കാസര്‍ഗോഡ്: എളേരിത്തട്ട് നാലര വയസുള്ള കുട്ടിയെ പാമ്പ് കടിച്ചു. കളിക്കുന്നതിനിടെയാണ് മൂര്‍ഖന്‍ പാമ്പ് കടിച്ചത്. കുട്ടിയെ പരിയാരം ഗവ മെഡിക്കല്‍ കോളേജ് ആശുപത്രിയിലേക്ക് മാറ്റി.
കുട്ടി തീവ്ര പരിചരണ വിഭാഗത്തില്‍ ചികിത്സയിലാണ്. എളേരിത്തട്ട് കുറുവാട്ടെ ശരത്- അജിത ദമ്പതികളുടെ മകള്‍ ഋതു ചന്ദ്രയ്‌ക്കാണ് പാമ്പ് കടിയേറ്റത്.
കളിക്കുന്നതിനിടെ പന്ത് സമീപത്തെ പറമ്പിലേക്ക് പോയി.പന്തെടുക്കാന്‍ പോയപ്പോഴാണ് പെണ്‍കുട്ടിക്ക് മൂര്‍ഖന്‍ പാമ്പിന്റെ കടിയേറ്റത്. ഉടന്‍ നര്‍ക്കിലക്കാട്ടെ ആശുപത്രിയില്‍എത്തിച്ചുവെങ്കിലും നില ഗുരുതരമായതിനാലാണ് പരിയാരത്തേക്ക് മാറ്റിയത്.
സംസ്ഥാനത്ത് ഇന്ന് വിവിധ ജില്ലകളിലായി നിരവധി പേര്‍ക്കാണ് പാമ്പ് കടിയേറ്റത്.കോഴിക്കോട് പേരാമ്പ്ര കണ്ണിപ്പൊയില്‍ ചിത്രാഞ്ജലിയില്‍ ശിവദാസന്റെ മകള്‍ അഞ്ജലി (36), താമരശേരി പൂനൂര്‍ സ്വദേശി മുഹമ്മദ് അന്‍സാര്‍ (22), തിരുവനന്തപുരം പെരുംകുഴി സ്വദേശി ഭുവന ചന്ദ്രന്‍ എന്നിവര്‍ക്കാണ് കടിയേറ്റത്. മൂന്ന് പേരും ആശുപത്രിയില്‍ ചികിത്സയില്‍ കഴിയുകയാണ്.
ഇരിങ്ങാലക്കുട കാറളത്തും രണ്ടുപേര്‍ക്ക് പാമ്പ് കടിയേറ്റു. കാറളം പുല്ലത്തറ വെള്ളേപ്പറമ്പില്‍ വീട്ടില്‍ പ്രസീത, നടവരമ്പ് സ്വദേശിയായ പിടുക്കാട്ടില്‍ സനീഷ് എന്നിവര്‍ക്കാണ് കടിയേറ്റത്. മലപ്പുറം എടപ്പാളില്‍ 21കാരിയായ ഷഹല തസ്നിക്കും പാമ്പ് കടിയേറ്റു.
കോഴിക്കോട് കുറ്റ്യാടിയില്‍ വീടിനുള്ളില്‍ അഞ്ച് വിഷപ്പാമ്പുകളെ കണ്ടെത്തി. കുറ്റ്യാടി മേത്തലെ കാപ്പുമ്മല്‍ രമേശന്റെ വീട്ടിലാണ് പാമ്പുകളെ കണ്ടെത്തിയത്. ശംഖുവരയന്‍ ഇനത്തില്‍പെട്ട പാമ്പുകളെയാണ് വിവിധ മുറികളില്‍ നിന്ന് പിടികൂടിയത്. കുട്ടികള്‍ കിടന്നുറങ്ങുന്ന കിടക്കയിലായിരുന്നു വീട്ടുകാര്‍ ആദ്യം പാമ്പിനെ കണ്ടത്. പിന്നാലെ തൊട്ടടുത്ത മുറിയില്‍ നിന്ന് വീണ്ടും പാമ്പിനെ കണ്ടെത്തി. ശുചിമുറിയില്‍ കയറിയപ്പോള്‍ അവിടെനിന്നും ശംഖുവരയന്‍ ഇനത്തില്‍ പെട്ട പാമ്പിനെ കിട്ടി. ഇതോടെയാണ് വീട്ടില്‍ കൂടുതല്‍ പരിശോധന നടത്തിയത്. ആകെ അഞ്ച് പാമ്പുകളെയാണ് കണ്ടെത്തിയത്.
