രട്ടറിയുമായ വി. ലൈജു പറയുന്നത്. കുമാരനാശാന് ജനിച്ച വീട് താന്‍ കണ്ടിട്ടുപോലുമില്ലെന്നും ഇപ്പോള്‍ സ്മാരകം ഇരിക്കുന്നിടത്തല്ല കുമാരനാശാന് ജനിച്ചതെന്നും ലൈജു കൂട്ടിച്ചേര്‍ത്തു.
