കൊച്ചി : കണ്ണൂര്‍ അഞ്ചരക്കണ്ടി ദന്തല്‍ കോളേജ് വിദ്യാര്‍ത്ഥി നിതിന്‍രാജിന്റെ മരണവുമായി ബന്ധപ്പെട്ട ഹര്‍ത്താലില്‍ 29 കേസുകള്‍ രജിസ്റ്റര്‍ ചെയ്തതായി സംസ്ഥാന പൊലീസ് മേധാവി ഹൈക്കോടതിയെ അറിയിച്ചു.നൂറോളം പേരെ അറസ്റ്റ് ചെയ്തു. കേസ് അവധിയ്‌ക്ക് ശേഷം കോടതി പരിഗണിക്കും. ഇന്നത്തെ ഹര്‍ത്താലിനെതിരെ ഹൈക്കോടതി സ്വമേധയാ കേസ് എടുത്തിരുന്നു. ഹര്‍ത്താല്‍ ആഹ്വാനം ചെയ്തവര്‍ക്ക് നോട്ടീസും അയച്ചു.
ദളിത് സംഘടനകള്‍ ആഹ്വാനം ചെയ്ത ഹര്‍ത്താലില്‍ പ്രതിഷേധമിരമ്പി.ജാതി അധിക്ഷേപം നേരിട്ട നിതിന്‍രാജിന് നീതി ലഭ്യമാക്കണം എന്നാവശ്യപ്പെട്ടാണ് രാവിലെ ആറ് മണി മുതല്‍ വൈകിട്ട് ആറ് വരെ ഹര്‍ത്താല്‍ നടത്തിയത്. സെക്രട്ടേറിയറ്റിലേക്ക് ഉള്‍പ്പടെ ദളിത് സംഘടനകള്‍ പ്രതിഷേധ പ്രകടനം നടത്തി.
സംസ്ഥാനവ്യാപകമായി സമരക്കാര്‍ വാഹനങ്ങള്‍ തടഞ്ഞു. തിരുവനന്തപുരം, കൊല്ലം, കോട്ടയം, കോഴിക്കോട് എന്നിവിടങ്ങളില്‍ ഹര്‍ത്താല്‍ അനുകൂലികള്‍ കെഎസ്ആര്‍ടിസി ബസുകള്‍ തടഞ്ഞു.മിക്കയിടത്തും വാഹനങ്ങള്‍ പിന്നീട് കടത്തിവിട്ടു. ദീര്‍ഘദൂരയാത്രക്കാരും രോഗികളുമാണ് ഹര്‍ത്താലില്‍ ഏറെ വലഞ്ഞത്.
