ഏതു വ്യക്തിയുടേയും ജാതകത്തില് വ്യാഴന് ശുഭരാശി, ഭാവസ്ഥിതനാണെങ്കില്, ജാതകന് കീര്ത്തിമാനുംധനവാനുമായിത്തീരും. ശുഭഗ്രഹമാണെങ്കിലും ജാതകവശാല് ചിലപ്പോള് വ്യാഴം മാരകനായിത്തീരാം.
അങ്ങന വന്നാല് വ്യാഴത്തേക്കാള് കൊടിയമാരകനില്ലെന്നും അറിയണം. വ്യാഴാഴ്ചകളിലും ഉത്തരായനത്തിലും സ്വക്ഷേത്രങ്ങളായ ധനു, മീനം രാശികളിലും ഉച്ചരാശിയായ കര്ക്കടകത്തിലും ലഗ്നം 4, 10 ഭാവങ്ങളിലും വ്യാഴത്തിന് പ്രത്യേക ബലമുണ്ടാവും. ഏഴാമിടം കേന്ദ്ര സ്ഥാനമാണെങ്കിലും വ്യാഴത്തിന് അത്ര ബലം ഈ ഭാവത്തില് കല്പിച്ചു കാണുന്നില്ല.
ബുദ്ധിക്കും യുക്തിക്കും അതീതമായ ആത്മീയ, ദാര്ശനിക ചിന്തകളുടെയും ധര്മ്മാനുഷ്ഠാനങ്ങളുടേയും സാഹിത്യത്തിന്റെയും സന്താനത്തിന്റെയും ധനത്തിന്റെയും കാരകന് കൂടിയാണ് വ്യാഴം. വ്യാഴവും ശുക്രനും യോഗം ചെയ്താല് വ്യാഴത്തിന്റെ ഫലദാനശേഷി കുറയുകയും ശുക്രന്റെ ഫലദാനശേഷി കൂടുകയും ചെയ്യും.
കുജക്ഷേത്രങ്ങളായ മേടത്തിലോ വൃശ്ചികത്തിലോ ആണ് വ്യാഴം നില്ക്കുന്നതെങ്കില് ജാതകന് എവിടെയും നായകസ്ഥാനം ലഭിക്കുന്നവനാവും. ഭാര്യ ധര്മ്മിഷ്ഠയായിരിക്കും. ബുധക്ഷേത്രങ്ങളായ മിഥുനത്തിലോ കന്നിയിലോ ആണ് വ്യാഴമെങ്കില് പുത്രന്മാരും ബന്ധുബലവും ഉന്നതസ്ഥാനലബ്ധിയും ഉണ്ടാകും. ഉച്ചക്ഷേത്രമായ കര്ക്കടകത്തിലോ ശനിക്ഷേത്രമായ കുംഭത്തിലോ ആണ് വ്യാഴമെങ്കില് ജാതകന് ഉന്നത വിദ്യയും സല്ക്കളത്രലാഭവും ഉത്തമഗൃഹവും ഉണ്ടാകും. സൂര്യക്ഷേത്രമായ ചിങ്ങത്തില് വ്യാഴം നിന്നാല് കുലമുഖ്യനും ഭാഗ്യാനുഭവങ്ങളുള്ളവനും കീര്ത്തിമാനുമാകും. ശനിയുടെ രാശിയായ മകരം വ്യാഴത്തിന് നീചരാശിയാണ്. അവിടെ ഉചിതമല്ലാത്ത വ്യാഴം നിന്നാല് ജാതകന് ദേഹസുഖം കുറഞ്ഞവനും ഉചിതമല്ലാത്ത പ്രവൃത്തികള് ചെയ്യുന്നവനും ധനപരമായ ക്ളേശങ്ങള് അനുഭവപ്പെടുന്നവനും ആയിരിക്കും.
ശുക്രക്ഷേത്രമായ ഇടവത്തിലോ, തുലാത്തിലോ ആണ് വ്യാഴം നില്ക്കുന്നതെങ്കില് ശരീരസുഖവും സമ്പത്തും ബന്ധുബലവും ഉള്ളവനായി ഭവിക്കും. ജാതകന് ഉദാരഹൃദയനുമായിരിക്കും. വ്യാഴം സ്വക്ഷേത്രങ്ങളായ ധനുവിലോ മീനത്തിലോ ആണ് നില്ക്കുന്നതെങ്കില് ജാതകന് ദേശനാഥനായി (പഞ്ചായത്തു മെമ്പര് മുതല് മുകളിലേക്ക് മന്ത്രിയോ, ഗവര്ണറോ ഒക്കെയാകാം) ഭവിക്കും. സാധാരണ ശുഭഗ്രഹങ്ങള്ക്ക് അഷ്ടമം അനിഷ്ട സ്ഥാനമാണ്. എന്നാല് എട്ടാമിടത്ത് വ്യാഴം നിന്നാല് ജാതകന് ഉന്നതനിലയിലെത്തും. പക്ഷേ ജാതകന്റെ സന്താനങ്ങള്ക്ക് ആ ഉയര്ന്ന പദവി നിലനിര്ത്താന് കഴിയണമെന്നില്ല.
