രാവിലെ കാണുന്ന സ്വപ്നങ്ങൾ യാഥാർഥ്യമാകുമെന്നാണ് വിശ്വാസം. കാണുന്ന സ്വപ്നങ്ങളുടെ അർഥം അറിയണമെങ്കിൽ, അത് ഓർത്തിരിക്കണം. പലരും സ്വപ്നം കണ്ടത് മറന്നു പോകുകയാണ് പതിവ്.
സ്വപ്നങ്ങൾക്ക് പല അർഥങ്ങളാണുള്ളത്. അവ പലപ്പോഴും നമ്മുടെ ജീവിതവുമായി ബന്ധപ്പെട്ടിരിക്കുന്നു. പല സ്വപ്നങ്ങളിലും കഴിഞ്ഞ കാലവുമായി ബന്ധമുളള കാര്യമോ അല്ലെങ്കിൽ ഭാവിയിൽ സംഭവിക്കാനിടയുള്ള കാര്യമോ ആകാം നാം കാണുന്നത്. സ്വപ്നങ്ങൾ ചിലപ്പോൾ യാഥാർഥ്യമാകാറുണ്ട്. ചിലത് ഉടനെ നടക്കാറുമുണ്ട്. മറ്റുചിലത് കുറച്ച് കഴിഞ്ഞാകാം സംഭവിക്കുന്നത്. ജ്യോതിഷമനുസരിച്ച് സ്വപ്നങ്ങൾ വരാനിരിക്കുന്ന കാര്യങ്ങളെകുറിച്ചുള്ള സൂചനയാണ് തരുന്നത്.
പാമ്പിനെ സ്വപ്നത്തിൽ കണ്ടാൽ അത് ശുഭസൂചകമാണ്. അത് ജീവിതത്തിൽ സന്തോഷവും ഐശ്വര്യവും വരുമെന്നതിന്റെ സൂചന നൽകുന്നു. പാമ്പിനെ സ്വപ്നത്തിൽ കണ്ടാൽ മുരുകന് വഴിപാടുകൾ നടത്താം. പാമ്പിനെ സ്വപ്നം കാണുന്നത് ഗുണാനുഭവങ്ങൾ നൽകും. പാമ്പ് കൊത്തുന്നതായി സ്വപ്നം കണ്ടാല് ഐശ്വര്യവും സമ്പത്തും വർധിക്കും എന്നാണ് പഴമക്കാർ പറയുന്നത്.പാമ്പ് കടിച്ചു കാലില് നിന്നു ചോര ഒലിക്കുന്നതായി സ്വപ്നം കണ്ടാൽ കഷ്ടകാലം നീങ്ങി ജീവിതത്തിൽ ശുഭാനുഭവങ്ങൾ ഉണ്ടാവാൻ പോകുന്നു എന്നതിന്റെ സൂചനയാണ്.
ഇഴഞ്ഞു നീങ്ങുന്ന പാമ്പിനെ സ്വപ്നം കണ്ടാൽ വിഷഭോജനത്തിനും രോഗങ്ങൾക്കും കുടുംബാംഗങ്ങൾക്ക് അരിഷ്ടതയും ഉണ്ടാവുമെന്നാണ് വിശ്വാസം. പാമ്പ് ശരീരത്തിലേക്ക് വീഴുന്നതായി സ്വപ്നം കണ്ടാൽ സമൃദ്ധിയും സർവൈശ്വര്യവുമാണ് ഫലം. പാമ്പിനെ ഉപദ്രവിക്കുന്നതോ ഏതെങ്കിലും രീതിയില് ഭയപ്പെടുത്തുന്നതോ ആയി സ്വപ്നം കാണുകയാണെങ്കിൽ സാമ്പത്തിക ബുദ്ധിമുട്ട് ഉടൻ പ്രതീക്ഷിക്കാം.
പാമ്പിനെ മറ്റുള്ളവർ കൊല്ലുന്നതായി കണ്ടാൽ ശത്രുക്കൾ കുറയും. പാമ്പുകൾ നിറഞ്ഞ കുഴിയിൽ വീഴുന്നതായായി കണ്ടാൽ ജീവിതത്തിൽ തകർച്ചയുണ്ടാവാൻ പോകുന്നു എന്നാണ് വിശ്വാസം. കാലിൽ പാമ്പു ചുറ്റുകയും അതിനെ എത്രകുടഞ്ഞിട്ടും കാലിൽനിന്നു മോചിപ്പിക്കാൻ സാധിക്കാത്തതാണ് സ്വപ്നം കാണുന്നതെങ്കിൽ കഷ്ടകാലമാണെന്നാണ് വിശ്വാസം
പാമ്പിനെ കണ്ടു പേടിച്ചു ഓടുന്നതുകണ്ടാൽ ജീവിത പ്രശ്നങ്ങളിൽ നിന്ന് ഒളിച്ചോടാൻ ശ്രമിക്കുന്നതിന്റെ സൂചനയാണ്. കരിനാഗം ദംശിക്കുന്നതായി സ്വപ്നം കണ്ടാൽ ആയുർ ദോഷമുണ്ടാകുമെന്നു പഴമക്കാർ വിശ്വസിക്കുന്നു.
.
