തിരുവനന്തപുരം: കേരള സര്‍ക്കാര്‍ കായിക വകുപ്പ്, സ്‌പോര്‍ട്‌സ് കേരള ഫൗണ്ടേഷന്‍, സ്വിഷ് ബാസ്‌ക്കറ്റ്‌ബോള്‍ അക്കാദമി എന്നിവയുടെ സംയുക്ത ആഭിമുഖ്യത്തില്‍ സംഘടിപ്പിക്കുന്ന പ്രഥമ സ്വിഷ് മാസ്റ്റേഴ്‌സ് അഖിലേന്ത്യാ പ്രൈസ് മണി ബാസ്‌ക്കറ്റ്‌ബോള്‍ ടൂര്‍ണമെന്റിന് കാര്യവട്ടം ഗ്രീന്‍ഫീല്‍ഡ് ഇന്റര്‍നാഷണല്‍ സ്റ്റേഡിയത്തില്‍ തുടക്കമായി. രാജ്യത്തിന്റെ വിവിധ ഭാഗങ്ങളില്‍ നിന്നായി അറുപതോളം ടീമുകളാണ് മാറ്റുരയ്‌ക്കുന്നത്. തിരുവനന്തപുരം ജില്ലാ കളക്ടര്‍ അനുകുമാരി ഐ.എ.എസ് ടൂര്‍ണമെന്റ് ഔദ്യോഗികമായി ഉദ്ഘാടനം ചെയ്തു. മുന്‍ ബാസ്‌ക്കറ്റ്‌ബോള്‍ ഫെഡറേഷന്‍ ഓഫ് ഇന്ത്യ വൈസ് പ്രസിഡന്റ് ഡോ. എം.എം. ചാക്കോ, കാര്യവട്ടം കൗണ്‍സിലര്‍ സന്ധ്യാ റാണി എന്നിവര്‍ ചടങ്ങില്‍ പങ്കെടുത്തു.
പുരുഷന്മാര്‍ക്കായി 40+ മുതല്‍ 65+ വരെ ആറ് വിഭാഗങ്ങളിലും സ്ത്രീകള്‍ക്കായി 30+, 40+, 50+ എന്നീ മൂന്ന് വിഭാഗങ്ങളിലുമായാണ് മത്സരങ്ങള്‍ നടക്കുന്നത്. മുന്‍ അന്താരാഷ്‌ട്ര താരങ്ങളും പ്രമുഖ ക്ലബ്ബുകളും അണിനിരക്കുന്ന ടൂര്‍ണമെന്റ് നാളെ സമാപിക്കും.
ആദ്യദിനം നടന്ന മത്സരങ്ങളില്‍ വനിതകളുടെ 30+ വിഭാഗത്തില്‍ എഫ്.ടി.എ പൂനെ, റോഷന്‍ 7സ്റ്റാര്‍ കൊച്ചി, കൊല്ലം 7 എ.എം ഹൂപ്‌സ്റ്റേഴ്‌സ് എന്നിവര്‍ വിജയിച്ചു. പുരുഷന്മാരുടെ 45+ വിഭാഗത്തില്‍ മുന്‍ അന്താരാഷ്‌ട്ര താരങ്ങളുമായി ഇറങ്ങിയ ബാങ്ക് ഓഫ് ബറോഡ തൃശൂര്‍ ഹൂപ്പേഴ്‌സിനെ (71-36) തകര്‍ത്തു. വിങ്സ് യു.എ.ഇ ഒരു പോയിന്റ് വ്യത്യാസത്തില്‍ തെബാസ്‌കോ തേവരയെ (26-25) പരാജയപ്പെടുത്തി. മറ്റ് മത്സരങ്ങളില്‍ 35+ വിഭാഗത്തില്‍ കേരള സ്‌ക്വാഡ്, ബാംഗ്ലൂര്‍ വാരിയേഴ്‌സ്, ചെന്നൈ ബോയ്‌സ് എന്നിവരും 50+ വിഭാഗത്തില്‍ റോഷന്‍ 7 സ്റ്റാര്‍, 7 എ.എം ഹൂപ്പേഴ്‌സ് എന്നിവരും ജയം കണ്ടു. 55+ വിഭാഗത്തില്‍ കോവൈ ബോയ്‌സ്, തെബാസ്‌കോ തേവര, സി.എസ്.കെ 1 എന്നിവര്‍ വിജയികളായി.
