ഗുജറാത്തിലെ പ്രാദേശിക സ്വയംഭരണ സ്ഥാപന തെരഞ്ഞെടുപ്പില്‍ ബിജെപി നേടിയിരിക്കുന്നത് ഐതിഹാസിക വിജയമാണ്. ആകെയുള്ള പതിനഞ്ച് മുനിസിപ്പല്‍ കോര്‍പറേഷനുകളില്‍ ഒന്നൊഴിയാതെ സമാനതകളില്ലാത്ത വിജയമാണ് ബിജെപി നേടിയിരിക്കുന്നത്.
ഗ്രാമങ്ങളെന്നോ നഗരങ്ങളെന്നോ വ്യത്യാസമില്ലാതെ ബിജെപി സ്ഥാനാര്‍ത്ഥികള്‍ ജയിച്ചുകയറി. ശക്തികേന്ദ്രങ്ങളില്‍ ബിജെപി സ്വാധീനം വര്‍ദ്ധിപ്പിച്ചിരിക്കുകയാണ്. കഴിഞ്ഞ തവണത്തെ പ്രാദേശിക സ്വയംഭരണ സ്ഥാപന തെരഞ്ഞെടുപ്പുമായി താരതമ്യം ചെയ്യുമ്പോള്‍ ബിജെപി സീറ്റുകളുടെ എണ്ണം വന്‍തോതില്‍ വര്‍ധിച്ചപ്പോള്‍ കോണ്‍ഗ്രസിനും ആം ആദ്മി പാര്‍ട്ടിക്കും വലിയ തിരിച്ചടിയാണുണ്ടായത്. തങ്ങള്‍ നില മെച്ചപ്പെടുത്തുമെന്ന കോണ്‍ഗ്രസിന്റെയും, കാര്യമായ മുന്നേറ്റം ഉണ്ടാക്കുമെന്ന ആം ആദ്മി പാര്‍ട്ടിയുടെയും അവകാശവാദങ്ങള്‍ തകര്‍ന്നടിഞ്ഞിരിക്കുന്നു.
മുനിസിപ്പല്‍ കോര്‍പ്പറേഷനുകളിലുടനീളം ബിജെപിയുടെ പ്രകടനം കണ്ണഞ്ചിപ്പിക്കുന്നതാണ്. സംസ്ഥാനത്തുടനീളം 15 മുനിസിപ്പല്‍ കോര്‍പ്പറേഷനുകളെയും ബിജെപി സ്വന്തമാക്കി. 2021ലെ തെരഞ്ഞെടുപ്പിനെ അപേക്ഷിച്ച് വോട്ട് വിഹിതത്തിലും സീറ്റെണ്ണത്തിലും ബിജെപി ബഹുദൂരം മുന്നോട്ട് പോയി.
കഴിഞ്ഞ തവണ 483 സീറ്റു നേടിയ ബിജെപി ഇപ്പോള്‍ 937 ആയാണ് വര്‍ദ്ധിപ്പിച്ചിരിക്കുന്നത്. വലിയ നേട്ടമുണ്ടാക്കുമെന്ന് കരുതിയ ആം ആദ്മി പാര്‍ട്ടിയുടെ 27 സീറ്റ് ഇക്കുറി വെറും നാല് സീറ്റുകളിലേക്കാണ് ചുരുങ്ങിയത്. മുനിസിപ്പാലിറ്റികളിലും ജില്ലാ പഞ്ചായത്തുകളിലും ബിജെപി ശക്തമായ മുന്നേറ്റമാണ് കാഴ്ചവച്ചത്.
ഗുജറാത്തിലെ നഗര മേഖലകളിലാണ് ബിജെപിയുടെ ഏറ്റവും ശക്തമായ പ്രകടനം ദൃശ്യമായിരിക്കുന്നത്. അഹമ്മദാബാദില്‍ 192ല്‍ 160 സീറ്റുകള്‍ നേടിയ ബിജെപി മോര്‍ബിയിലും പോര്‍ബന്ദറിലും സമ്പൂര്‍ണ്ണ വിജയം കൈവരിച്ചു. പുതിയതായി രൂപീകരിച്ച വാപ്പി, നവസാരി കോര്‍പ്പറേഷനുകളിലും ബിജെപി വിജയക്കൊടി പാറിച്ചു.
കഴിഞ്ഞ തവണത്തെ അപേക്ഷിച്ച് ചിലയിടങ്ങളില്‍ കോണ്‍ഗ്രസിന് സീറ്റു നേടാന്‍ കഴിഞ്ഞിട്ടുണ്ടങ്കിലും ബിജെപിയുമായി താരതമ്യം ചെയ്യുമ്പോള്‍ വളരെ പിന്നിലാണ്. ഒരു പ്രധാന നഗര സ്ഥാപനത്തിലും കോണ്‍ഗ്രസിന് നിയന്ത്രണം നേടാന്‍ കഴിഞ്ഞില്ല. ഇതിലും ദയനീയമാണ് ആം ആദ്മി പാര്‍ട്ടിക്കുണ്ടായ തിരിച്ചടി.
സൂറത്തില്‍ കഴിഞ്ഞ തവണ കിട്ടിയ 27 സീറ്റ് നാല് സീറ്റായി കുറഞ്ഞത് ഇതിന് തെളിവാണ്. നഗര മേഖലയില്‍ ഈ പാര്‍ട്ടിയുണ്ടാക്കിയ സ്വാധീനം ഇല്ലാതായിരിക്കുന്നു. കോണ്‍ഗ്രസ് പരാജയപ്പെട്ടിടത്ത് ബിജെപിക്ക് ബദലായി ഉയര്‍ന്നുവരാമെന്ന ആം ആദ്മി പാര്‍ട്ടിയുടെ മോഹം തകര്‍ന്നിരിക്കുന്നു. തെരഞ്ഞെടുപ്പ് കാലത്തുതന്നെ ആം ആദ്മി പാര്‍ട്ടിയുടെ പല സ്ഥാനാര്‍ത്ഥികളും മത്സരത്തില്‍ നിന്ന് പിന്‍വാങ്ങിയിരുന്നു. ഇതിന്റെ പ്രതിഫലനമാണ് തെരഞ്ഞെടുപ്പ് ഫലത്തില്‍ കാണുന്നത്.
ഏറ്റവും കൂടുതല്‍ സീറ്റുകളില്‍ മത്സരിച്ച ബിജെപിക്ക് ഉയര്‍ന്ന വിജയനിരക്കാണുള്ളത്. പ്രത്യേകിച്ച് മുനിസിപ്പല്‍ കോര്‍പ്പറേഷനുകളില്‍. കോണ്‍ഗ്രസ് വ്യാപകമായി മത്സരിച്ചെങ്കിലും വിജയനിരക്ക് തീരെ കുറവാണ്. കോണ്‍ഗ്രസിന്റെ പരാജയം പാര്‍ട്ടി നേതാവ് രാഹുലിന്റെ പരാജയംകൂടിയാണ്. പതിവുപോലെ കോണ്‍ഗ്രസിന്റെ പ്രചാരണം നയിച്ചത് രാഹുലാണ്. കേന്ദ്രസര്‍ക്കാരിനെയും പ്രധാനമന്ത്രി നരേന്ദ്ര മോദിയെയുമാണ് രാഹുല്‍ വിമര്‍ശന വിധേയമാക്കിയത്. ഇതൊന്നും ഗുജറാത്തിലെ ജനങ്ങള്‍ അംഗീകരിച്ചില്ലെന്ന് ഒരിക്കല്‍ കൂടി വ്യക്തമായിരിക്കുന്നു.
അതേസമയം, ഗുജറാത്തില്‍ കാവി തരംഗം തുടരുകയാണ്. അടുത്ത വര്‍ഷം നടക്കുന്ന നിയമസഭാ തെരഞ്ഞെടുപ്പിന്റെ തിരനോട്ടമാണ് പ്രാദേശിക സ്ഥാപന തെരഞ്ഞെടുപ്പില്‍ കാണുന്നത്.
ജന്മഭൂമി ഓണ്‍ലൈന്‍