കൊച്ചി: തമിഴ്നാട് രാഷ്ട്രീയത്തിലെ പശ്ചാത്തലത്തില് മമ്മൂട്ടിയെ രാഷ്ട്രീയവിവാദത്തില് കുടുക്കാനുള്ള മാധ്യമങ്ങളുടെ ശ്രമത്തിന് തിരിച്ചടി. തമിഴ്നാട്ടില് വിജയ് രാഷ്ട്രീയത്തിലേക്കിറങ്ങിയതിന്റെ പശ്ചാത്തലത്തിലാണ് തന്റെ പുതിയ സിനിമയുടെ പ്രൊമോഷന് വേണ്ടി തമിഴ്നാട്ടില് എത്തിയ മമ്മൂട്ടിയോട് മാധ്യമപ്രവര്ത്തകര് ചോദ്യങ്ങള് ചോദിച്ചത്.
ഇതിന് മമ്മൂട്ടി നല്കിയ മറുപടി ഇപ്പോള് സമൂഹ മാധ്യമങ്ങളിലെ ചർച്ചയാണ്. ‘വിജയ്യുടെ രാഷ്ട്രീയത്തെ എങ്ങനെ നോക്കി കാണുന്നു?’ എന്നായിരുന്നു ചോദ്യം. ‘ഒന്നുമേ തെരിയാത്’ എന്നായിരുന്നു മമ്മൂട്ടിയുടെ പ്രതികരണം. തന്റെ പുതിയ സിനിമയായ പേട്രിയറ്റിന്റെ പ്രചരണാർത്ഥം തമിഴ്നാട്ടില് എത്തിയതായിരുന്നു മമ്മൂട്ടി.
വയനാട്ടില് ഇടത് സര്ക്കാര് പണിത് നല്കിയ വീടുകള് കാണാന് പോയ മമ്മൂട്ടി സിപിഎമ്മിന്റെ വയനാട് ജില്ലാസെക്രട്ടറി റഫീഖിനോട് മാറിനില്ക്കാന് പറഞ്ഞത് വലിയ വിവാദമായിരുന്നു. ഇതോടെ രാഷ്ട്രീയത്തില് നിന്നും പാടെ ഒഴിഞ്ഞുനില്ക്കാനാണ് സൂപ്പര് താരത്തിന്റെ തീരുമാനം. മാത്രമല്ല, മാത്രമല്ല, കോണ്ഗ്രസ് പോലും നല്കാത്ത പത്മവിഭൂഷണ് അംഗീകാരം മമ്മൂട്ടിയ്ക്ക് നല്കാന് മോദി സര്ക്കാര് തീരുമാനിച്ചതോടെ ഒരു രാഷ്ട്രീയത്തേയും പിണക്കേണ്ടെന്നും മമ്മൂട്ടി ആഗ്രഹിക്കുന്നു.
പതിനെട്ട് വർഷങ്ങള്ക്ക് ശേഷം മമ്മൂട്ടിയും മോഹൻലാലും ഒന്നിക്കുന്ന ചിത്രമാണ് പേട്രിയറ്റ്. കുഞ്ചാക്കോ ബോബൻ നായകനായി എത്തിയ അറിയിപ്പ് എന്ന ചിത്രത്തിന് ശേഷം മഹേഷ് നാരായണൻ സംവിധാനം ചെയ്യുന്ന ചിത്രമാണ് പേട്രിയറ്റ്. ഫഹദ് ഫാസില്, കുഞ്ചാക്കോ ബോബൻ, നയൻതാര, രേവതി, ഗ്രേസ് ആന്റണി, ദർശന രാജേന്ദ്രൻ, രാജീവ് മേനോൻ തുടങ്ങീ വമ്പൻ താരനിരയാണ് പേട്രിയറ്റില്.
