തൃശൂര്: മേട സൂര്യന് കത്തിജ്വലിച്ചു നിന്ന നട്ടുച്ചയ്ക്കായിരുന്നു പാറമേക്കാവ് ഭഗവതിയുടെ പൂരം പുറപ്പാട്. തൃക്കടവൂര് ശിവരാജുവിന്റെ പുറത്തേറി ഇലഞ്ഞിത്തറ മേളത്തിനായി വടക്കുംനാഥ ക്ഷേത്രത്തിലേക്ക് .
ചെമ്പട താളത്തിന്റെ അകമ്പടിയോടെ ക്ഷേത്രത്തിന് പുറത്തേക്ക് എഴുന്നള്ളിയ ഭഗവതി അവിടെനിന്ന് നടപ്പാണ്ടിയോടെ കിഴക്കേ ഗോപുര നട വഴി വടക്കുംനാഥ മതില്ക്കകത്ത് പ്രവേശിച്ചു. തുടര്ന്ന് ഇലഞ്ഞിമരച്ചോട്ടില് എത്തി ആനകളും വാദ്യക്കാരും നിരന്നതോടെ ഇലഞ്ഞിത്തറ മേളത്തിന് ആദ്യ കോല്വീണു. കിഴക്കൂട്ട് അനിയന് മാരാര് ഇലഞ്ഞിത്തറമേളത്തിന് പ്രമാണിയായി. 300 ലേറെ വാദ്യ കലാകാരന്മാര് അണിനിരന്നു. നാലരയോടെ ഇലഞ്ഞിത്തറമേളം കലാശിച്ച് പാറമേക്കാവ് ഭഗവതി കുടമാറ്റത്തിനായി തെക്കേഗോപുരം വഴി തെക്കോട്ടിറങ്ങി.
